Ñuqa, ¿yachachiq?

1. Willaqkuna, ¿ima sumaq ruwaytataq ruwasunman?

¹ Willayninchikpiqa, runaman chiqata yachachispa, aswan kusiyta tarinchik. Ni ima kikinchakunmanchu: Chiqa kaqta yachakuyta munaqta tariywan, Diosmanta willayninchikta kasukuqta qhawaywan, Tukuy Atiyniyuq Kamachiqman qayllaykunanpaq yanapaywan, imaynatachus kawsayninta, yuyayninta, ruwayninta ima tikrachisqanta, qhawariywan ima (Sant. 4:8). Tukuyninchik chay ruwayta, taripanapaq churakunanchik tiyan (Mat. 28:18-20).

2. ¿Imaptintaq wakinkuna Bibliamanta yachachiyta, manchachikunku, imaynatá chayta atipankuman?

² Jehovapi atienekuy. Ñawpa tiempopi, Diosman chiqa sunqu runas, kamachisqanta juntʼanankupaq iskaychakurqanku. Ñuqanchik jinalla karqanku: Moisés, Jeremías, Amós ima, pikunachus Jehovapi atienekuspa mancharikuyninkuta, iskaychakusqankuta ima, atiparqanku; jinamantataq jatuchaq ruwaykunata ruwarqanku (Éxo. 4:10-12; Jer. 1:6, 7; Amós 7:14, 15). Apóstol Pablo paymanta, compañerosninmanta ima: ‘Mana manchachikusqankuta’ nirqa. ¿Imaynatá chayta ruwarqanku? ‘Diosniyku kallpachawarqayku’, nispa Pablo kutichin (1 Tes. 2:2, Dios Parlapawanchej). Chiqamanta nisunman, Bibliamanta yachakuqkunata wiñanankupaq yachachinapaqqa: Jehová Dios yanapata, yachayta, kallpata ima quwasunchik (Isa. 41:10; 1 Cor. 1:26, 27; 1 Ped. 4:11).

3, 4. ¿Imataq wakichikun sapa semana yanapanawanchikpaq, sumaqta Bibliamanta yachachinapaq?

³ Yachachichikullay. Jehová, May Sumaq Yachachiqninchikqa, sapa semanapaq yachachiykunata wakichipuwanchik, jinamanta sumaq wakichisqa yachachiq kanapaq (Isa. 54:13; 2 Tim. 3:16, 17). Kay yachachiykunataqa allinta japʼikuy, chantá Bibliamanta yachakusqaykita astawan ukhunchariy, wakkunaman chiqa kaqta yachachisqaykipi aswan sumaqta ruwanaykipaq tʼukuriy. Chantapis Diosmanta Parlayta Yachanapaq, Willayta Yachanapaq Tantakuy ima, sumaq yachachiq kananchikpaq wakichisqa kachkanku, chaywanpis tukuy tantakuykuna yanapallawanchiktaq.

⁴ Mana japʼiqay atina yachachiykunata, paykunapaqjina parlaspa, atiwaq yachachiyta. Chaypaqtaq kay Benefíciese, libropi, 227 paginapi nisqanmanjina ruwawaq: “Paykuna sumaqta yachakunankuta munanki chayqa, qamraq allinta yachakunayki tiyan”. Chantapis, tantakuykunapi tapuykunaman kutichinki chayqa, aswan qhipamanpis chay sumaq yachaykunata mana qunqankichu. Chayrayku sumaqta wakichikuy, jinamanta mana manchachikuspa yachachinki.

5. ¿Pikunataq qutuchakuypi sumaq yachachiq kananchikpaq yanapawasunman?

⁵ Ñawpaq kaq cristianosqa khuska willasqankupi puraqmantacha yachachinakurqanku (Luc. 10:1). Ñuqanchikpis, precursoreswan, ancianoswan, superintendenteswan ima, Bibliamanta yachakuqkunaman riyta atisunman. Qhawariy imaynatachus dibujoswan, wakkunawan ima, chiqa yachachiyta sumaqta yachachisqankuta. Imaynamantachus aswan sumaqta yachachinaykipaq nisunankuta mañarikuwaq (Pro. 1:5, 6; 27:17). Kaykunataqa, Diosmanta yachachiykunatajina qhawarinayki tiyan (2 Cor. 3:5).

6. ¿Imatá ruwana kanman Bibliamanta sumaq yachachiq kanapaq?

⁶ Jehová Diospi atienekuy, yachachiwasqanchiktataq sumaqta japʼikuy. Diosmanta mañakuchkaspa, ñawpaqman riyta munasqaykimanta parlariwaq (Sal. 25:4, 5). Ajinamanta wak: ¡Bibliamanta sumaq yachachiq!, qamjina kananpaq, yachachisqaykimantataq may kusiyta tarinki.