‘Diospa munakuyninpi kallaychikpuni’
1. ¿Imapaqtaq ‘Diospa munakuyninpi kallaychikpuni’ libromanta yachakusunchik?
1 Febrero killapi, 23 pʼunchaymantapacha, Bibliamanta Yachaqanapaq tantakuypi, ‘Diospa munakuyninpi kallaychikpuni’ libromanta yachakuyta qallarisun. Mayta kay libromanta yachakuyta munachkanchik, ¿icharí? Diospa Llaqtanta Kamachiqkuna, tukuy Jehovata munakuqkunaman, musuq libromanta cartata qillqasqankupi ninku: “Tukuyninchikta, kay libropi yachachikusqan chiqa kaqmanjina kawsanallanchikpaqpuni yanapanawanchikta tukuy sunquwan munayku, jinamanta ‘Diospa munakuyninpi kanallanchikpaqpuni, wiñay kawsaytataq japʼinanchikpaq’ (Judas 21)”.
2. ¿Imaspitaq kay musuq libro yanapawasun?
2 ¿Imatá yachakusunchik? Kamachiqkunata kasukuypi, amigosninchikwan sunqunchikta kusichiypi, imatachus ruwayta yachasqanchikpi, qhariwarmi kawsaypi, parlayninchikpi ima, ¿imaynatá Bibliap nisqanmanjina ruwasunchik? Kay libromanta yachakuspaqa, conciencianchikta Diospa chiqan kamachiykunasninmanjina ruwananpaq yachachisunchik (Sal. 19:7, 8). Chantapis, tukuy ruwasqanchikpi Diosta kusichiyta munaspa, payta kasukusunchik, imaptinchus kay libropiqa, Diospa yuyayninta astawan riqsisunchik (Pro. 27:11; 1 Juan 5:3).
3. ¿Imaraykutaq sapa semana tantakuypi parlarinapaq wakichikunanchik tiyan?
3 Parlarinapuni. Diosta llaqtan chawpipi jatunchanaykipaq, sumaqta wakichikuy (Heb. 13:15a). Kay musuq librotaqa, qutuchakuypi ukhunchasunchik. Chantá, kay libromanta ukhunchanapaq pisillata wakichikusqanrayku, tukuy sumaqta wakichikuspa yachakusqanchikta mana manchikuspa parlariyta atisunchik. Chantapis, wakichikusqanchikta pisillapi parlarisqanchikqa, wakkunata sumaq ruwaykunaman, munanakuyman ima, tanqanqa, jinamanta yachakusqanchik mayta kallpachawasun (Heb. 10:24). Iñiyninchikta rikuchispataq, may kusisqas kasunchik.
4. ¿Imaraykutaq may allin, Jehovap kamachiykunasninta kasukuy?
4 Jesusqa, wañunan pʼunchaymanta ñawpaq chʼisinpi, Jehovap kamachiykunasninta kasukuy, munakuyninpi kaywan khuskachasqa kasqanta sutʼincharqa (Juan 15:10). Kay “Diospa munakuyninpi” libroqa, kawsayninchikpi Bibliap nisqanmanjina ruwanapaq, chantapis ‘Diospa munakuyninpi kanallanchikpaqpuni’ yanapawasun (Jud. 21).