Jehová Diospajqa tukuy imapis atikullan

KAY 1937 watapi nacekorqani, uj haciendapi, Tokmak llajtapi, chaytaj Kirguistán suyupi kashan. Noqaykoqa kirguís parlayta parlayku. Tatasneyqa campomanta karqanku, uj jatun haciendapitaj sutʼiyaymanta chʼisiyaykama trabajaj kanku. Patronesqa trabajadoresman mikhunallata qoj kanku, watapitaj uj kutillata pagaj kanku. Mamayqa noqata, sullkʼa hermanitaytawan mana uywayta atillawarqaykuchu. Escuelamantaj quinto cursokamalla rerqani, haciendapi trabajayta qallarisqayrayku.

Tiyakorqayku chay lugarpeqa, tukuy pobres karqayku. Chayrayku qolqeta ganakunaykupajqa, maytapuni trabajanayku karqa. Joven kashaspaqa mana Jehová Diosta rejserqanichu, nillataj yacharqanichu imapajchus Dios ruwawasqanchejtapis. Jinapis chaykunata yachaspaqa sonqoy qhallallarerqa. Kunantaj willarisqaykichej maykʼajchus hermanos Kirguistán suyupi Jehová Diosmanta willayta qallarisqankuta. Paykunaqa tiyakorqani chay lugaresmanraj chayamorqanku.

KIRGUISTANPI DIOSMANTA WILLAKUN

Kay 1950 watas chaynejta Kirguistán suyupi, Jehovaj testigosnin Diosmanta willayta qallarerqanku. Chaywanpis tukuy runasman willayqa, mana facilchu karqa. Imaraykuchus jaqay tiempopi Kirguistán suyoqa, Unión Sovieticaj japʼiyninpi kasharqa. Unión Sovieticamanta autoridadesqa Jehovaj testigosninta mayta qhatiykacharqanku, mana politicaman chhapukusqankurayku (Juan 18:36). Jinapis hermanosqa, Jehová Diospa yanapayninwan predicallarqankupuni. Noqapis kausayniypi repararqani, Jehová “Diospajqa tukuy imapis” atikusqanta (Mar. 10:27).

Jaqay tiempopeqa, autoridadespa contranpi kajkunata, politicaman mana chhapukojkunatawan Siberia llajtaman apaj kanku. Siberiataj Unión Sovieticaj japʼiyninpi kasharqa. Tiemponmantaj chay runasta kacharipoj kanku. Chaykunamanta wakintaj, Kirguistanman jamporqanku. Wakenqa Jehovaj testigosnin karqanku, hermano Emil Yantzen jina. Payqa Kirguistanpi 1919 watapi nacekusqa. Chaymantataj autoridadesqa Siberiaman apachisqanku, esclavo jina trabajananpaj. Chaypitaj Jehová Diosmanta yachakusqa. Emilqa 1956 watapi Kirguistanman kutinpusqa, Sokuluk chaynejman. Noqapis chaynejpi tiyakorqani. Kay 1958 watapitaj, primera vez Kirguistanpi uj congregación rikhurerqa.

Watanman jinataj hermano Victor Vinter, Sukuluk llajtaman chayamusqa. Autoridadesqa payta mayta ñakʼarichisqanku, politicaman mana chhapukusqanrayku. Carcelmantaj iskay kutipi kinsa wataspaj wisqʼaykusqanku. Tiemponmantaj watejmanta chunka wataspaj wisqʼaykullasqankutaj. Chantá phishqa watata waj lugarman apakapusqanku. Ajinata Jehovaj testigosninta qhatiykachakojtinpis paykunaqa predicallarqankupuni.

LLAJTAY CHAYNEJPI PREDICAYTA QALLARINKU

Kay 1963 watapaj, Kirguistanpi Jehovaj testigosnin 160 jinaña karqanku. Paykunamanta wakenqa Alemaniamanta, Ucraniamanta, Rusiamanta karqanku. Ujnintaj Eduard Varter karqa. Payqa 1924 watapi, Alemaniapi bautizakusqa. Kay 1940 watas chaynejpitaj Hitlerpa soldadosnin, Eduardta esclavota jina uj lugarpi trabajachisqanku. Pisi tiemponmantaj Unión Sovieticamanta autoridadesñataj, waj lugarman apachisqanku. Jinapis payqa manapuni Jehová Diosmanta karunchakusqachu. Kay 1961 watapitaj Kirguistanman chayamorqa, Kant nisqa llajtaman. Chay llajtaqa llajtay chaynejpi kashan.

Kant llajtapeqa Elizabeth Fot tiyakullarqataj. Payqa Jehovaj testigon karqa, ropasta siraspataj trabajaj. Doctores, profesores, waj profesionales ima paywanpuni ropata sirachikoj kanku, sumajta sirasqanrayku. Uj juezpa señoranpis Elizabethwan ropasta sirachikullajtaj kasqa. Uj pachataj chay señoraqa, Elizabethta mayta tapuykusqa, maypichus wañusqas kasqankumanta, imapajtachus Diosninchej ruwawasqanchejmantapis. Elizabethtaj chay tapuykunasninman Bibliawan sutʼincharisqa. Jinamanta, tiemponman juezpa señoranqa Jehovaj testigonman tukusqa.

Chay tiempopi Nikolai Chimpoesh sutiyoj hermanota, congregacionesta waturejta jina churasqanku. Payqa Moldavia suyumanta kasqa. Casi 30 watastapunitaj congregacionesta waturispa Diosta sirvisqa. Chantapis encargasqallataj kasqa publicaciones copiakunanpaj, congregacionesmantaj apachikunanpaj. Autoridadestaj imastachus congregacionesta waturej hermano ruwashasqanta yachaykusqanku. Chayrayku hermano Eduard Varter, payta nisqa: “Publicacionesmanta tapusojtinkoqa, Brooklynmantapacha apachimuwasqanchejta ninki. Soldados parlashasojtinkutaj ama kʼumuykachankichu. Amapuni manchachikunkichu”, nispa (Mat. 10:19).

Pisi tiemponmantaj hermano Nikolaita Kant llajtamanta policías oficinankuman wajyachisqanku. Chay kutimanta parlaspa Nikolai nin: “Policiaqa tapuwarqa pichus publicacionesta qowasqaykuta. Noqataj nerqani Brooklynmanta apachimuwasqaykuta. Policiataj ni imanakuyta aterqachu. Chantá kachapuwarqa, nitaj wajyachiwarqañachu”, nispa. Jinapis Jehovaj testigosnenqa Kirguistanpa pata ladonpi predicallarqankupuni. Noqataj chaynejpi tiyakorqani. Kay 1980 watas chaynejpitaj, señoraywan Bibliamanta yachakuyta qallarerqayku. Ñaupajtaqa señoray sumaj willaykunata uyarerqa. Señoraypa sutenqa Mairambubu.

SEÑORAY UYARIN JEHOVÁ DIOSMANTA

Señorayqa Kirguistanllamantataj, Naryn lugarmanta. Paytaqa hermanaypa wasinpi, agosto de 1974 watapi rejserqani, sonqoytataj suwarpawarqa. Chay diapachataj casarakorqayku.

Kay enero de 1981 watapi, señorayqa mercadomanta micropi kutinpusharqa. Jinallapi uj señorata kay jinata parlajta uyarisqa: “Manaña wañuy kanqachu, wañusqaspis kausarimonqanku”, nispa nejta. Warmeyqa chayta uyarispa, astawan yachayta munasqa. Chayrayku micromanta tukuy runas uraykusqankutawan, chay señorata maskʼamusqa. Chantá señoraj sutinta tapusqa, maypichus tiyakusqantapis. Chay señoraqa Jehovaj testigon kasqa, Apun Mambetsadykova sutikusqantataj nisqa. Jinapis mana willasqachu maypichus tiyakusqanta. Astawanqa señoraypa direccionninta qochikusqa. Imaraykuchus chay tiempopi Jehovaj testigosnenqa, mana reparachikuspalla predicaj kanku, autoridades qhatiykachasqankurayku. Chay señorawan parlasqanmantataj warmeyqa, wasiman kusisqa chayamorqa.

Chayamuspataj, niwarqa: “Mana creewankichu. Uj señoraqa, tumpamantawan runas manaña wañunankuta nisharqa, phiña animalespis mansoyanankuta”, nispa. Noqataj manapuni creerqanichu, nerqanitaj: “Jamurillanman, astawan yacharichinawanchejpaj”, nispa.

Chay señoraqa kinsa killasninmanraj wasiykuman jamorqa. Chantá Kirguistanpi ñaupajta bautizakojkuna hermanaspis visitarillawarqaykutaj. Chay hermanasqa yachachiwarqayku imachus Diospa munaynin kasqanta. Paykunaqa De paraíso perdido a paraíso recobrado, nisqa librowan Bibliamanta yachachiwarqayku.a Chay librotataj copiakunayku karqa, llajtaykupi uj librolla kasqanrayku.

Hermanasqa yachachiwarqayku Génesis 3:15 versiculopi nisqan, Jesusnejta juntʼakunanta. Diostaj Jesusta jallpʼata kamachinanpaj churasqanta. Jinamanta repararqayku tukuy runas chayta yachananku kasqanta. Nikorqaykutaj runasman Diosmanta yachachimunaykutapuni (Mat. 24:14). Pisimanta pisitaj Bibliamanta yachakusqaykoqa, kausayniykuta cambianaykupaj yanapawarqayku.

PAKAYLLAPI BAUTIZAKORQAYKU

Uj kuti, llajtaykumanta uj hermano uj casamientoman invitariwarqayku. Chay fiestapi sutʼita repararqayku Jehovaj testigosnin mana kay mundomanta runas jinachu kasqankuta. Imajtinchus chay casamientopeqa, mana chʼajwas karqachu, ni ima machanaspis. Kay mundomanta casamientospirí, runasqa machanku, millaytataj parlanku.

Tantakuykunamanpis wakin kutis rillajtaj kayku. Tiempo allillan kajtin, tantakuykunataqa montepi ruwakoj. Hermanostaj yacharqanku policías qhawashallawasqaykuta. Chayrayku uj hermanota guardiata jina churaj kanku, policías jamojtinku chay rato willanawaykupaj. Chiri tiempopeqa, uj wasipi tantakoj kayku. Wakin kutistaj policiasqa taripaykuwaj kayku. Noqaykoqa julio de 1982 watapi bautizakorqayku, Chu nisqa mayupi. Chay diaqa, sumaj yuyayniyoj kanayku karqa, mana policiaswan japʼichikunaykupaj (Mat. 10:16). Bautismopaj discursota uyarinaykupajtaj, juchʼuy qotuspi monteman chayarqayku. Chantá Jehová Diosman takispa qallarerqayku.

DIOSMANTA ASTAWAN WILLARQAYKU

Kay 1987 watapi, uj hermano niwarqa uj runata Bibliamanta yacharichimunayta. Chay runaqa Balykchy nisqa llajtapi tiyakorqa. Chay llajtamanqa tawa horaspipuni trenpi chayarqayku. Chantá chay llajtaman ashkha kutista predicaj rerqayku. Repararqaykutaj ashkha runas Bibliamanta yachakuyta munasqankuta. Chayraykutaj chay lugarpi Diosmanta astawan predicarqayku.

Señoraywanqa sabadosta domingostawan, Balykchy llajtaman rejpuni kayku. Chay llajtapeqa predicaj kayku, tantakuykunatapis ruwaj kayku. Publicacionestaqa papa costalespi apaj kayku. Sapa killa publicaciones pisejpuni iskay costalespi apajtiykupis. Rispataj, kutimuspataj trenpipis predicallajpuni kayku.

Balykchy llajtaman chayasqaykumanta pusaj watanman, uj congregación rikhurerqa, 1995 watapi. Chay llajtaman predicaj rinaykupajqa qolqeta mayta gastaj kayku. Jinapis uj hermano qolqesitunwan yanapawajpuni kayku. Jinamanta repararqayku Jehová Diosqa, “may chhika bendicioneswan” juntʼachimushawasqaykuta, paypaj astawan llankʼasqaykurayku (Mal. 3:10). Arí, Jehová Diospajqa tukuy imapis atikullan.

WAWASNIYKUTA SUMAJTA UYWARQAYKU

Kay 1992 watapi, congregacionpi ancianota jina churawarqanku. Noqaqa kirguís ayllumanta primer anciano karqani. Llajtaykupeqa señoraywan astawan Jehová Diosta sirviyta aterqayku. Hermanosta yanapanaykupaj mayta kallpachakoj kayku. Chantapis ashkha escuelaspi, wakin jovenesman Bibliamanta yachacherqayku. Kunanqa chay jovenesmanta ujnenqa, Sucursalpi Kamachejkunamanta ujnin kashan. Iskay jovenestaj precursores especiales kanku. Kay 1990 watas chaynejta, ruso parlayllapi publicaciones karqa, tantakuykunapis chay parlayllapi ruwakoj. Chaywanpis pisimanta pisi kirguís ayllumanta hermanosqa astawan ashkhayasharqanku. Chayrayku discursosta kirguís parlayman tijrachej kani, astawan Bibliata entiendenankupaj.

Señoraywanqa kallpachakorqayku wawasniykuta tantakuykunaman, predicacionmanpis pusanaykupaj. Gulsayra imillitaykoqa 12 watitasniyoj kashajtin, runasman callepi predicajpuni. Wawasniykoqa Bibliaj wakin versiculosninta umankupi japʼinankupaj kallpachakojpuni kanku. Wawasniyku, allchhisniykupis congregacionpi imapipis yanapakushankupuni. Wawasniykumanta, allchhisniykumantawan 20 kausakushanku. Paykunamantataj 16 Jehová Diosta yupaychashanku, chayri tatasninkuwan tantakuykunaman rishanku.

AUTORIDADES WILLAJTA SAQEWAYKU

Kay 1950 watas chaynejta llajtaykupi predicaj hermanosqa, tʼukullachá qhepakunkuman karqa, manaña kay tiempopi autoridades qhatiykachashawasqaykuta rikuspa. Imajtinchus 1990 watamantapacha autoridadesqa, Diosmanta willajta, tantakojtapis saqellawaykuña.

Kay 1991 watapi, señoraywan uj jatun tantakuyman rerqayku Kazajistán suyuman, Almaty llajtaman. Kay 1993 watapitaj, suyuykupi primera vez uj jatun tantakuy ruwakorqa, Biskek llajtapi. Niraj jatun tantakuy ruwakushajtin, hermanosqa Spartak nisqa estadionta uj semanapipuni llimphucharqayku. Sumajta llimphuchasqaykurayku, chay estadionmanta encargadoqa manaña cobrawarqaykuchu.

Kay 1994 watapitaj, primera vez kirguís parlaypi uj publicación ruwakorqa. Kay tiempopi Biskek llajtapi kaj sucursalqa encargasqa kashan publicaciones kirguís parlayman tijrachikunanpaj. Kay 1998 watapitaj, Kirguistanmanta autoridadesqa, Jehovaj testigosninta uj religionta jina reconocerqanku. Kirguistanpeqa 5.000 hermanosña kayku, 83 congregaciones tiyan, 25 grupitustaj. Chay grupitusqa kay parlaykunapi tiyan: chinopi, inglespi, rusopi, señaspi, turcopi, uigurpi, uzbekopi ima. Hermanosqa imaymana kausayniyoj karqanku, tukuynejmantataj. Jinapis Jehová Diospa yanapaynillanwan payta ujchasqas yupaychashanku.

Noqatapis Jehová Dios kausayniyta cambianaypaj yanapawarqa. Noqaqa campopi wiñakorqani, phishqa watallatataj escuelaman rerqani. Chaywanpis Jehová Diosqa yanapawarqa, anciano jina payta sirvinaypaj. Yanapallawarqataj colegiota tukojkunaman, profesionalesman ima Bibliamanta yachachinaypaj. Arí, Jehová Diosqa tukuy imaymanamanta yanapawarqa. Tukuy imata kausayniypi rikusqayqa, Jehová Diosmanta runasman willanallaypajpuni yanapawan. Imajtinchus Diospajqa “tukuy imapis atikullan” (Mat. 19:26).