Jehová tʼinkawasqanchikta ama pisipaq qhawanachu
1 Runa kasqanmantapacha, Jehovaqa chiqa sunqu kaqkunaman; qharista, warmista, qhapaq runasta, waqcha runasta machkha watayuqpis kachunku, imaymanamanta tʼinkarqa (Luc. 1:41, 42; Hech. 7:46; Fili. 1:29). ¿Kikillantataqchu kunan pʼunchaypi ruwan? Jina kaptinqa, ¿imaynamanta Jehová tʼinkawanchikri?
2 Ima tʼinkakunatataq quwanchik. Qallarinapaqqa, Jehová yachachiyninta riqsichiwanchik (Mat. 13:11, 15). Astawanpis Diosqa, tantakuykunapi Payta yupaychananchikta saqiwanchik (Sal. 35:18). Kaytataq ruwanchik tapuykunaman kutichiptinchik, chayri imapipis qutuchakuypi yanapakuptinchik. Tukuy sunquwan kaykunata ruwaptinchikqa, Jehovap tʼinkanta jatunpaq qhawasqanchikta rikuchisunchik. Tantakuna Wasita limphuchana kaptin, ¿yanapakunchikchu? Kaypis Diospa tʼinkan.
3 Astawanpis, achkha runaqa mana yachankuchu Diosmanta mañakusqankuta Pay uyarinchus manachus. Ñuqanchikri, tukuymanta aswan patapi kaq Dios uyariwasqanchikta yachanchik (Pro. 15:29). Jehovapuni kamachisninpa mañakusqankuta uyarin (1 Ped. 3:12). Jehovaqa mana yupanchu machkha kutitachus mañakusqanchikta. Chayrayku Jehovamanta “sapa pʼunchay” mañakuyqa, may sumaq ñuqanchikpaq (Efe. 6:18).
4 ‘Dioswan khuska trabajanchik’: ‘Dioswan khuska’ Reinonmanta willaspa trabajayqa, ima trabajomantapis aswan sumaq (1 Cor. 3:9). Kayta ruwaspa mayta kallpachakunchik, kusiytapis tarinchik (Juan 4:34). Jehovaqa mana runallawanchu Reinonmanta willachinman karqa, chaywanpis, payqa munakuyninpi ñuqanchikman chay llamkʼayta quwanchik (Luc. 19:39, 40). Jehovaqa chay llamkʼayta mana tukuy runamanchu qun, imaptinchus chayta ruwanapaqqa Biblia nisqanmanjina kawsana tiyan (Isa. 52:11). Chayrayku, ¿jatunpaqchu kay tʼinkata qhawanchik? ¿Kawsayninchikpi ñawpaqtachu churanchik sapa semana willaq rinanchikpaq?
5 Jehová Dios kay tʼinkakunawan kawsayninchikta qhapaqyachin (Pro. 10:22). ¡Mana jaykʼaq pisipaq qhawanachu! Astawanpis jatunpaq qhawasqanchikta rikuchina tiyan. Jinamanta Jehovata kusichisunchik pimantachus “tukuy ima allin kaj, kʼacha kaj imaqa” jamun (Sant. 1:17).