TAPANMANTA | ¿JAPʼIKUNKICHU DIOSPA SUMAJ REGALONTA?
¿Imaynatá agradecekusunman Diospa sumaj regalonmanta?
“Cristoj munakuynenqa tanqawayku [...]. Payqa tukuy runasrayku wañorqa. Ajinamanta kausajkunaqa, manaña paykunapajchu kausanankupaj. Astawanqa pichus paykunarayku wañorqa, kausarinporqataj chaypaj kausanankupaj” (2 Corintios 5:14, 15).
UJ SUMAJ regalota japʼispaqa mayta agradecekunanchej kanman. Jesusqa agradecekuyta yachana kasqanta nerqa chunka runasta sinchʼi onqoyninkumanta jampispa. Paykunamanta ujnintaj “jatunmanta Diosta jatunchaspa kutirimorqa”. Jesús nerqa: “¿Manachu chunkantin sanoyaporqanku? ¿Maypitaj chay jisqʼon kashankuri?”, nispa (Lucas 17:12-17). ¿Imatá reparanchej? Wajkuna yanapariwasqanchejmanta usqhayllata qonqakapuyta atisqanchejta.
Rikunchej jina, Jesús noqanchejrayku wañusqanqa ni imawan kikinchakunchu. Tukuy regalosmanta aswan sumajpuni. Chayrayku, ¿imaynatá agradecekusqanchejta rikuchisunman imastachus Dios noqanchejrayku ruwasqanmanta?
Pichus regalawasqanchejta allinta rejsina. Jesuspa wañuynenqa, mana tukuytachu yanapan jinallamanta wiñay kausayta japʼinankupaj. Astawanpis Jesusqa, Tatanmanta jinata mañakorqa: “Kaymin wiñay kausayqa: Qan kʼata cheqa Diosta rejsisunanku, kachamusqayki Jesucristotapis”, nispa (Juan 17:3). Kaypi tʼukuriy, wawa kashajtiyki uj runa wañunaykimanta salvasusqanta yachaspa, chay runataqa mayta rejsiyta munawaj, imaraykuchus chayta ruwasqantataj tapuriyta, ¿icharí? Jehová Diosqa, Wawanta uj regalota jina runasrayku qorqa salvanawanchejpaj, payqa munan rejsinanchejta, amigosnintaj kananchejta. Biblia nin: “Diosman qayllaykuychej, paytaj qankunaman qayllaykamusonqachej”, nispa (Santiago 4:8).
Jesuspa wañuyninpi creena. “Diospa Wawanpi creejqa wiñay kausayniyoj kanqa” (Juan 3:36). ¿Imaynatá Jesuspa wañuyninpi creesqanchejta rikuchinchej? Jesuspa wañuyninpi creesqanchejtaqa rikuchinchej ruwasqanchejwan (Santiago 2:17). Uj regalota japʼikunapajqa, mana jinallachu qhepakunchej. Ajinallatataj Jesuspa wañuyninpi creesqanchejta rikuchinanchej tiyan. Chaypajqa yachakuna Dios imaynatachus kausananchejta munasqanta, chayman jinataj ruwana.a Qanpis Diosmanta perdonta mañakuy, concienciaykita llimphuchanantataj. Jesuspa wañuyninpi creejkunapajqa aswan qhepaman sumaj kausay kanqa, chay juntʼakunanpi atienekuspa Diosman qayllaykuy (Hebreos 11:1).
Jesuspa Wañuyninta Yuyarinapaj tantakuyman rina. Jesusqa noqanchejrayku wañusqanmanta yuyarikunapaj jinata nerqa: “Kayta ruwallaychejpuni noqamanta yuyarikuspa”, nispa (Lucas 22:19). Kay wataqa Jehovaj testigosnin martes 11 de abrilta, Jesuspa Wañuyninta Yuyarikunapaj tantakuyta ruwasqayku, inti yaykusqantawan. Chay tantakoyqa uj hora jinalla, chaypitaj sutʼinchakonqa imaraykuchus Jesús wañusqanta, imaynatachus kunan, aswan qhepamanpis yanapanawanchejta. Qayna wataqa Jallpʼantinpi, chay tantakuyman 20 millones jina rerqanku. Wajyariyku chay sumaj regalomanta Diosman agradecesqa kasqaykita rikuchinaykipaj.
a Diostaqa rejsisunman, paymantaj qayllaykusunman Palabranta estudiaspa. Jehovaj testigosninta yachachisunankuta niy chayri Internetpi jw.org/qu nisqaman yaykuy.