Jehovaj munaynenqa juntʼakonqapuni

1, 2. 1) ¿Imatá Jehová willawanchej? 2) ¿Imatá nin Isaías 46:10, 11; 55:11?

BIBLIAQA ajinata qallarin: “Qallariypeqa Dios cielotawan, kay pachatawan ruwarqa”, nispa. Chaytaj mayta tʼukuchiwanchej (Gén. 1:1). Jehová imastachus ruwasqanmantaqa, pisillata rikunchej. Imaschus cielopi kasqanmanta, kʼanchaymanta, imaraykuchus tukuy ima pampaman urmasqanmanta ima, uj chhikitallata yachanchej (Ecl. 3:11). Jehovaqa Jallpʼapaj, runaspaj ima, imastachus ruwayta munasqanta willawanchej. Payqa runasta rijchʼayninman jina ruwarqa, kay Jallpʼapi kusisqa kausakunankutataj munarqa (Gén. 1:26). Runasqa wawasnin kananku karqa, paytaj Tatanku kanan karqa.

² Génesis kinsa capitulopeqa yachakunchej, Jehovaj munaynin mana juntʼakunanpaj oqharikusqankuta (Gén. 3:1-7). Jinapis Jehovapajqa, ni imapis kanchu mana allinchay atinaqa. Jehová munayninta juntʼanantaqa mana pipis jarkʼayta atinmanchu (Isa. 46:10, 11; 55:11). Chayrayku Jehovaj munaynenqa maychus tiemponpipuni juntʼakonqa.

3. 1) Diospa Palabranta estudiayta qallarishaspa, ¿imatataj ñaupajta yachakunchej? 2) ¿Imatataj yachakusqanchejwan kay killaspi ruwayta munanchej? 3) ¿Ima tapuykunamantaj kutichisunchej?

³ Jehová imastachus Jallpʼapaj, runaspajpis munasqanta sumajta yachanchej. Yachallanchejtaj Diospa munaynin juntʼakunanpaj imaynatachus Jesús yanapakusqanta. Diospa Palabranta estudiayta qallarishaspa, ichá chaytaraj ñaupajta yachakorqanchej. Chayrayku waj runasmanpis chayta yachachiyta munanchej. Kay killaspitaj chayta ruwayta atisunman, runasta Jesuspa Wañuyninta Yuyarinapaj tantakuyman wajyarispa (Luc. 22:19, 20). Chay tantakuyman jamoj runasqa, Diospa munayninmanta astawan yachakonqanku. Chayrayku runasta chay tantakuyman wajyarinapaj imastachus tapurinanchejpi tʼukurinachej. Kay yachaqanapeqa kinsa tapuykunaman kutichisun: ¿Imatataj Dios Jallpʼapaj, runaspaj ima munarqa? ¿Imaraykutaj mana juntʼakorqachu? ¿Imaraykutaj Diospa munaynin juntʼakunanpaj Jesús kausayninta qonan karqa?

¿IMATATAJ DIOS MUNARQA?

4. ¿Imaynatá Diospa ruwasqasnin atiyninmanta parlawanchej?

⁴ Jehová Diospa tukuy ima ruwasqanqa tʼukunapaj jina, may sumajpunitaj (Gén. 1:31; Jer. 10:12). ¿Imatá yachakusunman Diospa ruwasqasnin may kʼachitu, maychus kananpitaj kasqankumanta? Diospa tukuy ruwasqasnin, aswan juchʼuy kaj imasmantapacha aswan jatuchaj imaskama, mana qhasillapajchu ruwasqa kasqankuta. Célula nisqapi tʼukurispa, uña wawitata chayri inti yaykupushajtin cielo pukayarisqanta qhawaspa mayta tʼukunchej, ¿icharí? Chaytaj ajina, Jehová imachus kʼachitu kasqanta reparananchejpaj ruwawasqanchejrayku (Salmo 19:1; 104:24 leey).

5. ¿Imatá Jehová churarqa tukuy ima ruwasqan lugarninpi kananpaj?

⁵ Jehovaqa tukuy ima ruwasqasninpaj leyesta churarqa. Chay leyestaj tukuy ruwasqasninta yanapan, jinallataj runas allinta kausakunankupajpis. Chay leyes kasqanrayku, cielopi, Jallpʼapipis tukuy ima lugarninpi kashan (Sal. 19:7-9). Diosqa tukuy ima ruwasqanta imapajchus ruwasqa kasqanman jina, maychus kananman churarqa. Chaykunamanta ujtaj, gravedad nisqa kallpa. Chaytaqa ruwarqa Jallpʼapi samay kananpaj, marmanta yaku mana wasaykamunanpaj ima. Gravedad kallpa mana kanmanchu chayqa, Jallpʼapi mana kausay kanmanchu. Dios ruwasqasninpaj leyesta churasqanrayku, tukuy imapis maychus kananpi kashan. Chaytaj rikuchiwanchej, Jehová Jallpʼata, runastapis mana qhasipajchu ruwasqanta. Predicashaspataj tukuy chay imasta Jehová ruwasqanta runasman willarisunman (Apo. 4:11).

6, 7. ¿Ima sumaj imastataj Jehová, Adanman, Evaman ima qorqa?

⁶ Jehovaqa munarqa, runas kay Jallpʼapi wiñaypaj kausakunankuta (Gén. 1:28; Sal. 37:29). Kʼacha kasqanrayku, Adanman, Evaman ima sumaj imasta qorqa (Santiago 1:17 leey). Jehovaqa paykunata ruwarqa, imatapis ajllayta atinankupaj, tʼukurinankupaj, munakunankupaj, sumaj amigosniyoj kayta atinankupajtaj. Jehovaqa Adanwan parlaj, yachacherqataj kasukuyta, imaynatachus kausakunanta, jinallataj imaynatachus animalesta, jallpʼatapis qhawananta (Gén. 2:15-17, 19, 20). Jehovaqa Adantawan Evatawan ruwarqa, imastachus ruwasqanta llamirinankupaj, llojchirinankupaj, rikunankupaj, muskhirinankupaj, uyarinankupaj ima. Ajinamanta Edén huertapi kusisqa kausakuyta atinkuman karqa. Adanwan Evawan ashkha imasta ruwayta aterqanku, wiñaypajtaj mosoj imasta yachakuyta atinkuman karqa.

⁷ ¿Imatawan Jehová runaspaj munarqa? Payqa Adanta, Evatawan ruwarqa mana pantaj wawasniyoj kanankupaj. Munarqataj wawasninkupis wawasniyojllataj kanankuta, runas Jallpʼaman juntʼanankukama. Jehovaqa munarqa runas wawasninkuta munakunankuta, imaynatachus payqa Adantawan Evatawan munakorqa, ajinata. Payqa Jallpʼata, chaypi tukuy ima kajtawan runasman qoporqa. Jallpʼaqa wasinkuman tukunan karqa, chaypitaj wiñaypaj kausakunanku karqa (Sal. 115:16).

¿IMARAYKUTAJ MANA JUNTʼAKORQACHU?

8. ¿Imaraykú Jehová Génesis 2:16, 17 versiculospi tarikusqan kamachiyta qorqa?

⁸ Imatachus Dios ruwayta munasqanqa, qallariypi mana juntʼakorqachu. ¿Imaraykutaj? Jehovaqa Adanman, Evamanwan uj kamachiyta qorqa, maykamallachus imatapis ruwayta atisqankuta yachanankupaj. Pay kamacherqa: “Huertapi tukuynin kaj sachʼasmanta mikhullanki. Allin kajta mana allin kajta yachanamanta sachʼaj poqoynillanta amapuni mikhunkichu. Chay sachʼaj poqoynintachus mikhunki chayqa, wañunki”, nispa (Gén. 2:16, 17). Huertapeqa may chhika mikhuna karqa. Chayrayku chay kamacheyqa entiendeyta, kasukuyta atinapaj jinalla karqa.

9, 10. 1) ¿Imatataj Jehovamanta Satanás nerqa? 2) Adanwan Evawan, ¿ima ruwaytataj ajllarqanku? (3 paginapi dibujota qhawariy).

⁹ Kuraj Supay Satanasqa, Evata uj katarinejta chʼaukiyarqa Tatan Jehovata mana kasukunanpaj (Génesis 3:1-5 leey; Apo. 12:9). Runasqa ‘huertapi kaj tukuynin sachʼasmanta’, uj sachʼaj poqoynillanta mana mikhunankuchu karqa. Satanastaj chayta mana allinpajchu qhawachiyta munarqa. Evaman kaytapis nishanman jina karqa: “Nichá imatapis munasqaykiman jina ruwayta atinkichu á”, nispa. Chantá llullakuspa nerqa: “Chayqa mana jinachu; mana wañunkichejchu”, nispa. Jehovata Eva mana kasukunanpajtaj, nerqa: “Dios allinta yachan, chay sachʼaj poqoyninta mikhuspa, sumaj yachayniyojman tukunaykichejta”, nispa. Chaywantaj Satanasqa kaytapis nishanman jina karqa: “Jehovaqa mana munanchu yachayniyoj kanaykichejta, chayrayku chay sachʼamanta jarkʼakusunkichej”, nispa. Engañayta tukunanpajtaj, Evaman nerqa: “Dios jina kankichej, yachankichejtaj imachus allin kajta, mana allin kajtapis”, nispa.

¹⁰ Adanwan Evawanqa imatachus ruwanankuta ajllananku karqa. ¿Diostachu kasukunkuman karqa chayri Satanastachu? Paykunaqa Satanasta kasukorqanku. Chayta ruwaspataj Satanasman ujchaykukorqanku, Tatanku Jehovatataj qhesacharqanku. Chayrayku Payqa niña wawasninkuta jinachu qhawarqa (Gén. 3:6-13).

11. ¿Imaraykutaj Jehová Adanwan Evawan oqharikusqankuta mana qhawallarqachu?

¹¹ Adanwan Evawanqa Diospa kamachisqanta mana kasukusqankurayku, juchasapa runasman, paypa enemigosninmantaj tukorqanku. Imaraykuchus Jehovaqa juchata chejnikun, nitaj “qhawallaytapis atinchu” (Hab. 1:13). ¿Imataj kanman karqa ñaupa tatasninchejpa juchallikusqankuta qhawallanman karqa chay? Cielopi, jinallataj Jallpʼapi kausajkuna manaña ujchasqachu kankuman karqa, nitaj allintachu kausakunkuman karqa. Angelespis, runaspis yuyankuman karqa, Diosqa parlasqanta mana juntʼasqanta. Jehovatajrí nisqanta juntʼanpuni, nitaj jaykʼajpis qonqanchu (Sal. 119:142). Adanwan Evawan imatachus ruwanankuta ajllayta atispapis, mana Jehovaj leyesninta pisipaj qhawanankuchu karqa. Diospa contranpi oqharikusqankurayku wañorqanku, Dios nisqanman jinataj jallpʼaman tukorqanku (Gén. 3:19).

12. Adán juchallikusqanrayku, ¿imataj wawasninpaj karqa?

¹² Adanwan Evawan Jehovata mana kasukusqankurayku, manaña familianmanta kayta aterqankuchu. Jehovaqa paykunata “Edén huertamanta qharqorqa”, niñataj kutiyta aterqankuchu (Gén. 3:23, 24). Chantapis juchallisqankurayku ñakʼarisqankumanta mana jarkʼarqachu (Deuteronomio 32:4, 5 leey). Chayrayku Adanqa niña Jehovaman rijchʼakuyta aterqachu. Chantapis manaña sumajta kausakuyta aterqachu, nitaj wawasninpis. Wawasninmanqa juchallata, wañuyllatawan saqerqa (Rom. 5:12). Chayrayku Adanpa wawasnenqa niña wiñaypaj kausayta aterqankuchu. Adanwan Evawanqa juchasapa wawasnillayoj kayta aterqanku, jinallataj wawasninkupis. Satanasqa ñaupa tatasninchejta Diospa contranpi churasqanmantapacha, runasta Diospa contranpi churashallanpuni (Juan 8:44).

JESUSPA WAÑUYNINRAYKU DIOSMAN QAYLLAYKUYTA ATINCHEJ

13. ¿Imatataj Jehová runaspaj munarqa?

¹³ Jehovaqa runasta munakullanpuni. Adanwan Evawan saqerparejtinkupis, Jehovaqa runas amigosnin kanankuta munarqa. Nitaj munarqachu ni mayqenninku wañunanta (2 Ped. 3:9). Chayrayku Diosqa runas payman watejmanta qayllaykunankupaj, usqhayllata imatachus ruwananta yuyaychakorqa. ¿Imaynatá chayta ruwanman karqa leyesninta mana pʼakispalla? Chayta yachakuna.

14. 1) Juan 3:16 nisqanman jina, ¿imaynatá Dios runasta juchamanta, wañuymantawan kacharicherqa? 2) ¿Imata entiendenankupajtaj runasta yanapasunman?

¹⁴ Jesuspa Wañuyninta Yuyarinapaj tantakuyman wajyarisunchej chay runasmanta wakenqa, ichá yachanku imatachus Juan 3:16 (leey) nisqanta. Jinapis ichá mana yachankuchu, imaynatachus Jesuspa wañuynin wiñay kausayta japʼinapaj yanapawasqanchejta. Jesuspa Wañuyninta Yuyarinapaj tantakuyman wajyarispaqa, runaswan chaymanta parlariyta atisunman. Chay tantakuyman jamojkunatataj, wasinkupi waturimuspa astawan entiendechisunman. Jesús juchamanta kacharichiwasqanchejta astawan entiendespaqa, reparanqanku Jehová maytapuni munakuwasqanchejta, may yachayniyojtaj kasqanta. Jesús noqanchejrayku wañusqanmanta, ¿imastataj runasman willarisunman?

15. ¿Imapitaj Jesús Adanwan mana kikinchu karqa?

¹⁵ Jehovaqa juchamanta rantinawanchejpaj, uj mana juchayoj runata qorqa. Chay runaqa Diosta mana wasanchananchu karqa, tukuy sonqotaj kausayninta runasrayku qonan karqa (Rom. 5:17-19). Jehovaqa Jesusta cielomanta kachamorqa Jallpʼapi nacekunanpaj. Paytataj tukuy imamanta ñaupajta ruwarqa (Juan 1:14). Ajinamanta Jesusqa mana juchayoj runa karqa, imaynatachus Adán qallariypi karqa, ajina. Jinapis Adanmanta nisqaqa, Jesusqa Jehovaj kamachisqanta tukuy imapi kasukorqa, may sinchʼi ñakʼariypi kaspapis.

16. ¿Imaraykutaj Jesús kausayninta qosqan may sumaj regalo?

¹⁶ Jesusqa mana juchayoj wañusqanrayku, tukuy runasta juchamanta, wañuymanta ima kacharichiyta aterqa. Payqa imaynachus Adán qallariypi karqa, ajinallataj karqa. Jesusqa mana imapi pantarqachu, mana Diosta wasancharqachu, tukuy imapitaj payta kasukorqa (1 Tim. 2:6). Jesús kausayninta qosqanrayku, qharis, warmis, wawas ima wiñay kausayta suyakuyta atinchej (Mat. 20:28). Diospa munaynintaj juntʼakuyta atin (2 Cor. 1:19, 20).

JEHOVAQA FAMILIANMAN KUTINAPAJ YANAPAWANCHEJ

17. Jesús kausayninta qosqanrayku, ¿imastaj kanqa?

¹⁷ Jehovaqa juchamanta kacharichinawanchejpaj ashkhata pagarqa (1 Ped. 1:19). Mayta munakuwasqanchejrayku, munasqa Wawanta noqanchejrayku wañunanpaj qorqa (1 Juan 4:9, 10). Ajinamanta Jesusqa Adanpa cuentanmanta tatanchejman tukorqa (1 Cor. 15:45). Jesús kausayninta qosqanrayku, mana wiñay kausayllatachu japʼisun, manachayqa Diospa familianmanta kasun. Chantapis mana juchayoj runasman tukuyta atisun, Jehovataj kamachiykunasninta mana pʼakispalla familianpi watejmanta japʼikapuwasun. Jehovata tukukuykama sirvejkuna mana juchayoj runasman tukojtinku, ¡may sumajchá kanqa! Cielopi, jinallataj jallpʼapi tukuy kausajkunaqa, uj familialla kanqanku. Tukuyninchej Diospa wawasnin kasun (Rom. 8:21).

18. ¿Maykʼajtaj Jehová “tukuy kaj chhikata kamachenqa”?

¹⁸ Ñaupa tatasninchej Jehovata qhesachajtinkupis, payqa runasta munakullarqapuni, Wawantataj kachamorqa noqanchejrayku wañunanpaj. Juchasapas kajtinchejpis, Satanasqa mana imatapis ruwayta atinchu Jehovata wasanchananchejpaj. Jehovaqa Jesuspa wañuyninnejta cheqan runaspaj qhawawasun. “Pillapis Churita rikuspa paypi creejqa wiñay kawsayniyoj kanqa”. Chay tiempo chayamojtin, ¡kausayqa may sumajpuni kanqa! (Juan 6:40). Diosqa munakuwasqanchejrayku, yachayniyoj kasqanrayku ima, mana juchayoj runasman tukuchiwasun, imaynachus qallariypi kananchejta munarqa, ajinata. Chaypachataj Tatanchej Jehovaqa “tukuy kaj chhikata kamachenqa” (1 Cor. 15:28).

19. 1) Jesuspa wañuyninmanta agradecekunchej chay, ¿imatá ruwasun? (“Kʼacha runasta maskʼanallapuni”, nisqa recuadrota leey). 2) ¿Imatataj qhepan yachaqanapi yachakusun?

¹⁹ Jesuspa wañuyninmanta agradecekusqanchejta rikuchinapaj, Jesús kausayninta qosqanmanta tukuyman willarinanchej tiyan. Runasqa yachananku tiyan, Jehovaqa Jesuspa wañuyninnejta tukuy runasman wiñay kausayta qoyta munasqanta. Jinapis Jesuspa wañuynenqa mana chayllapajchu, manaqa Satanás llulla kasqanta rikuchin. Qhepan yachaqanapitaj chaymanta yachakusun.