¿Imatá ruwasun amigonchejwan phiñanakoj jina kashajtinchej?

SUMAJ amigostaqa mana tariyta atillanchejchu. Chayrayku sumaj amigota tarispaqa, amigosllapuni kanapaj kallpachakuna tiyan. Jinapis, ¿imatá ruwasunman imapis phiñanachiwajtinchej? Bibliata leespaqa, yachakunchej wakin runas llakiypitaj, kusiypitaj amigosllapuni kasqankuta. Kunantaj paykunamanta yachakunachej.

AMIGONCHEJ PANTAJTIN

Davidqa sumaj amigosniyoj karqa. Payqa niraj rey kashaspa ovejero karqa. Davidpa amigosninmanta parlajtinchej, ichapis ñaupajta Jonatanmanta yuyarikunki (1 Sam. 18:1). Jinapis waj amigosnin kallarqataj, ujnin Natán karqa. Bibliaqa mana ninchu maykʼajmantapachachus amigos kasqankuta. Jinapis Davidqa kamachiyta tukuchashaspaña, Natanman willarerqa Diospaj uj templota ruwapuyta munasqanta. Chaytaj rikuchiwanchej Natanpi atienekusqanta, amigonta jinataj qhawasqanta. Natantaqa Jehovaj atiynin yanaparqa, chayraykutaj Davidqa Natanpa nisqanta jatunpaj qhawaj (2 Sam. 7:2, 3).

Jinapis uj kuti, Davidwan Natanwan phiñanakoj jinaña kasharqanku. ¿Imaraykú? Davidqa Betsabewan puñuykorqa, qosan Uriastataj wañuchicherqa (2 Sam. 11:2-21). Davidqa cheqan kajtapuni ruwaspapis, ashkha watasña Diosta sirvispapis, juchallikorqa. ¿Imaraykú? ¿Nichu yacharqa imatachus ruwasqan jucha kasqanta? ¿Diosmanta pakaykuyta atisqantachu yuyarqa?

¿Imatá Natán ruwarqa? ¿Davidta waj runa cheqanchanantachu suyarqa? David juchallikusqantaqa mana Natanllachu yacharqa. Chayrayku ichá Natán yuyarqa Davidpa juchanta reparachejtin, David paypaj phiñakunanta. Chantapis juchanta reparachispaqa, kausayninta wañuy pataman churanman karqa. Imajtinchus Davidqa uj mana juchayoj runata wañuchicherqaña.

Jinapis Natanqa Diospa profetan karqa. Chʼinlla kajtenqa sonqon juchachanman karqa, niñataj Davidwan sumaj amigoschu kankuman karqa. Davidqa Diosmanta karunchakorqa, Diosman kutirikunanpajtaj yanapata necesitarqa. Amigon Natanlla sumajta yanapayta aterqa. Natanqa yacharqa David ñaupajta ovejero kasqanta. Chayrayku Davidta juchanta reparachinanpaj, chayman jina uj kikinchayta ajllarqa. Ajinamanta Davidpa sonqonman chayarqa, yanaparqataj juchanta usqhayllata allinchananpaj (2 Sam. 12:1-14).

Ujnin amigoyki juchallikojtin, chayri mayta pantaykojtin, ¿imatá ruwawaj? Ichapis yuyanki pantasqanta reparachejtiyki amigoyki phiñakunanta. Chayri ichá yuyanki amigoykej ruwasqanta ancianosman willaspa, payta wasanchashasqaykita. Ancianosllataj amigoykita yanapariyta atinku. Jinapi rikukuspa, ¿imatá ruwanki?

Kay yachaqanaj qallariyninpi, Giannimanta parlarerqanchej. Pay nin: “Maurizioqa uj jinalla kasharqa. Manaña tukuy imatachu willariwaj. Chayrayku mana atikullajtinpis, paywan parlarinayta nerqani. Jinapis yuyarqani: ‘¿Imatataj niyman yanapanaypajri? Noqamanta astawan yachanqa’, nispa. Chantapis mana yacharqanichu imatachus ninawanta. Imastachus yachachiwasqanta yuyarikorqani. Chaytaj yanapawarqa amigoywan parlarinaypaj. Maurizioqa yanapata necesitashajtiy yanapariwarqa. Amigollaypuni kananta munarqani, chayrayku yanapariyta munarqani”, nispa.

Maurizio nin: “Gianniqa imatachus yuyasqanta sutʼinta nipuwarqa. Pantasqaymanta ni amigoypis, nitaj Jehovapis juchayojchu karqa. Imatachus tarpusqayta oqharisharqani. Chayrayku kʼamiwasqankuta japʼikorqani, tiemponmantaj ujtawan Diospa amigon karqani”, nispa.

AMIGONCHEJ LLAKIYPI KAJTIN

Davidtaqa llakiypi kashajtin amigosnin yanaparqanku. Paykunamanta ujqa Husai karqa. Biblia nin: “Davidpa kawsaqen Husai”, nispa (2 Sam. 16:16; 1 Cró. 27:33). Husaiqa Davidpa yanapajnin karqa, reytaj mana pejpa yachanallanta wakin kamachiykunata qoj.

Davidpa wawan Absalón contranta oqharikojtin, ashkha israelitas Absalonman ujchaykukorqanku. Davidtaqa mana wawallanchu wasancharqa, manachayqa wakin amigosninpis. Jinapis Husaiqa Davidllawanpuni karqa. David ayqekojtinpis payta taripaj rerqa. Chantapis kausayninta wañuy pataman churarqa, Absalonpa oqharikusqanta chinkachinanrayku. Chaytataj mana reypaj yanapajnin kasqanraykullachu ruwarqa, manaqa Davidpa sumaj amigon kasqanrayku (2 Sam. 15:13-17, 32-37; 16:15–17:16).

Congregacionpeqa hermanosninchejwan ujchasqa kanchej, mana uj kamachiyta kasukusqanchejraykullachu, nitaj ima ruwayniyoj kasqanchejraykullachu. Hermanosninchejpajqa imatapis ruwanchej paykunata munakusqanchejrayku, manataj chayta ruwananchejpuni kasqanraykullachu.

Federicotaqa amigon Antonio ajinata yanaparqa, Diosmanta mana karunchakunanpaj. Federico nin: “Antoniowanqa congregacionman chamusqanmantapacha amigos kayku. Iskayniyku siervos ministeriales karqayku, khuskataj Jehovapaj kusisqa llankʼarqayku. Pisi tiemponman Antoniota ancianota churarqanku. Noqaqa amigoy Antonio jina kayta munarqani”, nispa. Chayllapi Federico pantaykorqa. Yanapata chay rato maskʼajtinpis, manaña precursor, nitaj siervo ministerialpis kayta aterqañachu. ¿Imatataj Antonio ruwarqa?

Federico nin: “Repararqani Antonio noqamanta mayta llakikusqanta. Payqa sonqochawarqa, yanapawarqataj Jehovata yupaychanallaypajpuni. Manapuni sapayta saqerpariwarqachu. Sapa kuti kallpachawaj Jehovawan allinpi kanallaypajpuni, ñaupajman rinallaypajpuni”, nispa. Antonio nin: “Amigoypaj astawan tiempochakorqani. Munarqani yachananta mana manchikuspa imatapis willariwayta atisqanta, llakiynintapis”, nispa. Aswan qhepaman Federicoqa watejmanta sumaj cristiano karqa. Chantapis ujtawan precursor, siervo ministerial ima karqa. Antonio nin: “Niña uj congregacionllapichu kaspapis, sumaj amigosllapuni kayku”, nispa.

AMIGONCHEJ SAQERPAWAJTINCHEJ

¿Imanawajtaj amigoyki astawan necesitashajtiykipuni saqerpasojtin? Maytachá sonqoyki nanasunkiman. ¿Perdonayta atiwajchu? ¿Watejmanta amigoykita jina qhawawajchu?

Jesús wañupunan qayllata imaspichus rikukusqanpi tʼukurina. Payqa unayta apostolesninwan khuska karqa, sumaj amigosninta jinataj qhawaj (Juan 15:15). Jinapis Jesusta soldados japʼishajtinku, apostolesnenqa ayqerqanku, sapantataj saqerparerqanku. Apóstol Pedro nerqa: “Noqaqa ni imarayku saqerparisqaykichu”, nispa. Jinapis chay chʼisipacha payta mana rejsisqanta nerqa (Mat. 26:31-33, 56, 69-75).

Jesusqa yacharqaña sapallan ñakʼarinanta. Jinapis discipulosnin saqerparejtinku, sonqon nanarqachá. ¿Imatá Jesús ruwarqa? ¿Discipulosninpaj phiñakorqachu, rabiakorqachu, niñachu amigosninpaj qhawarqa? Mana. Chayta yachanchej kausarimusqantawan imastachus paykunaman nisqanpi. Jesusqa mana discipulosninta pantasqankumanta juchacharqachu, nitaj wañuchinankupaj japʼishajtinku chay chʼisi imatachus ruwasqankumanta yuyaricherqachu.

Astawanpis Pedrota, waj discipulosninta ima amigosnillanpuni kasqankuta nerqa. Chantapis paykunapi atienekusqanta rikucherqa, uj jatun llankʼayta paykunaman qospa. Discipulostaj tukuy atisqankuta ruwarqanku Jesuspa sonqonta ujtawan mana nanachinankupaj, kamachisqantataj tukuy sonqo juntʼarqanku (Hech. 1:8; Col. 1:23). Discipulosqa Jesús paykunata munakusqanta ni jaykʼaj qonqarqankuchu.

Elvira sutiyoj hermanaqa, ni jaykʼaj qonqanchu amigan Giuliana imatachus payrayku ruwasqanta. Elvira nin: “Giulianaqa imastachus ruwasqay sonqonta nanachisqanta niwarqa. Chaytaj mayta llakichiwarqa. Payqa phiñakunallanta phiñakusharqa. Jinapis paymanta llakikunanmantaqa, noqamanta astawan llakisqa kasharqa. Payqa llakikorqa pantasqayrayku imapichus rikhurinaymanta, noqa kikin chʼampaykunata maskʼakushasqaymanta ima. Noqaj allinniypi astawan yuyasqanqa, sonqoyta kuyuricherqa. Chayta ni jaykʼaj qonqasajchu. Jehovaman mayta agradecekorqani, ajina kʼacha amigata qowasqanmanta”, nispa.

¿Imatataj ruwasun amigonchejwan phiñanakoj jina kashajtinchej? Sumaj amigo kaspaqa, ima chʼampaymantapis amigonchejwan sutʼita parlarisun, sonqonta mana nanachispallataj. Llakiykuna kajtintaj, Natán jina, Husai jinataj amigonchejta mana saqerpasunchu. Chantapis Jesús jina perdonanapaj wakichisqa kasun. ¿Ajina amigochu kanki?