Tapuykuna

◼ ¿Imaynatá pʼachallikusunman Jehovata yupaychanapaq ruwasqa wasisman rinapaq?

Pachantinpi, Tantakunapaq Wasista, Jatun Tantakuykunapaq Wasista, Betel wasista, Sucursalesta ima, Diosta yupaychanapaq tʼaqasqa wasistajina riqsikun. Chay wasisqa, mana Satanaspa saqra pachanpi wasisjinachu, manaqa maychus kaqmanjina, allin llimphuchasqa, Diosta jatunchanapaqjina, kanku. Chayrayku kay wasisman riqkunaqa, Diospa munayninta ruwaq llaqtamanta kasqankuta, rikuchiyta munanku.

Cristianosqa, ‘tukuy imapi, Diospa kamachisnin kasqanchikta rikuchiyta munanchik’, chayrayku maychus kaqmanjina pʼachallikunchik, kʼachanchakunchik ima (2 Cor. 6:3-5). Chantapis tukuy ruwasqanchikpi, cristianos kasqanchikta rikuchinanchik tiyan. Chayrayku pʼachallikusqanchik, kʼachanchakusqanchik ima, maychus kaqmanjina Jehová Diosta yupaychasqanchikta rikuchinan tiyan, astawanraq Nueva York llaqtapi Diosta yupaychanapaq ruwasqa wasista chayri mayqin Sucursalmanpis riptinchikqa.

Kay Organizados para hacer la voluntad de Jehová nisqa libroqa, willaq lluqsinapaq, tantakuykunaman rinapaq ima, ukhunchik llimphu kananmanta, allinta pʼachallikunamanta, maychus kaqmanjina kʼachanchakunamanta ima parlan, chaymanta parlaytawantaq ajinata nin (139 paginapi, 1 parrafopi): “Yuyarina Betelqa, ‘Diospa wasin’ ninayan. Chayrayku, pʼachallikusqanchik, ruwasqanchik ima, Tantakunapaq Wasiman, Diosta yupaychanapaq rinchikjina kanan tiyan”. Tukuy cristianos, Betel wasiman rispa, kaypi nisqanmanjina ruwananchik tiyan. Ajinamanta chay wasista jatunpaq qhawasqanchikta rikuchisunchik (Sal. 29:2).

Pʼachallikusqanchikqa, “Diosta yupaychaj [runas]” kasqanchikta rikuchinan tiyan (1 Tim. 2:10, Qheshwa Biblia). Chantapis maychus kaqmanjina pʼachallikuptinchikqa, runaspis Jehovata yupaychayta jatunpaq qhawanqanku. Chaywanpis Jehovata yupaychanapaq wasisman rispa wakin hermanosqa, chʼichi, thanta, matʼi, kʼaka, mana allin pʼachaswan pʼachallisqas rinku. Kayjina pʼachastaq, manapuni allinchu cristianospaqqa. Chayrayku cristianosjina “imata ruwaspapis, tukuy imata ruwa[na]chej Dios jatunchasqa kanampaj”, ajinamanta sutʼita rikukunqa imaraykuchus Diospa llaqtan mana kay pachapi kawsaq runasjinachu kasqankuta (Rom. 12:2; 1 Cor. 10:31).

Chayrayku Nueva York llaqtapi, Jehovata yupaychanapaq ruwasqa wasisman, chayri mayqin sucursalninmanpis richkaspaqa, chayman riytapuni munarqanchik chayri vacacionespi kachkaspa chay wasisman riyta munaspapis, allin kanman kaykunata tapurikunanchik: “¿Rikuchinchu pʼachallikusqay, kʼachanchakusqay ima, Jehová Diosta yupaychanapaq wasista jatunpaq qhawasqayta? ¿Allinpichu Diosniyta qhawachinqa? Chayri, ¿pitapis pantachinaypaqjinachu pʼachallikuni?” nispa. Chayrayku maykʼaqllapis, imallapipis pʼachallikusqanchik, kʼachanchakusqanchik ima, “Dios Salvawajninchejpa yachachiyninta allimpi” rikuchichun (Tito 2:10).