Astawan willamunallapuni
1 Apóstol Pabloqa, cristianosta Diospa ñanninpi purinankupaq yuyaychachkaptin, nirqa: “Astawan ajinallatapuni kawsanaykichejta”, nispa (1 Tes. 4:1). ¿Imatá niyta munarqa? Diospaq astawan willayta maskʼananchikta niyta munarqa, jinamanta Diospa ‘ruwayninchikta juntʼananchikpaq’ (2 Tim. 4:5).
2 Allin sunquwan. Diospaq sumaqta llamkʼayta munasqanchikqa, astawan Paypaq ruwananchikpaq, ñawpaqman rinanchikpaq, allinta runaman willananchikpaq ima, tanqawasunchik. Allin sunquwan sapa pʼunchay Bibliata ñawirisqanchikpi tʼukuriptinchikqa, mana saqispa runaman willamuptinchikqa, ñawpaqman rinallanchikpaqpuni yanapawasun (Sal. 1:1, 2; Fili. 4:6; Heb. 10:24, 25).
3 Chantapis, jatun sunquyuq runa, wakpa allinninta maskʼaq runa, kananchik tiyan. Chaypaqqa Diospa yanapayninta maskʼananchik tiyan, Jesús kawsasqanmanjina kawsananchikpaq (Mat. 20:28). Jesusqa, jatun sunquwan tukuy runata yanaparqa (Hech. 20:35). Pay kikin ruwananchikpaqqa, runap allinninta maskʼananchik tiyan, imaymanamanta Diospa Reinonmanta willanallanchiktaq tiyan (Isa. 6:8).
4 Tatasninkumanta yachakunku. Wawaspis Diospa astawan ruwayta munankuman, chaymanjina yachachiptinchik. Wawasqa, tatasninku Diospaq llamkʼasqankuta, astawan Paypaq ruwayta munasqankuta ima, allinta reparanku. Juk hermano chayta ruwarqa wawallaraq kachkaspa, abuelonta qutuchakuypi yanapachkaptin. Abuelonta Diospaq kusiywan llamkʼasqanta rikuspaqa, astawan hermanosta yanapananpaq kallpachakurqa. Kunantaq siervo ministerialjina qutuchakuypi llamkʼachkan.
5 Qutuchakuypi qharikuna. “[Qutuchakuypi] kuraj qhawaj kayta munajqa, allin ruwanatapuni ruwayta munan.” (1 Tim. 3:1.) Kay Bibliap pʼitinqa, hermanosta ñawpaqman rinankuta kamachichkan, siervos ministeriales, ancianos ima kanankupaq. Chaypaqqa mana achkha yachayniyuqpunichu kananku tiyan, manaqa Diospa Reinonta ñawpaqmanpuni churananku tiyan, kʼajaywantaq runaman willamunanku tiyan (Mat. 6:33; 2 Tim. 4:5). Astawanpis, Bibliap nisqanmanjina kawsananku tiyan.
6 Ñuqanchikpis yanapana. Kunan pʼunchayqa, astawan Diosmanta yachakuyta munaqkunata tantakuchkan (Isa. 60:22). Chayrayku, Jesuspa qhipanta puriqkunaqa astawan Reinomanta willamunallankupuni tiyan. 2006 watapiqa, 248.327 yachakuqkuna bautizakunku: ¡suqta pachak pusaq chunka yachakuqkuna sapa pʼunchay bautizakunku! Chayrayku, tukuyninchikqa imaymanamanta runaman astawan willamunallanchikpuni kachun.