Kusikuyniyoj kayqa, Diospa atiyninmanta jamun

TUKUYPIS kusisqapuni kayta munanchej. Chaywanpis qhepa pʼunchaykunapi kausakusqanchejrayku, kausayqa “may llakiy” (2 Tim. 3:1). Wakin runasqa llakisqalla kanku mana justicia ruwakusqanrayku, onqoykusqankurayku, trabajonkumanta wijchʼuchikusqankurayku chayri familiankumanta pillapis wañupusqanrayku. Wakin hermanospis ichá pisimanta pisi llakikuyta qallarinkuman. Jinapi rikukuspa imatachus ruwananchejta yachakusunchej.

Ñaupajtaqa, yachakusunchej imaynachus kusikuyniyoj runa kasqanta. Yachakullasuntaj imaynatachus Diospa kamachisnin llakiypi rikukuspapis, kusisqallapuni kasqankuta. Chantapis yachakusunchej imatachus ruwanata kusisqallapuni kanapaj.

¿IMAYNATAJ KUSIKUYNIYOJ RUNA?

Asispalla purej runaqa, mana kusisqapunichu kashanman. Chayta entiendenapajqa, uj machasqamanta parlarina. Machasqa runaqa, ichá manchayta asinman, kusisqapis kashanman jina. Chʼaki sonqoña kaspataj, manaña asirinmanchu, llakiykunasninmantataj yuyarikullanmanpuni. Machasqa runaqa asispallapuni kajtinpis, mana kusisqapunichu kashanman (Pro. 14:13).

Kusikuyniyoj runarí, imatapis kusisqa ruwan, kusiywantaj allin imasta suyakun. “Sinchʼi llakiykunapi kashaspapis” kusisqallapuni (1 Tes. 1:6). Chantapis kusikuyniyoj runaqa, ñakʼarichisqa kaspapis kusisqallapuni. Apostolesmanta parlarina. Paykunataqa runas mayta jasutʼerqanku. Jinapis Biblia nin: “Apostolestajrí Jatun Juntaj ñaupaqenmanta kusisqa riporqanku, Jesuspa sutinrayku ñakʼarisqankumanta”, nispa (Hech. 5:41). Apostolesqa, Jehová Diosta kasukusqankurayku kusisqallapuni kasharqanku.

Kusikuyniyoj runas kanapajqa, kallpachakunanchej tiyan. Imajtinchus Jehová Diospa atiynillanwan kusisqa kayta atisunman. Diospa atiynenqa yanapawasun, “mosoj runa” kaywan pʼachallikunapaj, ajinamanta kusisqa kanapaj (Efe. 4:24; Gál. 5:22). Kusisqa kaspataj, ima llakiytapis aguantallasunchej.

DIOSPA KAMACHISNINMANTA YACHAKUNA

Jehová Diosqa jallpʼata ruwashaspa, munarqa tukuy ima sumaj kananta. Kay tiempopi runas sajra imasllatapuni ruwajtinkupis, Jehová Diosqa mana llakiywan atipachikunchu. Bibliataj nin: “Atiywan, kusiywan ima tiyakunampeqa kashan”, nispa (1 Cró. 16:27). Chantapis Jehová Diosqa kusikun, kamachisnin allin imasta ruwajtinku (Pro. 27:11).

Chayrayku noqanchejqa Jehová Dios jina kanapaj kallpachakuna. Nitaj problemasninchejmanta anchata llakikunachu. Astawanqa kusisqallapuni kanapaj imaynasmantachus Dios yanapawasqanchejpi piensarina. Jehová Diospitaj pacienciawan suyakuna chay llakiykunata chinkachinankama.a

Bibliaqa niwanchej, Diospa wakin kamachisnin llakiypi rikukuspapis kusisqallapuni kasqankuta. Paykunamanta ujnintaj Abrahán karqa. Payqa ñakʼarishaspapis chayri wañuy patapi kashaspapis, kusisqallapuni karqa (Gén. 12:10-20; 14:8-16; 16:4, 5; 20:1-18; 21:8, 9). Chantapis tukuy llakiykunasninta kusiywan aguantarqa, paraisopi kausakuyta suyakusqanrayku, maypichus Jesús gobernamonqa (Gén. 22:15-18; Heb. 11:10). Uj kutipi Jesús nerqa: “Tataykichej Abrahanqa rikuytapuni munarqa imastachus ruwanay karqa chayta, rikuspataj maytapuni kusikorqa”, nispa (Juan 8:56). Noqanchejpis Abrahán jina kusisqallataj kasunman. Chaypajqa ima bendicionestachus paraisopi japʼinanchejpi tʼukurinanchej tiyan (Rom. 8:21).

Pablowan Silaswanpis, Abrahán jinallataj ima tʼinkatachus japʼinankupi astawan yuyarqanku. Paykunaqa tʼinkankuta japʼinankupi creesqankurayku, ñakʼarichisqa kashaspapis kusisqallapuni kasharqanku. Uj kutipi runasqa paykunata mayta seqʼoykorqanku, carcelmantaj wisqʼaykucherqanku. Chay kutimanta parlaspa, Bibliaqa jinata nin: “Chaupi tutata jinataj Pablowan Silaswanqa Diosmanta mañakusharqanku, takispataj Diosta alabasharqanku”, nispa (Hech. 16:23-25). Paykunaqa kusisqa kasharqanku, Jesuspa sutinrayku ñakʼarisqankumanta. Chayrayku Pablo jina, Silas jinataj kayta munanchej chayqa, ima llakiytapis kusiywan aguantana. Kusiywan aguantaspaqa wajkunata yanapasunchej (Fili. 1:12-14).

Kay tiempomanta wakin hermanosqa, sufrispapis kusisqallapuni kashanku. Hermanonchej Georgemanta parlarina. Payqa Filipinas suyumanta, Tacloban llajtamantataj. Chay suyupeqa, 2013 watapi, mama qochamanta yaku wasaykamusqanrayku ashkha wasista apakaporqa. Jehovaj testigosninpis 1.000 kuraj wasisninkuta pierderqanku. Georgej wasintapis yaku apakapusqa. Pay nerqa: “Llakiypi rikukuspapis hermanosqa kusisqa kasharqanku. Noqapis imayna kusisqapunichus kashasqaytaqa, mana niyta atiymanchu”, nispa. Ima llakiypi kashaspapis kusisqallapuni kana. Chaypajqa yuyarikuna imaynasmantachus Jehová Dios bendeciwasqanchejta. Bendeciwasqanchejmantataj agradecekunapuni. Kunantaj qhawarina kusisqallapuni kanapaj imaspiwanchus yanapawasqanchejta.

¿IMASMANTATAJ KUSIKUSUNMAN?

Noqanchejqa mayta kusikunchej, tukuyta Kamachej Diosman qayllaykusqanchejrayku. Payqa Diosninchej, Tatanchej, Amigonchejtaj (Sal. 71:17, 18).

Kusikullanchejtaj kausayninchejpi allin imasta ruwaspa (Ecl. 3:12, 13). Chantapis kusikunchej Jehová Diospa munayninta yachasqanchejrayku, payta kusichiyta atisqanchejrayku ima (Col. 1:9, 10). Chaykunata yachaspataj, imapajchus kausashasqanchejta sumajta entiendenchej. Mundomanta runastajrí, mana yachankuchu imapajchus Diosninchej ruwawasqanchejta. Chaymanta parlaspa apóstol Pablo nerqa: ‘Imastachus ñawi mana rikorqachu, nitaj ninri uyarerqachu, nillataj runas sonqonkupi yuyarqankuchu chaykunataqa, Dios wakicherqa payta munakojkunapaj. Chay pakasqa yachaytaqa, Dios atiyninnejta sutʼinchawarqanchejʼ, nispa (1 Cor. 2:9, 10).

Chantapis Jehová Diosqa noqanchejrayku allin imasta ruwarqa. Payqa juchasninchejta perdonawarqanchej (1 Juan 2:12). Khuyakuwasqanchejraykutaj paraisopi kausakunanchejta niwanchej (Rom. 12:12). Chantapis Jehová Diosqa, hermanosta qowanchej payta, uj familia jina yupaychanapaj (Sal. 133:1). Bibliapis niwanchej Jehová Diosqa angelesninwan Diablomanta, sajra angelesmantawan jarkʼashawasqanchejta (Sal. 91:11). Chaykunapi tʼukurispaqa, aswan kusisqa kasunchej (Fili. 4:4).

KUSISQALLAPUNI KANA

Uj kutipi Jesús nerqa: “Chay imasta niykichej, qankunapis noqa jina kusisqallapuni kanaykichejpaj”, nispa (Juan 15:11). Arí, Jesús jina kusisqallapuni kayta atisunman. Chayta entiendenapajqa ninamanta parlarina. Nina lauranallanpajpuneqa llantʼata enqhanallanchejpuni tiyan. Kusisqallapuni kanapajtaj, Diospa atiyninta mañakunallapuni, Bibliaj nisqasninpitaj tʼukurinallapuni, imajtinchus Bibliaqa Diospa yuyaychasqan kashan (Sal. 1:1, 2; Luc. 11:13).

Chantapis kusisqallapuni kanapajqa, Diosta kusichinapaj jina imatapis ruwana (Sal. 35:27; 112:1). Imajtinchus Jehová Diosqa munayninta ruwanapaj ruwawarqanchej. Bibliapi nin: “Diosta manchachikuy, kamachisqasnintataj juntʼay. Kay imasllata runaqa astawan ruwanan tiyan”, nispa (Ecl. 12:13). Arí, Diosta sirvispalla kusisqa kasunman.b

KUSISQA KAYQA YANAPAWANCHEJ

Kusisqallapuni kayqa, tukuy imapi yanapawanchej. Llakiykunapi rikukuspapis kusiywan Jehová Diosta sirvejtinchejqa, payta kusichinchej (Deu. 16:15; 1 Tes. 5:16-18). Jehová Diospaj astawan llankʼaspaqa, kusisqa kasun, ashkha bendicionesta japʼisun, nitaj qhapajyayllatachu maskʼasun (Mat. 13:44). Chaytaj astawan kusichiwasunchej. Wajkunatapis kusichisunchej. Sonqonchejpis mana juchachawasunchu (Hech. 20:35; Fili. 1:3-5).

Chantapis kusisqallapuni kasunchej chayqa, mana anchata onqosunchu. Biblia nin: “Sonqo kusisqa kayqa uj sumaj jampi”, nispa (Pro. 17:22). Uj doctorpis jinata nerqa: “Kusisqallapuni, sonqo juntʼasqataj kasunchej chayqa, mana ima onqoypis japʼillawasunchu”, nispa. Payqa uj universidadpi trabajan Estados Unidospi.

Reparanchej jina, manchay sajra pʼunchaykunapi kausakuspapis, kusisqa kasunman. Kusisqallapuni kanapajtaj, Diospa atiyninta mañakuna, Bibliata estudiana, estudiasqanchejpitaj tʼukurina. Chantapis ima bendicionestachus japʼishasqanchejpi tʼukurina. Diospa kamachisnin jinataj, sinchʼi creeyniyoj kana, munayninta ruwanapajtaj kallpachakuna. Chaykunata ruwajtinchej Salmo 64, versículo 10 nisqan noqanchejpi juntʼakusqanta reparasunchej. Chaypi nin: “Cheqan runaqa Diospi kusikonqa, paypitaj atienekonqa”, nispa.