Llimphu kayqa Diosta jatunchan
1. ¿Imaynatá Israelitakuna purinanku karqa Diosta yupaychanankupaq?
1 Moisespa Leyninpiqa, achkha kamachiykunata qillqakun, israelitakuna tukuy imapi llimphu purinankupaq. Kay kamachiykunaqa, paykunata tukuy chʼichi kaqmanta tʼaqakunankupaq yanaparqa (Lev. 11:35, 36; 15:1-11; Isa. 52:11). Llimphu purisqankuqa Diosta jatuncharqa, sanolla kanankupaqpis yanaparqa.
2. ¿Imaynatá Diospa kamachisqanta jatunpaq qhawasqanchikta rikuchisunman?
2 Kunan pʼunchaypipis, Diosta kasukuqkunaqa tukuy imapi llimphu kasqanchikmanta riqsichikunchik. Llaqtajina, sutʼita kayta rikuchinchik, chaywanpis, ¿kikintachu sapa jukninchikmanta nisunman? Allinta pʼachallikuptinchik, llimphu kaptinchik ima, Jehovap kamachisqanta jatunpaq qhawasqanchikta rikuchisunchik.
3. ¿Imaynatá wasinchikpi llimphu kasunman, imaraykutaq chayta ruwananchik tiyan?
3 ¿Imata wasinchikmanta nisunman? ¿Reinomanta willasqanchikta pisipaqchu qhawachin? ¿Musuq paraisomanta tukuy sunquwan parlayta atisunmanchu, wasinchik mana sumaq kʼuchunchasqa, llimphuchasqa ima kaptin? Wasinchik chʼichimanta qʼapachkaptin, mana kʼuchunchaspa rikukuptin, ¿musuq pachapi kawsananchikpaq wakichikuchkasqanchikta nisunmanchu? (od-S págs. 137-139.)
4. a) ¿Imaynataq kananku tiyan autonchik, maletinchik ima? b) Cristianosjina, ¿imaynatá ukhunchik kanan tiyan?
4 ¿Autoyuq kaptinchikqa? ¿Llimphuchu kachkan ukhunpi jawanpi ima, Diosta jatunchanapaqjina? ¿Imatá nisunman carteranchikmanta, malentinchikmanta, pʼachanchikmanta ima? ¿Llimphuchu kachkanku, chayri pʼinqakunapaqjinachu? ¿Allinta pʼachallikunchikchu? Cristianoqa ukhunta, pʼachanta ima llimphuta apayqachan, sapa kuti mayllakuspa, tʼaqsakuspa ima (w89-S 1/6, 16-19).
5. ¿Imaraykutaq tukuy imapi llimphu kananchik tiyan qutuchakuypi imapipis llamkʼananchikpaq?
5 ¿Imatá ruwasunman juk hermano chʼichilla puriptinri, wasinta mana kʼuchunchasqa kasqanrayku qutuchakuymanta mana allinta parlakuptin? Machituña, chayri unqusqa kasqanrayku ichapis wasinta kʼuchunchananpaq, pʼachasninta tʼaqsananpaq ima, yanaparisunman. Wak hermanotaq ichapis chʼichilla purinman mana qhawakusqanrayku; ichapis Bibliawan yuyaychaptinchikqa allinchakunman. Mana allinchakuspa chʼichilla puriqkunaqa, qutuchakuypi mana imapipis llamkʼayta atinkumanchu. Chaywanpis ancianosqa, ni pita ninqankuchu, munasqankumanjina, imaynatachus pʼachallikunanta.
6. ¿Imaraykutaq wakinkuna Tantakuy Wasinchikmanta mana allintachu parlankuman?
6 Bibliamanta yachayta munaqkunata Tantakuy Wasiman waqyarinchik, astawan yachakunankupaq. Tantakuy Wasi kʼachitu, llimphu ima kasqanrayku, runa jamunanta munanchik. Chaywanpis llimpu kananpaq yanapananchik tiyan. Tantukuy Wasiykichikta qhawaychik: sillasnin, pison, pirqan ima, ¿llimphuchu kachkanku? ¿Bañosta sapa kutichu llimphuchankichik? Pison chʼichi kasqanta, pirqan mana allin pintasqa kasqanta qhawakullaptinchikqa, allillan kasqanta yuyasunchik. Jinata saqiptinchikqa, pikunachus juk kutillaraq tantakuyman jamuchkanku, Tantakuy Wasinchikmanta mana allintachu parlanqanku. Chayrayku yanapananchikpuni tiyan Tantakuy Wasinchik kʼachitu, llimphu ima kanallanpaqpuni.
7. ¿Imaraykutaq tukuy imapi llimphu kayta munanchikri?
7 Allinta pʼachallikuspa, tukuy imapi llimphu purispa, wasinchikta, autonchikta, Tantakuy Wasinchikta ima llimphu saqiptinchikqa, mana parlaspalla Diosta jatunchasunchik. Ajinallatapuni puriptinchikqa, mana pitapis miskʼaychisunchikchu, chayri urmachisunchikchu, manaqa, Diosta yupaychayninchik llimphu kasqanta rikuchisunchik (1 Cor. 10:31, 32; Sant. 1:27).