Jesús ruwasqanta ruwanachik
1. ¿Imatá runakuna Jesuspa parlasqanmanta, ruwasqanmanta ima, yachakunku?
1 Runaman yachachichkaspaqa, imaynatachus purisqanchikta runa qhawasqanta yuyarinanchik tiyan. Pikunachus Jesuswan purirqanku, paypa parlasqanmanta, ruwasqanmanta ima, sumaqta yachakunku. Imaynatachus iñiyninta rikuchisqanta, runata munakusqanta, Tatanpa sutinta llimphuchayta munasqanta, Tatanpa munayninta kʼajaywan ruwasqanta ima, sutʼita rikurqanku (1 Ped. 2:21).
2. Runaman willamuchkaspa, ¿imata hermanosninchik ñuqanchikmanta yachakunkuman?
2 Hermanoswan willarispa. Ñuqanchikpis, Jesusjina, ruwayninchikwan, parlayninchikwan ima, hermanosta yachachisunman. Pikunachus willaq lluqsiyta qallarichkanku, kʼajaywan willasqanchikmanta yachakunkuman. Kusisqas, runata munakuspa willasqanchikta rikuptinkuqa, kikinta willamuyta munanqanku. Bibliata sumaqta apaykachasqanchikta, Bibliamanta astawan yachakuyta munaqkunaman kutisqanchikta, runaman wasinkupi Bibliamanta yachachisqanchikta ima, rikullaptinkutaq, ajinata paykunapis ruwanankupaq kallpachakunqanku.
3. Jesusjina yachachiptinchik, ¿imata yachakuqkuna ñuqanchikmanta yachakunkuman, imaynatá chay yanapanman?
3 Bibliamanta runaman yachachichkaspa. Bibliamanta yachakuqkunaqa, imaynatachus purisqanchikta qhawachkanku. Ichapis, Bibliamanta yachananpaq wakichikunanta, Bibliap pʼitinta maskʼananta, tapuykunapaq kutichiykunata maskʼananta ima, may sumaq kasqanta nisunman. Chaywanpis, chay nisqanchikta mana ruwaptinchikqa, yachakuqkunaqa sutʼita chayta reparanqanku (Rom. 2:21). Astawanpis, mana qhipakuspa horanpi wasinkuman chayaptinchikqa, paykunaqa Bibliamanta yachakuyta mana pisipaq qhawanqankuchu. Jinamantataq jatun iñiyniyuq kasqanchikta, willayninchikta jatunpaq qhawasqanchikta rikunqanku. Jesusjina yachachiptinchikqa, aswan qhipaman chay yachakuqkunapis Jesusjina ruwanqanku.
4. Tantakuyninchikpi kachkaspa, ¿imaynatá jamuqkunaman yachachinchikri?
4 Tantakuyninchikpi. Tantakuyninchikpiqa, tukuyninchik jamuqkunata yachachisunman, ¿imaynatá? Bibliamanta yachayta munaqkunaqa, tantakuyman riyta qallarichkaspa, hermanosmanta achkhata yachakunkuman: mayta munanakusqankuta, jukchasqa kasqankuta, sumaqta pʼachallikusqankuta ima, rikuspa (Sal. 133:1). Chantapis mana saqispa tantakuykunaman risqanchikta, tapuykunata kutichispa iñiyninchikta rikuchisqanchikta ima, rikullanqankutaq. Juk runaqa, tantakuypi tʼukulla qhipakurqa, juk imillita jukllapi Bibliap pʼitinta tarisqanmanta. Chaytaq Bibliamanta yachayta qallarinanpaq yanaparqa.
5. ¿Imaraykutaq kawsayninchikta, yachachisqanchikta ima, allinta qhawananchik tiyan?
5 Bibliaqa, wakkunap allin ruwasqankuta kikinta ruwananchikta kamachiwanchik (Fili. 3:17; Heb. 13:7). Chayrayku, Jesuspa ruwasqanta ruwaptinchikqa, wakkunaqa chayta rikuspa ñuqanchikjina ruwayta munanqanku. Jina kaptinqa, tukuy sunquwan kay 1 Timoteo 4:16 nisqanta kasukunanchik tiyan: “Kawsayniykita allinta qhawakuy jinallataj imatachus yachachisqaykitapis”.