Ama manchachikuychu
1. ¿Imaynatá tukuypaq allin kaqta maskʼanchik?
1 Jehovamanta sutʼinchaqkunaqa, ‘ruwanapaqjina kachkaptinqa’ tukuypaq allin kaqta maskʼanchik, chayrayku Diospa Reinonmanta tukuy runaman willamunchik (Pro. 3:27). Ima tʼinkastachus Diospa Reinon apamunqa, runaqa yachanan tiyan. Ichapis wasimanta wasi revistasta runaman saqispa, mayniqpipis purichkaspa runaman willallankipuni; chaywanpis, mana chayllatachu ruwanayki tiyan: Bibliamanta juk runallamanpis yachachinayki tiyan. ¿Kayta ruwawaqchu?
2. ¿Imaraykutaq wakinkuna runaman mana yachachimunkuchu?
2 Wakin hermanosqa, runaman yachachiyta manchachikunku: mana sumaq yachachiqjina qhawakusqankurayku, chayri yachachinapaq mana tiempoyuq kanankumanta manchachikusqankurayku. Kunanqa ukhunchasunchik imaynamantachus chay manchayninchikta atipasunman, juk runallamanpis Bibliamanta yachachinanchikpaq (Mat. 28:19, 20; Hech. 20:20).
3. ¿Imaynatá sumaq yachachiqman tukusunman?
3 Mana atinichu. Ichapis mana yachay wasiman risqaykirayku, chayri mana sumaq yachachiqjina qhawakusqaykirayku, runaman Bibliamanta mana yachachimunkichu. Chaywanpis, Jesuspa discipulosninmanta yuyarikuy, paykunaqa “mana yachakuyniyoj runaslla” karqanku. Jinapis, chiqa kaqmanta yachachiqkuna karqanku. ¿Maypitaq yachakurqanku? Biblia nisqanmanjina paykunaqa, ‘Jesuswan khuska puriq kanku’ (Hech. 4:13). Arí, Sumaq Yachachiqmanta yachakurqanku. Ñuqanchikpis Jesusmanta yachakusunman, imaptinchus yachachiykunasninqa, imaynatachus runata yachachirqa ima, Bibliapi qillqasqa kachkan. Chayrayku, manapis yachay wasiman rirqanchikchu, Bibliamanta yachakusqanchikqa, ima yachaymantapis aswan sumaq (Isa. 50:4; 2 Cor. 3:5).
4. ¿Imatataq Amosmanta yachaqasunman?
4 Jehovaqa, wakin kutiqa, llampʼu sunquyuq kamachisninniqta riqsisqa runasta kʼamirqa. Juknin kamachin profeta Amosqa, jinata nirqa: “Noqaqa mana profetachu kani, nitaj profeta kasqayta yuyakunichu. Kawsanaypajqa ganakuni ovejasta michispa, kʼita higosta pallaspataj”, nispa (Amós 7:14). Jinapis Amosqa, mana manchachikuspa lantita yupaychaq sacerdote Amasiasman, Dios wañuchinanta willarqa (Amós 7:16, 17). Jallpʼantinpi runaman willakusqanqa, Diospa munaynin kasqanta yuyarikunallanchikpuni tiyan, pay yachachiwasun sumaqta kay llamkʼayta ruwananchikpaq (2 Tim. 3:17).
5. Achkha ruwanayuq kaptinchikpis, ¿imaraykutaq juk runallamanpis yachachinapaq tiempochakunanchik tiyan?
5 Mana tiempoy kanchu. Achkha ruwanayuq kaptiykipis, willaq lluqsinaykipaq tiempochakunkiña, ¿ichari? Chaywanpis, juk runallamanpis yachachinaykipaq tiempochakuptiyki, mayta kusikunki. Diospa Palabran runap kawsayninta tikrachisqanta qhawayqa, mayta kusichiwanchik (Heb. 4:12). Jehovaqa, mayta kusikun, runaman ‘chiqa kaqta’ yachachinapaq tukuy imata ruwasqanchikta rikuspa (1 Tim. 2:4). Angelespis, kusikullankutaq juk runa saqra ruwasqasninmanta pesachikuspa Diosman kutirikuptin, payman astawan kʼaskakunanpaq (Luc. 15:10).
6. Diospa munayninmanjina, ¿ima sumaq llamkʼaytataq ruwasunman?
6 Jehová Diosqa, “tukuy runas salvasqa kanankuta, cheqa kajtataj rejsinankuta” munan (1 Tim. 2:4). Ñuqanchiktaq munaynin juntʼakunanpaq yanapachkanchik. ¡May sumaq kay llamkʼayqa! Chayrayku, ¡mana manchachikuspa juk runallamanpis Bibliamanta yachachimunayki tiyan!