Leejkunaj tapuyninku

¿Imaraykutaj Mateowan Lucaswan mana kikintapunichu qhelqarqanku Jesús wawallaraj kashajtin imaschus kasqanmanta?

Mateowan Lucaswanqa, Jesús wawallaraj kashajtin imaschus kasqanmanta qhelqarqanku. Jinapis sapa uj waj jinata qhelqarqanku. Mateoqa Josemanta astawan parlarqa. Lucastajrí Mariamanta astawan parlarqa.

Mateo qhelqasqanman jina, Joseqa, María onqoj kasqanta yachaytawan paymanta divorciakuyta munarqa. Jinapis uj mosqoypi uj ángel Joseta sutʼincharqa, Diospa atiyninwan María onqoj rikhurisqanta. Josetaj angelpa nisqanta japʼikorqa (Mat. 1:19-25). Chantapis Mateo qhelqasqanman jina, Diospa angelnenqa watejmanta Joseman uj mosqoypi rikhurerqa, kamacherqataj Egiptoman familianwan ayqenanta. Josetaj chayta kasukorqa. Chantataj Diospa angelnenqa, watejmanta Joseman mosqoypi rikhurispa, kamacherqa Israel jallpʼaman kutipunanta. Josetajrí Israel jallpʼaman kutipuspa, Nazaret llajtapi tiyakorqa (Mat. 2:13, 14, 19-23). Mateo libropi uj, iskay capitulospi, Josejpa sutenqa 15 kutista rikhurin. Mariaj sutintajrí 9 kutisllata rikhurin.

Lucas qhelqasqanman jinataj, Diospa angelnin Gabrielqa, Mariaman rikhurerqa. Chantá Mariaqa, ayllunmanta Elisabetta waturikoj rerqa. Paywan kaspataj Jehová Diosta jatuncharqa (Luc. 1:26-56). Chantapis Lucas qhelqasqanman jina, Simeonqa Mariaman nerqa, Jesús mayta ñakʼarinanta. Astawanpis Lucas qhelqarqa Jesús 12 watasniyoj kashajtin, tatasninwan temploman risqanmanta, imatachus maman María Jesusman nisqanmantapis. Chantapis Lucasqa, qhelqallarqataj María chay tukuy imasta sonqonpi waqaychasqanta (Luc. 2:19, 34, 35, 48, 51). Lucas libropi uj, iskay capitulospi, Mariaj sutenqa 24 kutista rikhurin. Josejpa sutintajrí 6 kutisllata rikhurin. Reparanchej jina, Mateoqa Josej llakiyninmanta, imastachus ruwasqanmantawan astawan parlarqa. Lucastajrí astawan parlarqa, María Jesuspa maman kasqanmanta, kausayninpi imastachus rikusqanmantawan.

Chantapis Mateowan Lucaswanqa, Jesuspa ñaupa tatasninmanta mana kikintachu qhelqarqanku. Mateo qhelqasqanman jina, Jesusqa rey kananpaj derechoyoj karqa. Imaraykuchus tatan Joseqa, Salomonpa mirayninmanta karqa. Salomontaj rey Davidpa wawan karqa (Mat. 1:6, 16). Lucas qhelqasqanman jinataj Mariaqa, Helijpa wawan karqa. Helitaj Natanpa mirayninmanta karqa, Natantaj rey Davidpa wawan karqa (Rom. 1:3). Chayraykutaj Jesusqa, maman Marianejta rey kananpaj derechoyojllataj karqa (Luc. 3:31). Chantá, ¿imaraykutaj Lucas nin José Helijpa wawan kasqanta, manataj Mariachu? Imaraykuchus jaqay tiempopi qharej miraynillanmanta astawan parlakoj. Chantapis Lucasqa, Helijpa wawan José kasqanta nispaqa, tolqan kasqanta nisharqa (Luc. 3:23).

Jesuspa ñaupa tatasninmanta parlaspa, Mateowan Lucaswanqa, Jesús Diospa ajllakusqanpuni kasqanta rikuchinku. Jesús, rey Davidpa mirayninmanta jamusqantaqa, fariseospis saduceospis sutʼita yacharqanku. Kunanpis Mateo libropi, Lucas libropipis, Jesuspa ñaupa tatasninmanta qhelqasqa kasqanqa, Jehová Dios nisqanta juntʼananpi atienekunapaj yanapawanchej.