CRISTIANOSPA KAUSAYNINKUMANTA
Jehovaqa yuyasqaymantapis astawanraj bendeciwan
NOQAQA 12 de diciembre de 1939 watapi nacekorqani, Alemaniapi, Berlín llajtapi. Chaytaj karqa, Iskay kaj Guerra Mundial qallarisqanmanta pisi killasninman. Chay guerra tukukunanpajña kashajtin, Berlinman avionesmanta bombasta kachaykamorqanku. Wakin bombasqa calleyman urmamorqanku. Familiaywanqa pakakunapaj uj lugarman rerqayku. Chantá Erfurt llajtitaman ayqekorqayku, maypichus mamay nacekorqa, chayman.
1950 wata qayllapi, tatasniywan hermanitaywan ima Alemaniapi kashani.
Mamayqa Diosmanta mayta yachakuyta munarqa. Payqa yachayniyoj runaspa librosninkuta leej, ashkha iglesiasmantaj rerqa. Jinapis ni mayqen allinchu rijchʼarqa. Ajinapi 1948 watapi, iskay testigos wasiykuman jamorqanku. Mamayqa paykunata yaykuchimorqa, tukuy imatataj tapurerqa. Uj horata jina paykunawan parlariytawan, noqaman hermanitaymanwan niwarqayku: “Cheqan religionta tarini”, nispa. Pisi tiemponmantaj, kinsantiyku Erfurt llajtitapi tantakuykunaman riyta qallarerqayku.
Chantá 1950 watapi Berlín llajtaman kuterqayku, Berlín-Kreuzberg nisqa congregacionmantaj rerqayku. Chantá chay llajta ukhullapitaj waj lugarman tiyakoj riporqayku. Chayrayku Berlín-Tempelhof nisqa congregacionman rerqayku. Tiemponmantaj mamay bautizakorqa. Noqarí bautizakunaypaj niraj wakichisqachu kasqayta yuyarqani. Chaymanta willarisqaykichej.
MANCHALI KAYNIYTA ATIPANI
Manchali kasqayrayku, Jehová Diosta mana sirviyta atillarqanichu. Predicaj llojsispañapis, iskay watatapuni predicacionpi ni piwan parlarqanichu. Ajinapi Jehovata mana wasanchaspa sirvej hermanosta, hermanastawan rejserqani. Paykunaqa pruebaspi kaspa sinchʼita sayarqanku. Wakenqa nazispa carcelesninkuman, sinchʼita trabajanankupaj apasqa karqanku. Wakintajrí Alemania oriental nisqapi carcelespi wisqʼasqas karqanku. Wakin hermanosqa presochasqa kayta mana manchachikuspa, publicacionesta pakayllamanta Alemania orientalman aparqanku. Chay hermanospa ruwasqankoqa mayta tʼukuchiwarqa. Chayrayku sonqoypi nerqani: “Kay hermanosqa Jehová Diosrayku, hermanosraykutaj kausayninkuta wañuy pataman churarqanku, presochasqa kaytapis mana manchachikorqankuchu. Noqarí niña manchiskiri kanallaypaj kallpachakunay tiyan”, nispa.
Kay 1955 watapi uj jatun campaña runasman willanapaj ruwakorqa. Hermano Nathan Knorrqa Informadora nisqa hojitapi nerqa: “Diospa llajtanqa ni jaykʼaj kay jina campañata wakicherqachu”, nispa. Chantá nillarqataj: “Tukuy willajkuna predicasunchej chayqa, kay killapi ni jaykʼaj jina jallpʼantinpi predicakonqa”, nispa. Jinapunitaj karqa. Chay campañapi yanapakusqayrayku, manchali kayniyta atipayta qallarerqani. Pisi tiemponmantaj, Jehovaman qokuytawan, 1956 watapi tataywan hermanitaywan ima bautizakorqayku. Jinapis uj imata ruwanaypiwan piensarinay karqa.
Noqaqa precursor kayta, watasta may sumajpaj qhawarqani. Chaywanpis “precursor kayqa allinpunichu kanman” nispa yuyaj kani. Trabajoypeqa Alemaniamanta Africaj wakin lugaresninman granotawan jakʼutawan apachej kani. Wakin lugaresqa karqanku: Dar es-Salam, Elisabethville, Asmara ima. Chaypachaqa ni yuyallarqanipischu, chay lugarespi, Africamanta waj lugarespi ima Jehovata tiempo juntʼasqata sirvinayta.
Niraj precursor kashaspa, waj suyusman vendenaypaj, rantinaypajtaj estudiasajraj nerqani. Berlinpi estudiaytawantaj, sumajta yachakunaykama trabajasajraj nerqani. Chayrayku 1961 watapi, Hamburgo llajtapi trabajota japʼikorqani. Chay llajtaqa Alemaniaj mar kantunpi kashan. Trabajoy mayta gustawasqanrayku, precursor kaypi niña yuyarqanichu. Imatachus ruwanayta ajllanay karqa.
Jehová Diosqa paypaj llankʼayta ñaupajman churanaypaj, wakin hermanosnejta yanapawarqa. Payman mayta agradecekuni. Amigosneyqa kausayninkuwan yachachiwarqanku. Paykunamanta ujqa Erich Mundt sutikorqa. Paytaqa sinchʼita trabajachinankupaj uj carcelman jina apasqanku. Payqa Jehová Diospi atienekunaypaj mayta kallpachawarqa. Uj kuti niwarqa: “Wisqʼasqa kashajtiy, rikorqani yachaynillankupi atienekoj hermanosqa mana sinchʼitachu sayasqankuta. Jehová Diospi tukuy sonqonkuwan atienekojkunarí sinchʼita sayarqanku. Kunantaj paykunaqa Diospa llajtanpi kajkunata mayta yanapashanku”, nispa.
1963 watapi precursor kayta qallarishajtiy.
Hermano Martin Poetzingerqa hermanosta sapa kuti kallpachaj. Payqa aswan qhepaman Diospa Llajtanta Kamachejkunamanta ujnin karqa. Payqa niyta yachaj: “Mana manchachikoj kaspaqa, ima kajtinpis sinchʼita sayanchej”, nispa. Chay nisqanpi tʼukuriytawan, trabajoyta saqeporqani, junio de 1963 watapitaj precursor kayta qallarerqani. Chaymanta ni jaykʼaj pesachikunichu. Imaraykuchus Diospaj llankʼanaypaj uj punku jina kicharikuwarqa. Chayman yaykuspataj, may chhika bendicionesta japʼerqani (Efe. 3:20). Precursor kayta qallarisqaymanta iskay killasninman, precursor especial jina sirvinaypaj invitawarqanku. Chaypachaqa niraj uj mosoj llankʼaytapis maskʼasharqanichu. Aswan qhepamantaj, Galaad Escuelaman wajyariwarqanku, clase 44 nisqaman. Jehová Diosqa yuyasqaymantapis astawanraj bendeciwarqa.
GALAADPI SUMAJTA YACHAKORQANI
Galaadpeqa Diospaj llankʼayninchejpi mana saykʼuna kasqanta astawan yachakorqani. Nathan Knorr, Lyman Swingle hermanosqa, problemasta aguantanaykupaj kallpachawarqayku. Hermano Knorr tapuwarqayku: “Maymanchus kachasqa kankichej chaypi, ¿chay lugar chʼichi kasqantachu, khurus kasqantachu, runas pobres kasqankutachu qhawankichej? Chayrí, ¿sachʼastachu, tʼikastachu, runas kusisqa kasqankutachu astawan qhawankichej? Runasta munakunaykichejpaj kallpachakuychej”, nispa. Uj pacha, hermano Lyman Swingleqa imaraykuchus wakin misioneros mana aguantasqankumanta parlashawarqayku. Waqayninta mana ñitʼiykukuyta atisqanrayku, niña parlayta aterqachu, sonqonta tiyaykuchisqantawanraj parlawarqayku. Chayqa sonqoyta kuyurichiwarqa. Chayrayku sonqoypi nikorqani Cristotawan, hermanosnintawan ni jaykʼaj llakichinayta (Mat. 25:40).
Noqa, Claude, Heinrich ima Lubumbashi llajtapi misioneros kashajtiyku. Chayqa 1967 watapi, República del Congo nisqapitaj.
Galaadpi maymanchus rinaykuta willawasqaykutawan, kinsa betelitas maymanchus rinaykuta tapuwarqayku. Noqawan khuska yachakoj hermanos maymanchus rinankuta nejtinku, betelitasqa sapa lugarmanta allinta parlarqanku. Noqa Congo suyuman rinayta nejtiytaj, tukuy chʼinyarqanku. Niwarqankutaj: “Hermanóy, Jehová Dios qanwan kachun”, nispa. Chay tiempopi mayta uyarikorqa, Congopi runas maqanakushasqankuta, wañuchinakushasqankutataj. Jinapis Galaadpi imatachus yachakusqayta yuyarikorqani. Graduakusqaykutawan Congoman rinaypaj wakichikorqani. Septiembre de 1967 watapitaj, Heinrich Dehnbostel, Claude Lindsay hermanoswan khuska Congoman rerqayku.
MISIONEROSPAJ UJ SUMAJ LUGAR
Kinsasa llajtaman chayasqaykutawan, kinsa killasta francés parlayta yachakorqayku. Chantá Congo suyoj uranejninpi kaj llajtaman avionpi rerqayku. Chay llajtaqa ñaupajta Elisabethville sutikorqa, kunantaj Lubumbashi sutikun, Zambia suyoj tinkuyninpitaj kashan. Chay llajtaman chayaspa, misionerospa wasinkupi tiyakorqayku. Chay waseqa llajtaj chaupinpi karqa.
Lubumbashij ashkha lugaresninpi, niraj pipis predicasqachu. Chayrayku Diosmanta chay lugarespi willaspa, mayta kusikorqayku. Pisi tiemponman, ashkha runasmanña Bibliamanta yachachisharqayku, wakintataj niña atiendeyta aterqaykuchu. Chantapis gobiernopaj llankʼajkunaman, policiasmanpis predicallarqaykutaj. Paykunamanta ashkhas, Diospa Palabranta, predicasqaykuta ima jatunpaj qhawaj kanku. Chay lugarmanta runasqa suajili parlayta parlaj kanku. Chayrayku Claude Lindsay hermanowan, chay parlayta yachakorqayku. Pisi tiemponmantaj, iskayniyku suajili parlaymanta congregacionman kachasqa karqayku.
Chay lugarpi predicaspa mayta kusikorqayku, jinapis wakin llakiykunapi rikukullarqaykutaj. Wakin kutispi, machasqa soldados qhasimanta tumpawarqayku. Wakin kutistaj sajra policiaswan tinkorqayku. Uj kutipi hermanoswan misionerospaj wasipi tantasqa kashajtiyku, uj grupo policías yaykumuwarqayku. Chantá policiaman apawarqayku, chaypitaj tutakama pampapi chukuchiwarqayku, diez de la noche jinataraj kacharipuwarqayku.
1969 watapi superintendenteta jina churawarqanku. Chay llankʼayta ruwashajtiy, may karusta purej kani, tʼuru pampasninta, jatuchaj pastos chaupitataj. Africapeqa ashkha lugares ajina kanku. Uj pacha uj ranchitopi kashajtiy, camay urapi chillwisniyoj wallpa puñuykusqa. Qʼayantintaj chay wallpaqa niraj sutʼiyashajtin chʼajwayta qallarerqa. Kunankama chayta yuyarikullanipuni. Jinapis wakin chʼisisqa, hermanoswan khuska Bibliamanta parlarinaykupaj ninaj muyuyninpi tiyarikoj kayku. Chaytataj yuyarikullanipuni.
Chay tiempopi uj jatun problema rikhurerqa. Imaraykuchus Kitawalab grupomanta kajkuna, Jehovaj testigosnin kasqankuta nej kanku. Chay runasqa bautizakorqanku, wakintaj ancianosman tukorqanku. Paykunaqa “pakasqa chhankas” jina karqanku (Jud. 12). Jinapis hermanosta mana engañarqankuchu. Pisi tiemponmantaj, Jehová Diosqa congregacionesta llimphucharqa, astawan ashkha runastaj Diospa llajtanman yaykumorqanku.
1971 watapi, sucursalpi yanapakunaypaj Kinsasa llajtaman kachawarqanku. Ashkha imaspi yanapakorqani, congregacionesman cartasta apachispa, publicacionesta apachispa, Departamento de Servicio nisqapi ima. Betelpeqa uj jatun suyupi willakunanpaj yanapakunay karqa. Chay suyupi ñankunaqa mana allinchu kaj, luzpis, waj imaspis mana kajchu. Congregacionesman cartasta avionpi apachej kayku, may unaypitaj chayaj. Imaraykuchus avionpi riytawan, botespi rinan karqa. Chay botestaj yakupi wiñaj qhoras patapi semanasta qhepakoj. Chay problema, waj problemas ima kajtinpis, Diospaj llankʼayqa ruwakullarqapuni.
Hermanosqa pisi qolqellawan jatun tantakuykunata wakichej kanku. Chaytaj tʼukuchiwarqa. Paykunaqa termitas nisqa khurituspa wasinku patapi plataformata sayachej kanku, tʼotoraman rijchʼakoj plantaswantaj perqata ruwaj kanku. Chay plantasllawantaj asientosta ruwaj kanku. Plataformapi wasisituta sayachinankupajqa, bambú nisqamanta sayantasta ruwaj kanku. Chay plantallawantaj techonta, mesastapis canastata jina simpʼaspa ruwaj kanku. Clavos mana kasqanrayku, sachʼa qaraswan wataj kanku. Hermanosqa sumaj yuyayniyoj karqanku. Anchatapuni paykunata munakorqani. Waj lugarman sirvej ripuspa, paykunata mayta faltacharqani.
KENIAPI JEHOVATA SIRVINI
1974 watapi, Nairobi llajtapi kaj sucursalman kachawarqanku. Chaytaj Keniapi kashan. Chay sucursalqa chunka suyusta atiendej, ashkha ruwanastaj karqa. Wakin suyuspi gobiernosqa, hermanosninchejta Diosta yupaychajta mana saqejchu kanku. Chayrayku chay suyusmanta hermanosta waturinaypaj kachawarqanku. Astawanqa Etiopía suyuman rerqani. Chaypeqa hermanosninchej qhatiykachasqas karqanku, sinchʼi pruebaspitaj rikukorqanku. Ashkhas ñakʼarichisqas, presochasqas karqanku, wakintaj wañuchisqas karqanku. Jinapis Jehová Diosman, paykunapura ima kʼaskasqas kasqankurayku aguantarqanku.
1980 watapi Gail Mathesonwan casarakuspa, maytapuni kusikorqani. Payqa Canadá suyumanta, Galaadpitaj khuska karqayku. Paytaqa Boliviaman misionerata jina kacharqanku. 12 watasta cartanejta parlaytawan, Nueva York llajtapi tinkorqayku. Pisi tiemponmantaj Keniapi casarakorqayku. Señorayqa Jehová jinapuni piensan, kapusqallanwantaj kusisqa kakun. Chayrayku mayta agradecekuni, munakunitaj. Payqa kunankama tukuy imapi noqawanpuni.
1986 watapi, congregacionesta waturispa yanapakorqani, chay tiempollapitaj sucursalta kamachejkunamanta ujnin karqani. Señoraywan khuska ashkha congregacionesta visitarqayku. Chay congregacionesqa waj suyuspi karqa, chaykunatataj Keniapi kaj sucursal atiendej.
1992 watapi, Asmara llajtapi uj jatun tantakuypi discursota qoshajtiy.
Eritrea suyupi gobierno Jehovaj testigosninta niraj prohibishajtin, Asmara llajtapi uj jatun tantakuy ruwakorqa. Chayqa 1992 watapi karqa, kunankamataj yuyarikullanipuni. Chaypacha trigo jallchʼana wasillata tarerqayku. Chay wasejtataj, jawanraj aswan allin karqa. Jinapis tantakuy diapajqa, hermanosqa chay lugarta kʼachituta wakichisqanku. Jehová Diosta yupaychanapaj jinapuni karqa. Ashkha familias kʼachitu telasta apaspa, imaschus mana allinchu rikukusqanta qhatasqanku. Chay jatun tantakuypi kusiywan yachakorqayku, 1.279 runastaj tantakorqayku.
Congregacionesta waturishajtiyku, sapa semana uj jina lugarpi alojakoj kayku. Wakin kutis, uj may sumaj wasipi mar kantupi alojakoj kayku. Waj kutispitaj, qhoyapi llankʼajkunaj ranchonkupi calaminamanta ruwasqa wasispi alojakoj kayku. Chay wasimantataj 100 metrosta jina bañoman rina kaj. Imaymana lugarespi kaspapis, astawan yuyarikuyku precursoreswan, waj hermanoswan ima kusisqa predicasqaykumanta. Chayrayku waj lugarman sirvinaykupaj kachasqa kajtiyku, ashkha amigosniykuta saqerqayku, maytataj faltacharqayku.
ETIOPIAPI BENDICIONESTA JAPʼIYKU
1987 watamanta 1992 watakama, ashkha suyuspi gobiernos Jehovaj testigosnin religión jina kanankuta saqerqanku. Chay suyustaqa Keniapi kaj sucursal atiendej. Wakin suyuspeqa, sucursalesta kicharerqanku, wakinpitaj oficinasllata. 1993 watapi, Etiopía suyuman kachasqa karqayku, Adís Abeba llajtapi kaj oficinapi sirvinaykupaj. Etiopiamanta hermanosqa, ashkha watasta Jehovata pakayllapi yupaycharqanku. Kunantaj gobiernoqa religión jina kanankuta saqenña.
1996 watapi Etiopía suyoj camposninpi superintendente kashajtiy.
Jehová Diosqa Etiopía suyupi predicacionta mayta bendecin. Ashkha hermanos precursores jina llankʼashanku. Kay 2012 watamantapacha, sapa chunka hermanosmanta iskay precursores jina llankʼashanku. Chantapis Diospa llajtanpi escuelasqa ashkha hermanosta wakichin, kunankamataj 120 kuraj salones ruwakun. Chantá 2004 watapi, betelitasqa mosoj Betel wasiman riporqanku. Chayllapitaj uj Jatun Tantakuna Wasi ruwakorqa. Chaytaj tukuy hermanospaj sumaj karqa.
Etiopiapeqa ashkha amigosniyoj karqayku. Paykunaqa noqaykuwan may kʼachas karqanku, maytapuni paykunata munakorqayku. Onqoykusqaykurayku, Europa centralpi sucursalman kachasqa karqayku. Chay sucursalmanta hermanosqa, may munakuywan qhawawayku. Jinapis Etiopiamanta hermanosta faltachallaykupuni.
JEHOVÁ DIOSLLA WIÑACHIN
Jehová Diosqa Gobiernonmanta willakusqanta mayta wiñachin, chaytataj rikuyku (1 Cor. 3:6, 9). Congo suyuman cobreta maskʼaj jamoj ruandesesman predicayta qallarishajtiy, Ruanda suyupi ni uj hermanollapis karqachu. Kunantajrí chaypi 30 milmanta astawan hermanosña tiyan. 1967 watapaj, Congopeqa 6 mil hermanoslla karqanku. Kunantajrí 230 mil hermanosña tiyan. Kay 2018 watapitaj, uj millonmanta astawan runas Jesuspa Wañuyninta Yuyarinapaj tantakuyman jamorqanku. Kenia sucursal atiendej chay suyuspeqa, 100 mil hermanosmanta astawanña kanku.
Jehovaqa paypaj tiempo juntʼasqata llankʼanaypaj, hermanosnejta yanapawarqa. Chaymantapacha 50 watasña pasajtinpis, tumpa manchalillapuni kani. Jinapis Jehovapi atienekuyta yachakorqani. Africapi sirvisqayqa, pacienciayoj kanaypaj, pisi imasllawan kausakunaypaj ima yanapawarqa. Chay lugarmanta hermanosqa, wajyarikunkupuni, problemasta aguantanku, Jehovapitaj atienekunku. Señoraywanqa paykunamanta mayta yachakuyku. Jehová Diosqa yuyasqaymantapis astawanraj bendeciwan (Sal. 37:4).
a Aswan qhepaman Reinomanta Willayninchej nisqa karqa. Kunantaj cuentanmanta Cristiano Kausayninchej folleto kashan.
b Kitawala palabraqa suajili parlaymanta jamun, niytataj munan “apaykachay, pusay chayri kamachiy”. Chay grupomanta kajkunaqa, Bélgica suyoj kamachiyninmanta librakuyta munarqanku. Paykunaqa publicacionesninchejta apaykachaj kanku, estudiaj kanku, runamanpis jaywaj kanku. Chantapis Bibliaj nisqanta qʼewij kanku, pantasqa yuyayninkuta valechinankupaj, costumbresta ruwanankupaj, millay kausayniyoj kanankupaj ima.