Publicacionesninchikqa, ¡may valorniyuq!
1. Jesús, Jehovap qusqanta may allinpaq qhawasqan, ¿imatá yachachiwanchik?
1 Jesús, achkha runasman mikhuchichkaspa, discipulosninta puchuq tʼantata jallchʼanankuta nirqa (Mat. 14:19-21). Chayta ruwasqanqa, Jehová, ‘allin kamachiniqta’ imastachus quwasqanchikta may allinpaq qhawananchikta, yachachiwanchik. Wak parlaypi jinata niwanchik: “Diosman graciasta qoychej”, nispa (Col. 3:15; Luc. 12:42; Mat. 24:45-47).
2. ¿Imatá ruwasunman revistas mana puchuykunawanchikpaq?
2 Revistas. Wakin kutiqa, sapa killa achkha revistas puchuykuwanchik. Jina kaptin, ¿imatataq ruwana tiyan? Pisillataña urqhukuna. Chaywanpis, ¿imatataq chay puchuq revistaswan ruwasunman? Willaypi saqiyta atisunmanraq, imaraykuchus revistaspi yachachiykunaqa, may sumaq valorniyuqllapuni kanku. Chaypaqtaq, qutuchakuymanta superintendente de servicio nisqata, chayri wak ancianota, imaynatachus runaman jaywanata yuyaycharinawanchikta mañasunman.
3, 4. Manaraq publicacionesta urqhuchkaspa, ¿imaspitaq tʼukurinanchik tiyan?
3 Wak publicacionesninchik. Ima publicacionllawanpis willamuna kaptin, ñawpaqtaqa, wasipi kapuwasqanchiktachus manachus qhawarina. Jinamanta mana kapuwaptinchikqa, urqhukunapaq. Chantapis, chay semanapaq necesitasqallanchikta urqhukuna tiyan, chayta tukuptinchiktaq astawan urqhukuyta atillasun.
4 Qampaq publicacionesta, necesitasqallaykita urqhukuy. Chantá, sutiykita qillqaykuy, jinamanta mayqinchus qampata kasqanta yachanki. Kay CD-ROM Watchtower Library nisqa kapusuptin, sapa killamanta revistasniykita allinta jallchʼaptiyki ima, ichapis La Atalaya, ¡Despertad! revistamanta ima, volúmenes nisqata, manaña urqhunaykichu kanqa.
5. Runaman juk publicacionta jaywachkaspa, ¿imatataq mana qunqakunanchikchu tiyan?
5 Publicacionesta runaman jaywachkaspa. Willaypiqa, mayta kallpachakunchik willayninchikta uyarikuqkunaman publicacionesta jaywanapaq. Chay publicaciones ruwakunallanpaqpunitaq, ñuqanchik Jehovamanta sutʼinchaqkuna qullqita churanchik. Chaywanpis, runaman juk publicacionta jaywachkaspaqa, paypis pachantinpi allin willaykuna willakunallanpaqpuni qullqita churaspa yanapayta atisqanta niy.
6. ¿Imaraykutaq publicacionesninchik may valorniyuq kanku? Chantá, ¿imatá mana ruwasunchu?
6 Jesusqa, runasman mikhuchirqa, chaywanpis astawan Diosmanta yachachirqa. Nirqataq: “Mana tʼantallawanchu runaqa kawsanqa: astawanqa, Diospa siminmanta tukuy llojsimoj palabraswan”, nispa (Mat. 4:4). Publicacionesninchik, chiqa yachachiykunayuq kasqanrayku, wiñay kawsayta japʼinapaq yanapawasun (Juan 17:3). Publicacionesninchikqa, ¡may valorniyuq kanku! ¡Ama usuchinachu!