¿Yacharqankichu?

¿Imatataj mayordomos unay ruwaj kanku?

ÑAUPA tiempopi uj mayordomoqa, waj runaj kapuyninmanta chayri wasinpi kajkunamanta encargakoj. “Mayordomopaj” hebreo parlaypi, griego parlaypiwan oqharikusqan palabraqa, niyta munan encargado chayri uj wasipi imaschus kasqanmanta cuentayoj.

Joseqa Jacobpa ujnin wawan karqa. Egiptopi esclavo kashajtin, payqa patronninpa wasinpi mayordomo karqa. Patronnenqa “tukuy imasninta Josejpa makisninman saqerqa” (Gén. 39:2-6). Unayninmantaj Joseqa Egiptopi may atiyniyojman tukorqa. Chantá paypis wasinpi uj mayordomota churallarqataj (Gén. 44:4, 5).

Jesuspa tiemponpi, patronesqa llajtaspi tiyakoj kanku, chajrasninkutaj karuspi kaj. Chayrayku uj mayordomota churaj kanku, peonesninkuta llankʼachinankupaj.

¿Imayna runatataj mayordomopaj churaj kanku? Ñaupa cristianospa tiemponkupi, Columela nisqa runa kausarqa. Payqa romano karqa, qhelqajtaj. Payqa imayna runachus mayordomo chayri “kuraj kamachi” kananmanta parlarqa. Pay nerqa: “Mayordomoqa llankʼayninta sumajta ruwayta yachanan tiyan”, nispa. Chantá nerqa: “Patronninpa peonesninkuta sumajta llankʼachinan tiyan, nitaj sajrachu paykunawan kanan tiyan”, nispa. Chantá nillarqataj: “Astawanpis mayordomoqa, mana yuyananchu tiyan tukuy imata yachasqantaña, mosoj imastataj yachakuyta munanan tiyan”, nispa.

Diospa Palabranqa cristianospa ruwanasninkuta, mayordomoj llankʼayninwan kikinchan. Apóstol Pedro cristianosman nerqa: “Sapa ujniykichej ruwanapaj atiyta Diosmanta japʼerqankichej. Chay japʼisqaykichejman jina, purajmanta sirvinakuychej. Chaytataj ruwaychej Diospa jatun khuyakuyninmanta sumaj mayordomos jina”, nispa (1 Ped. 4:10).

Lucas 16:1-8 versiculospi Jesuspa ujnin kikinchaynin rikhurin. Chay kikinchaypi Jesusqa uj mayordomomanta parlarqa. Chantapis Rey jina kutimunan tiempomanta parlashaspa, yachachisqasninman nerqa ‘allin kamachi yuyayniyojta’ chayri ‘allin mayordomota’ churananta. Chay allin mayordomoqa, qhepa pʼunchaykunapi cristianosman cheqa yachachiyta mikhunata jina jaywanan karqa. Chaytataj mana faltachispa ruwanan karqa (Mat. 24:45-47; Luc. 12:42). Allin mayordomoqa, creeyninchejta kallpachananpaj librosta, revistasta, waj imastawan wakichin. Chaymantataj may agradecesqas kashanchej. Waj runaspis chaywan yanapachikuyta atillankutaj.