Leejkunaj tapuyninku

¿Imajtintaj Jehovaj testigosninpa publicacionesninta Internetpi waj direccionesman chayri redes sociales nisqaman mana churanachu kasqa?

Imajtinchus Internetman waj direccionesman churaspaqa, leyesta pʼakishasunman, waj problemastapis rikhurichisunman. Wakin runasqa, publicacionesninchejta mana pagaspalla uraqachiyta atisqankurayku, yuyanku Internetman, redes sociales nisqamanwan churayta atisqankuta. Jinapis chayta ni pipis ruwayta atinmanchu. Imajtinchus Internetpi jw.org nisqaj ura kantunpi, Kay Kamachiykunata Kasukuy nisqapi ñitʼispa, jinata nishan: “Kay jw.org nisqapi rikhurej dibujosta, publicacionesta, takiykunata, fotosta, videosta, jw chayri jw.org letrasta, waj imastawan ama Internetman, nitaj redes sociales nisqamanpis churaychu”, nispa. Imajtinchus chayta kasukunapuni kasqanta qhawarina.

Internetpi direccionesninchejpi rikhurej publicacionesninchejtaqa, leyesman jina Internetpi waj direccionesman mana churayta atikunchu. Jehovaj testigosninman churanakojkunaqa, publicacionesninchejta Internetpi waj direccionesman churanku, runasta, hermanostapis pantachinankupaj (Sal. 26:4; Pro. 22:5). Wakin runastaj publicacionesninchejta chayri jw.org nisqa letrasta propagandaspi, celularespaj programaspi, wakin cosaspi ima churanku vendenankupaj. Chaykunata ruwaytaj leyesman jina jucha. Chayrayku Diospa Llajtanta ñaupajman apajkunaqa, chaykunata ruwajkunata hermanospis kachunku demandankuman (Pro. 27:12). Imajtinchus sichus Diospa Llajtanta ñaupajman apajkuna, hermanosta waj runastapis publicacionesninchejta Internetman churanankuta saqenkuman chayqa, chayri jw.org nisqa letraswan imatapis vendenankuta saqenkuman chayqa, Diospa Llajtanman churanakojkunawan demandapi kajtinchej, juecesqa ichapis derechosninchejta mana valechiwasunmanchu.

Publicacionesninchejta jw.org nisqallamanta uraqachina. Jehová Diosqa ‘allin kamachi yuyayniyojllata’ churan Bibliamanta yachachinawanchejpaj (Mat. 24:45). Chay allin kamachitaj publicacionesta, videostawan, Internetpi kay direccionesllaman churan: www.jw.org nisqaman, tv.jw.org nisqaman, wol.jw.org nisqamanwan. Chantapis celularespaj, tabletaspajwan kay kinsa programasllata wakichin: JW Language^® nisqata, JW Library^® nisqata, JW Library Sign Language^® nisqatawan. Chaykunapeqa mana ima propagandatapis churakunchu, chantapis chaykunapi rikhurej publicacionesqa, Diospa Palabranman jinapuni ruwasqa kashan. Waj programaspi rikhurej publicacionesninchejtajrí, ichapis yapasqa kashanman llulla yachachiykunawan (Sal. 18:26; 19:8).

Chantapis sichus publicacionesninchejta Internetpi waj direccionesman churasunman chayqa, Jehová Diosta wasanchajkuna, llajtanman churanakojkuna imaqa, sajra imasta parlaspa pantachiwasunman. Wakin hermanosqa, Internetnejta waj runaswan parlaspa tukuy imasta ninakorqanku, chʼajwasta rikhurichispataj Jehová Diospa sutinta pisipaj qhawacherqanku. Chayrayku Internetnejta mana kasukojkunawan Jehová Diosmanta parlayqa, mana allinchu (2 Tim. 2:23-25; 1 Tim. 6:3-5). Wakin runasqa, llullakuspa Internetpi chayri redes sociales nisqapi Diospa Llajtanta Kamachejkunaj sutinpi chayri waj hermanospa sutinpi parlanku. Chaywanpis Diospa Llajtanta Kamachejkunaqa, Internetpi mana uj direccionniyojchu kanku, nitaj redes sociales nisqanejtapis parlankuchu.

Runasman Internetpi jw.org nisqaman yaykunankuta nispaqa, “sumaj willaykunata” willashanchej (Mat. 24:14). Internetpi publicacionesninchej, videosninchej, programasninchej imaqa allinchakushallanpuni. Imajtinchus chaykunaqa sumajta yanapawanchej predicanapaj. Chayrayku publicacionesninchejtaqa, correonejta runasman apachiyta atisunman. Runasman apachillasunmantaj jw.org nisqa direccionninchejta publicacionesninchejta uraqachikunankupaj. Diosmanta yachakuyta munaj runasman Internetpi kaj direccionninchejta apachispaqa, paykunata yanapashanchej “allin kamachi yuyayniyoj” wakichisqanta kasukunankupaj.