‘Jesusjina ruwaychik’
1. ¿Imaynatá sumaq willaqkunaman tukusunman?
1 Jesusqa, judiospa yachay wasisninkuman mana yaykurqachu, chaywanpis, ni jaykʼaq payjina pipis Diosmanta yachachirqachu. Ñuqanchikpaq willayninmanta qillqakusqanqa, may allinpuni, imaraykuchus sumaqta willayta munaptinchikqa, ‘pay kikin ruwananchik’ tiyan (1 Ped. 2:21).
2. ¿Imataq Cristojina runata munakunanchikpaq, yanapawasun?
2 Runata munakusqanta rikuchirqa. Jesustaqa, runata munakusqan, willananpaq tanqarqa (Mar. 6:30-34). Runaqa, “nanaywan ayqoshan” chayrayku usqhayllata chiqa kaqta yachayta necesitanku (Rom. 8:22). Jehová, willananchikta kamachisqanpi, chay runas may llakiypi kachkasqankupi ima, tʼukuriyqa, willanallanchikpaqpuni mana saqinapaq yanapawasun (2 Ped. 3:9). Chantapis, runa chiqamanta paykunamanta llakikusqanchikta rikuspa, willasqanchikta uyarinqanku.
3. ¿Imaynatataq Jesús runaman willaq?
3 Tukuyniqpi willarqa. Jesusqa, tukuyniqpi allin willaykunata willarqa (Mat. 4:23; 9:9; Juan 4:7-10). Ñuqanchikpis, kikillantataq wakichisqa kayta munanchik, sapa pʼunchay maypichá kachkanchik chaypi, willanapaq. Wakin hermanosqa, Bibliata, publicacionesta ima, apaykachanku, llamkʼayninkupi, yachay wasipi, viajachkaspa, rantichkaspa, wak ruwaykunapi ima, runaman willanankupaq.
4. ¿Imaynatataq willaypi Diospa Reinonmanta parlasunman?
4 Diospa Reinonmanta willarqa. Jesusqa, Diospa Reinonmanta willarqa (Luc. 4:43). Ñuqanchikqa, ichá mana Diospa Reinonmanta, parlaspachu willayta qallarisun, chaywanpis chay Reino necesitkusqanta rikuchina tiyan. Chantapis qhipa pʼunchaykunapi kawsasqanchikta rikuchinapaq, kay pachapi saqra ruwaykuna kasqanmanta willanchik, astawanpis “sonqo tiyaykuy allin willaykunata” runaman willanchik (Rom. 10:15).
5. ¿Imaynatá willayninchikpi Bibliata apaykachasunman?
5 Diospa Palabranmanta yachachiarqa. Jesusqa, Diospa Palabranmantapuni willarqa, mana yuyaynillanmantachu imatapis yachachirqa, nitaq imatapis munaynillanmantachu ruwarqa (Juan 7:16, 18). Diospa Palabranqa, mikhuyninjina karqa, chayrayku nisqanmanjina ruwarqa, Satanasmantapis chaywan jarkʼakurqa (Mat. 4:1-4). Ñuqanchikpis allinta yachachinapaqqa, sapa pʼunchay Diospa Palabranta ñawirina, chaymanjinataq kawsana (Rom. 2:21). Willaypi runa tapuwaptinchik, Bibliawan chay tapuyninman kutichina tiyan, atikuptintaq juk pʼitita ñawiripuna. Ajinamanta yachachiyninchik, mana yuyaynillanchikmantachu, manaqa Bibliamanta kasqanta rikuchisun.
6. ¿Imaynatá Jesús runap sunqunman chayananpaq yachachirqa?
6 Yachachiyninwan runap sunqunman chayarqa. Kuraq sacerdotes, soldadosta mana Jesusta apamusqankumanta tapuptinku, paykuna kutichirqanku: “Mana jaykʼaj pi runapis parlarqachu chay runa jinaqa”, nispa (Juan 7:46). Jesusqa, runaman mana imatachus ruwanallankutachu yachachirqa, astawanpis sunqunkuman chayananpaqjina yachachirqa (Luc. 24:32). Rikchʼanachinasninqa, runap kawsayninpi rikukusqanmanta karqa (Mat. 13:34). Chaywanpis, runata mana saykʼuchinanpaq, mana tukuy imata jukllapi yachachiqchu (Juan 16:12). Yachachiyninqa, Jehovata jatunchananpaq karqa, mana paytachu. Chayrayku imaynatachus yachachischkasqanchikta sumaqta qhawarikuptichik, Jesusjina sumaqta yachachisun (1 Tim. 4:16).
7. ¿Imaraykutaq Jesús Diosmanta willallarqapuni?
7 Churanakuptinku, mana uyariptinkupis willallarqapuni. Jesús milagrosta ruwaptinpis, runaqa, willayninta mana kasurqachu (Luc. 10:13). Familiaresninpis, jinata nirqanku: “Mana yuyaynimpichu kashan, nispa” (Mar. 3:21). Chaywanpis Jesusqa, kusiywan willallarqapuni. Imaptinchus yachachiynin runasta juchamanta kacharichisqanta, yacharqa (Juan 8:32). Ñuqanchikpis ñawpaqllamanpuni rinapaqqa, Jehovap yanapayninwan kallpachakunchik (2 Cor. 4:1).
8. Jesusjina ruwanapaq, ¿imasta astawan willanapaq ruwasunman?
8 Runaman willananpaq tukuy imata ruwarqa. Jesús willayninrayku, kapuyniyuq kayta, qhisacharqa (Mat. 8:20). Tutayaykamapis mana saykʼuspa willarqa (Mar. 6:35, 36). Chantapis runaman willananpaq pisi tiempolla kasqanta, yacharqa. Kunanpis “pisi tiempollaña kashan”, Jesusjina mayta kallpakuptinchiktaq, tiemponchikta, kallpanchikta, kapuyninchikta ima, runaman willanapaq churasun (1 Cor. 7:29-31).
9. ¿Imaynatá sumaq yachachiqman tukusunman?
9 Ñawpa tiempomanta cristianosqa, Jesusmanta yachaqakusqankurayku, sumaqta willarqanku (Hech. 4:13). Ñuqanchikpis, willayninchikta sumaqta juntʼanapaq, tukuy tiempomanta aswan sumaq Yachachiqjina ruwana tiyan (2 Tim. 4:5).