Creeyninchejta rikuchina allintataj ajllana
“Creeywan mañakullachunpuni, ni imamanta iskayrayaspataj” (SANT. 1:6).
1. ¿Imatá Caín ajllarqa, chantá imataj karqa?
CAINQA phiñakuyninwan atipachikunantachus manachus ajllanan karqa. Phiñakuyninwan atipachikojtenqa, chʼampaykunapi rikukunman karqa. Mana atipachikojtinrí allin rinman karqa. ¿Imatá Caín ruwarqa? Bibliaqa nin phiñakuyninwan atipachikusqanta. Mana allinta ajllasqanrayku, hermanon Abel wañorqa, Jehovataj niña payta allinpajchu qhawarqa (Gén. 4:3-16).
2. ¿Imaraykutaj imatapis sumajta ajllananchej tiyan?
2 Noqanchejpis imatachus ruwananchejta sapa kuti ajllananchej tiyan. Wakin kutisqa imatachus ruwananchejpi ashkhata tʼukurina tiyan, wakin kutistaj mana. Imaraykuchus wakin imasta ajllasqanchejqa, kausayninchejta allinman chayri mana allinman chayachinman. Imatapis sumajta ajllajtinchejqa llakiykunasninchej pisi kanqa, kusisqataj kausakusunchej. Mana allinta ajllajtinchejrí ashkha llakiykunasniyoj kasunchej, manataj kusisqachu kausakusunchej (Pro. 14:8).
3. 1) ¿Imataj yanapawasun kausayninchejpi imatapis sumajta ajllanapaj? 2) ¿Ima tapuykunamantaj kay yachaqanapi kutichisun?
3 ¿Imataj yanapawasun kausayninchejpi imatapis sumajta ajllanapaj? Diospi, Palabranpi ima creey yanapawasun. Diospi creesqanchejta rikuchisunman, yanapayta munawasqanchejpi, yachayta qonawanchejpi ima atienekuspa. Palabranpi creesqanchejtataj rikuchisunman, yuyaychaykunasninpi atienekuspa (Santiago 1:5-8 leey). Diosman astawan qayllaykojtinchej, Palabrantapis astawan munakojtinchej, Jehová allinninchejtapuni munasqanpi astawan atienekusun. Ajinamanta niraj imatapis ajllashaspa, Palabrantaraj leerisun. Jinapis, ¿imaynatá astawan sumajta ajllayta yachakusunman? Imatachus ajllasqanchejta, ¿cambianachu kanman? Kay yachaqanapi chay tapuykunaman kutichisun.
IMATACHUS RUWAYTA AJLLANA TIYAN
4. ¿Imatataj Adán ajllarqa, chantá imapitaj rikukorqa?
4 Qallariymantapacha, runasqa imatachus ruwanankuta ajllananku karqa. Ñaupaj kaj runa Adanqa, Jehovatachus chayri warmin Evatachus uyariyta ajllanan karqa. Adanqa Evata uyarerqa, paytaj mana allinta ajllananpaj tanqarqa. Chayrayku Jehovaqa Adanta Edén huertamanta wijchʼorqa. Aswan qhepamantaj Adán wañorqa. Adán mana allinta ajllasqanrayku kunankama mayta ñakʼarinchej.
5. ¿Imaraykutaj noqanchej imatachus ruwananchejta ajllananchej tiyan?
5 Wakin runasqa ninku: “Aswan allin kanman imatachus ruwanata wajlla ninawanchej”, nispa. Ichá qanpis ajinata yuyanki. Chaywanpis yuyarinachej, Jehovaqa mana maquinasta jinachu ruwawarqanchej. Maquinasqa mana yuyayniyojchu kanku, nitaj imatapis ajllayta atinkuchu. Jehovaqa munan imatachus ruwanata ajllananchejta, chaytataj sumajta ruwana tiyan. Chaypajtaj Jehovaqa Palabranta qowarqanchej, chaypitaj imaynatachus imatapis ajllanata yachakunchej.
6, 7. ¿Imatataj israelitas ajllananku karqa, imaraykutaj chayta ajllayta mana atillarqankuchu? (13 paginapi dibujota qhawariy).
6 Israelitasqa Sumaj Jallpʼapiña tiyakushaspa, Jehovatachus chayri waj dioskunatachus yupaychayta ajllananku karqa (Josué 24:15 leey). Ichapis chayqa ajllayta atinapaj jinalla kanman karqa. Jinapis chay ajllasqankoqa kausayman chayri wañuyman apanman karqa. Juecespa tiemponpi kausakoj israelitasqa, mana allintachu ajllarqanku. Paykunaqa Jehovata yupaychayta saqerqanku, llulla diosestataj yupaychayta qallarerqanku (Jue. 2:3, 11-23). Profeta Eliaspa tiemponpipis, Diospa llajtanqa ajllanan karqa, Jehovatachus chayri qhasi dios Baaltachus sirviyta (1 Rey. 18:21). Ichapis yuyanki chayqa ajllayta atinankupaj jinalla kasqanta, imaraykuchus Jehovata sirviyqa may sumajpuni. Yachayniyoj runaqa qhasi diosta mana yupaychayta munanmanchu. Jinapis Diospa llajtanqa imatachus ruwananta mana ajllayta aterqachu. Bibliaqa nin, israelitas “iskay yuyayniyojllapuni” kasqankuta. Eliasqa paykunata yuyaycharqa, cheqa Dios Jehovata yupaychayta ajllanankuta.
7 ¿Imaraykutaj israelitas mana ajllayta atillarqankuchu? Iskay imasrayku. Ñaupaj kaj, paykunaqa mana Jehovapi creerqankuchu, nitaj uyariyta munarqankuchu. Chantapis mana Jehovapi atienekorqankuchu, nitaj yachayninta japʼinankupajpis tiempochakorqankuchu. Chayta ruwankuman karqa chayqa, allinta ajllankuman karqa (Sal. 25:12). Iskay kaj, israelitasqa waj llajtasmanta runas jina kausayta qallarerqanku. Chay runasqa israelitasta waj jinata yuyachiyta qallarerqanku, imatachus ruwanankutapis nerqanku. Jinamantataj israelitasqa chay runasta qhatikuyta qallarerqanku, qhasi diosesninkutataj yupaycharqanku. Jehovaqa unaymantaña nerqa, mana kasukojtinku ajinapi rikukunankuta (Éxo. 23:2).
¿WAJKUNACHU NINAWANCHEJ TIYAN IMATACHUS RUWANATA?
8. ¿Imatataj israelitasmanta yachakunchej?
8 Israelitasmanta yachakunchej, imatapis allinta ajllanapajqa, Diospa Palabranwan yanapachikuna kasqanta. Gálatas 6:5 nin: “Sapa uj, ruwananta juntʼanan tiyan”, nispa. Chayrayku mana suyanachu tiyan, wajkuna imatachus ruwanata ninawanchejta. Astawanpis yachakunanchej tiyan imatachus Dios munasqanta, chayman jinataj imatapis ruwana tiyan.
9. ¿Imaraykutaj mana allinchu wajkuna noqanchejpaj ajllananku?
9 Imata ruwanapajpis wajkuna tanqanawanchejta saqejtinchejqa, mana allintachu ajllasunman (Pro. 1:10, 15, 16). Astawanpis sapa ujninchej, Bibliamanta yachakusqanchejman jina imatapis ajllananchej tiyan. Wajkuna noqanchejpaj ajllanankuta saqesun chayqa, runallata qhatisun, llakiypitaj rikukusun.
10. ¿Imatataj Pablo Galaciamanta hermanosman nerqa?
10 Apóstol Pabloqa Galaciamanta hermanosman nerqa, paykuna kikinpuni imatachus ruwanankuta ajllananku kasqanta (Gálatas 4:17 leey). Galaciamanta wakin hermanosqa, wajkunata nisharqanku imatachus ruwanankuta. ¿Imaraykutaj? Chay runasqa paykunallapi yuyaj kanku, munarqankutaj hermanos paykunaman kʼaskakunankuta, apostolesta kasukunankumanta nisqaqa. Chay runasqa mana llampʼu sonqoschu karqanku, nitaj hermanos imatapis ajllayta atisqankuta respetajchu kanku.
11. ¿Imaynatá wajkunata yanaparisunman imatapis ajllananku kajtin?
11 Apóstol Pablo imatachus ruwasqanmanta tukuy yachakusunman. Payqa yacharqa, sapa hermano kausayninpi imatachus ruwananta ajllanan kasqanta, chaytataj jatunpaj qhawarqa (2 Corintios 1:24 leey). Kunanpis ancianosqa wajkunaman yuyaycharishaspa, Pablo jina ruwankuman. ¿Imaynamantá? Uj hermanota Diospa Palabranwan yuyaycharispapis, sapa hermanota imatachus ruwananta ajllajta saqenanku tiyan. Imajtinchus sapa hermano, ajllasqanman jina allinpi chayri mana allinpi rikukonqa. ¿Imatá chaymanta yachakusunman? Wajkunata Bibliaj yuyaychaykunasninwan yanapariyta atispapis, saqenanchej tiyan paykunapuni kausayninkupi imatapis ajllanankuta. Sumajta ajllajtinkutaj, paykunata allin renqa. Ni jaykʼaj yuyananchejchu tiyan, hermanosninchejman imatachus ruwanankuta ninanchejpaj derechoyoj kasqanchejta.
Kʼacha ancianosqa wajkunata yanaparinku paykunapuni kausayninkupi imatapis ajllanankupaj. (11 parrafota qhawariy).
AMA SONQONCHEJTA KASUNACHU
12, 13. ¿Imaraykú mana allinchu phiñasqa chayri sonqo pʼakisqa kashaspa imatapis ajllananchej?
12 Kay tiempopi runasqa, imatachus ruwanankuta sonqonkoj munasqanman jina ajllanku. Chayta ruwaytaj mana allinchu. Bibliaqa niwanchej sonqonchejta mana kasunata (Pro. 28:26). ¿Imaraykutaj? Imaraykuchus “runaj sonqonmin aswan chʼawka, nitaj chaypaj jampi kanchu” (Jer. 17:9). Bibliaqa sonqollankupi atienekoj runasmanta parlan, may llakiypi rikukusqankutataj nin (1 Rey. 11:9; Jer. 3:17; 13:10). ¿Imataj kanman sonqonchejpa munasqanman jina imatapis ajllajtinchej?
13 Jehovaqa kamachiwanchej tukuy sonqonchejwan payta munakunata, runa masinchejtapis noqanchej kikinchejta jina munakunata (Mat. 22:37-39). Jinapis sumajta qhawarikunanchej tiyan. Kay 12 parrafopi rikhurej versiculosqa, rikuchin sonqonchejta kasuy mana allinchu kasqanta. Sutʼincharinapaj, uj runaqa phiñasqa kashaspa ima sonseratapis ruwarparillanman (Pro. 14:17; 29:22). Sonqo pʼakisqa runapis, manallataj imatapis allinta ajllayta atinmanchu (Núm. 32:6-12; Pro. 24:10). Chayrayku imata ruwanapajpis “Diospa leynin[ta]” kasukuna tiyan (Rom. 7:25). Kausayninchejpi imatachus ruwananchejta ajllashaspaqa, mana sonqonchejpa munasqanman jinachu ajllana tiyan.
WAJ JINAMANTA RUWANA KAJTIN
14. Imatachus ruwanata nisqanchejta wakin kutis waj jinamanta ruwananchej, ¿allillanchu? Sutʼinchay.
14 Imatachus ruwananchejta sumajta ajllananchej tiyan. Jinapis uj yachayniyoj runaqa imatachus ajllasqanta wakin kutis qhawarinan kasqanta yachan. Waj jinamantañataj ruwanan kasqanta reparaspataj, waj jinamanta ruwan. Jehovamanta mayta yachakusunman. Imatachus Jonaspa tiemponpi ninivitaswan ruwasqanta qhawarina. “Diosqa sajra ruwayninkuta saqespa allin ñanman kutirikusqankuta rikuspa, mana ruwarqachu imatachus ruwayta yuyasqantaqa” (Jon. 3:10). Payqa ninivitas pesachikusqankuta, niñataj sajra imasta ruwasqankuta rikuspa, manaña paykunata chinkacherqachu. Chaytaj rikuchin Jehovaqa kʼacha, llampʼu sonqo, khuyakojtaj kasqanta. Ashkha runasmanta nisqa, Jehovaqa mana imatapis ruwarparillanchu, ni phiñasqa kashaspapis.
15. ¿Imaraykutaj wakin kutis imatapis waj jinamanta ruwasunman?
15 Wakin kutisqa imatachus ruwayta ajllasqanchejta watejmanta qhawarina kanqa, ichá chayta ruwasun kausayninchej manaña ñaupajta jinachu kajtin. Jehová Diospis imatachus qallariypi nisqanta, wakin kutis waj jinamanta ruwarqa (1 Rey. 21:20, 21, 27-29; 2 Rey. 20:1-5). Noqanchejpis wakin kutis ichá wakin imasmanta astawan yachasqanchejrayku, chay imasta waj jinamanta ruwana kanqa. Rey Davidmanta parlarina. Payqa Saulpa allchhin Mefibosetmanta llullasta parlasqankuta creespa, Mefibosetpa tukuy imasninta waj runaman qoporqa. Jinapis chay willasqanku llulla kasqanta yachaytawan, imatachus qallariypi nisqanta tijrarqa (2 Sam. 16:3, 4; 19:24-29). Wakin kutisqa allin kanman David jina ruwananchej.
16. 1) ¿Imastaj sumajta ajllanapaj yanapawasunman? 2) ¿Imaraykutaj wakin kutis imatapis waj jinamanta ruwana tiyan?
16 Bibliaqa niwanchej, mana imatapis patan uranta ruwanata (Pro. 21:5). Imatachus ruwananchejta sumajta ajllanapajqa, tukuy imata allinta reparanapaj tiempocharikuna tiyan (1 Tes. 5:21). Familiamanta uma kajkunaqa, familiankupaj niraj imatapis ajllashaspa Bibliaj nisqanta, publicacionespa yuyaychasqanta ima qhawarinanku tiyan. Chantapis allin kanman familianmanta kajkunata waturinanku. Yuyarikunachej, Jehovaqa Abrahamman nerqa: “Kasuy warmiyki Sara imatachá nisunki chayta”, nispa (Gén. 21:9-12). Ancianospis Bibliata, publicacionesta ima qhawarinankupaj tiempochakunanku tiyan. Publicacionespi astawan yuyaychaykunata tarejtinkutaj, mana manchachikuspa imatachus nisqankuta waj jinamanta ruwanku. Kʼacha, llampʼu sonqotaj kaj ancianosqa, imatapis waj jinamanta ruwananku kajtin, waj jinamanta ruwanku. Tukuyninchej paykuna jina ruwananchej tiyan. Ajinamanta congregacionpi allin kausay kanqa, ujchasqallapunitaj kasun (Hech. 6:1-4).
IMATACHUS AJLLASQANCHEJTA RUWANA
17. ¿Imataj yanapawasun imatapis sumajta ajllanapaj?
17 Wakin kutisqa, imatachus ajllasqanchej kausayninchejta waj jinaman tukuchinman, wakin kutistaj mana. Sutʼincharinapaj, casarakunatachus manachus ajllana tiyan, casarakuyta ajllasun chaytaj, piwanchus casarakunata ajllana tiyan. Chantapis ajllanallataj tiyan maykʼajchus Diospaj astawan llankʼayta qallarinata. Imaynatachus ajllasqanchejman jinataj kausayninchej kanqa. Chayrayku niraj imatapis ajllashaspa, sumajtaraj tʼukurina tiyan, Jehovamantapis yanapata mañakuna tiyan. Chaytataj mana uj ratollapichu ruwasun. Jinapis allinta ajllanapajqa, Jehovapi atienekuna, payta kasukuna, yuyaychawasqanchejman jinataj ruwana (Pro. 1:5, 6). Jehovaqa Palabrannejta sumajta yuyaychawanchej. Chayrayku Palabranpi yuyaychaykunata maskʼana, Jehovaj yanapaynintataj mañakuna. Jehovaqa imatapis munasqanman jina allinta ruwanapaj yanapawasun. Niraj imatapis ruwanata ajllashaspataj, allin kanman tapurikunanchej: “Kayta ruwaspa, ¿rikuchisajchu Jehovata munakusqayta? ¿Familiayta yanapasajchu kusisqa, sumajtataj kausakunanpaj? ¿Kʼachataj, pacienciayojtaj kasqayta rikuchisajchu?”, nispa.
18. ¿Imatataj Jehová mana ruwanchu, imaraykutaj?
18 Jehovaqa mana tanqawanchejchu payta munakunapaj, nitaj payta sirvinapajpis. Astawanpis sapa ujta ajllajta saqewanchej. Chayta ruwanapaj derechoyoj kasqanchejtataj respetan (Jos. 24:15; Ecl. 5:4). Jinapis Jehovaqa suyan, Palabranpi niwasqanchejman jina imatapis ajllanata. Chay yuyaychaykunasninta japʼikusun, chayman jinataj ruwasun chayqa, imatapis allintapuni ajllasun. Imatachus ruwayta ajllasqanchejpitaj sumajta sayasun (Sant. 1:5-8; 4:8).