Jatun punku kicharikun Diospaq astawan llamkʼananchikpaq
1. ¿Ima sumaq jatun punkutaq astawan Diospa munayninta ruwanapaq kicharikun?
1 Apóstol Pablopaq juk jatun punkujina kicharikurqa, Diospaq astawan llamkʼananpaq. May chhika runa churanakuchkaptinkupis, payqa may kusiywan Diospa Reinonmanta willayta qallarirqa (1 Cor. 16:9). Kunanqa, tukuy Jallpʼapi chay jatun punkuniqta Diospa munayninta ruwanapaq 642.000 Jehovamanta sutʼinchaqkuna precursoresjina llamkʼayta qallarinku.
2. ¿Imaraykutaq tiemponchikta qhawarikuna tiyan?
2 Mana kikillantapunichu kawsanchik. Ichapis kunanqa, Diospaq achkhata llamkʼayta munaspapis, mana atinchikchu, chaywanpis chayqa tikrakunman. Chayrayku tiempowan kananchikta suyanamantaqa, allinta qhawarikuna tiemponchikta ichapis astawan Diospaq llamkʼayta atisunman (Ecl. 11:4). ¿Waynachu chayri sipaschu kanki? ¿Yachay wasipi yachaqayta tukuchkankiñachu? Tata kaptiyki, ¿wawasniyki yachaywasiman yaykunqankuñachu? ¿Llamkʼayniykimanta jubilakuchkankiñachu? Jinata kawsayninchik tikrakuptinqa, ichapis astawan tiempochakusunman precursorjina llamkʼanapaq. Juk hermananchik ñawpaqta unqusqa kachkarqa, chaywanpis, 89 watayuqña precursorajina llamkʼayta qallarirqa. ¿Imaraykutaq? Juk watataña mana unquspa kasqanrayku, precursorajina llamkʼayta munarqa.
3. ¿Imata ruwanku wakinkuna precursores kanankupaq?
3 Apóstol Pabloqa Corintomanta hermanosta waturikuq riyta munarqa. Chaywanpis Diosmanta willamunanrayku chay munasqanta tikrachin. Kunanpis hermanosninchik munayninkuta, kawsayninkuta ima tikrachinku, wakinkunaqa mikhunallapaq, kawsakunallapaq, kuskan pʼunchayllata llamkʼanku, Jinamanta tiempochakunku precursoresjina llamkʼanankupaq. Chayta ruwaspataq mayta kusikunku (1 Tim. 6:6-8). Wakin qhariwarmikunaqa parlanku qusap llamkʼaynillanwan kawsanankupaq, jinamanta warmiqa precursorajina llamkʼananpaq.
4. 70 horasta juntʼanamanta iskaychakuptinchik, ¿imata ruwasunman?
4 Wakinkuna precursor kaytaqa mana yuyallankupischu, imaraykuchus 70 horasta mana juntʼayta atikullanchu, nispa ninku. Chayqa mana jinachu, imaraykuchus 70 horas juntʼanapaqqa, sapa pʼunchay iskay hora kuraqniyuqllata ruwana tiyan. Chaywanpis iskaychasqapuni kaptinchik, ichapis juk killata, manaqa iskay killata precursor auxiliarjina llamkʼasunman, mana 50 horasta ruwanallanchikpaqchu manaqa 70 horasman chayananchikpaq. Jinamanta precursoresjina kusiyta tarisunchik (Sal. 34:8). Precursoreswan parlarinallataq ichapis ñuqanchikjina paykunapis iskaychasqa kachkarqanku (Pro. 15:22). Jehovap yanapayninta mañakunachik tiyan astawan paypaq llamkʼananchikpaq (1 Juan 5:14).
5. ¿Imaraykutaq precursorjina llamkʼay may sumaq?
5 Precursor kayta munayqa may sumaq. Precursor regularqa achkha tʼinkakunata Diosmanta japʼikun. Payqa may kusiyta taripan wakkunaman yanapaspa (Hech. 20:35). Astawan allinta Bibliata apaykachayta yachan (2 Tim. 2:15). Astawan Diospa yanapayninta kawsayninpi rikun (Hech.11:21; Fili. 4:11-12). Chantapis kʼacha kaykunata puquchin, astawan Diosman qayllaykunanpaq (Sant. 4:8). ¿Chay punkuniqta Diospaq astawan ruwananchikpaq yaykusunmanchu?