Tapuykunapaq

◼ ¿Imapitaq urmasunman mana riqsisqaswan Internetpi parlaspa?

Internetpiqa wakin paginakunapi runawan parlayta, riqsinakuyta ima atinchik. Chaypiqa wakinkunapi fotosta, sutinchikta, wasinchikta, tukuy imatawan, churayta atikun. Wak runakuna chayta qhawayta atinku, ñuqanchikwan riqsinakunankupaq. Kaytaqa may chhika waynakuna, sipaskuna ruwanku; qutuchakuymanta wakin waynakunaqa, kay nisqanchikta ruwallankutaq Jehovamanta sutʼinchaqkunawan parlasqankuta yuyaspa.

Internetpi pillatapis riqsiptinchik mana sutʼimanta yachasunmanchu pichus kasqanta, imatachus munasqanta, chayri imaynachus Diospa ñawpaqinpi kasqanta (Sal. 26:4). Chaypiqa pipis Jehovamanta sutʼinchaq kasqanta niptinpis, mana Jehovapi creeq runa, qutuchakuymanta qharqusqa, chayri Diosta wasanchaq runa kanman (Gál. 2:4). May chhika khuchi runaqa, imillitaswan, yuqallituswan mana munachkaptinku puñuykunku, chay runakunataq kay Internetpi, paykunata kaskʼanku.

Ichapis yachanchik piwanchus parlachkanchik, qutuchakuypitaq allin kasqantapis. Chaywanpis Internetpi kachkaspa, parlayninchik mana allin kaqman tikrakunman; imaraykuchus Internetpiqa mana pʼinqakuspa imatapis runa parlallan. Astawanpis wakinkunaqa: “Mana tataypis, nitaq ancianopis ruwasqayta rikuchkanchu”, nispa yuyanku. Llakikunapaq, may chhika waynakuna, sipaskuna chayta yuyaspa, millay parlayman urmanku (Efe. 5:3, 4; Col. 3:8). Wakinkunataq mana pʼachayuq fotosta urqhuchikuspa chayman churanku, millayta sutichanakunku, chayri khuchichakuykunata rikunapaq videosta churanku.

Chayrayku tatamamaqa, imatachus wawasninku computadorapi ruwasqankuta qhawananku tiyan (Pro. 29:15). ¿Juk mana riqsisqa runata wasiykiman yaykuchillawaqchu? ¿Wawasniykiwan qhipakunanta saqiwaqchu? Mana, ¿ichari? Kikillantataq Internetpi jarkʼakuna tiyan. Waynakunapis, machu runapis, Internetpi saqra runamanta jarkʼakuna tiyan, Jehovamanta sutʼinchaq kasqanta niptinpis (Pro. 22:3).