Willamuspaqa, Diosta munakusqanchikta rikuchinchik
1. ¿Imamantaq munakuynin Jesusta tanqarqa?
1 Jesustaqa, munakuynin mayta yanaparqa. Pay runasman tukuy imaymanamanta willasqanqa, Jehovata mayta munakusqanta rikuchirqa. Chantapis jinata nirqa: “Kay pachamanta runasqa yachananku tiyan Dios Tatata munakusqayta, imatachus pay kamachiwarqa, chaytapis ruwasqayta” (Juan 14:31). Jesuspa qhipanta riqkunapis, runaman willamuspa Jehovata munakusqanchikta rikuchiyta atillanchiktaq (Mat. 22:37; Efe. 5:1, 2).
2. Jehová Diosmanta willamuspa, ¿imatataq rikuchinchik?
2 “Sutiyki jatunchasqa kachun.” Tukuyniqpi runasman Jehovamanta, Reinonmanta ima, parlaspaqa, Jehová Diosta munakusqanchikta rikuchichkanchik, chantapis sutin jatunchasqa kananpaq yanapachkallanchiktaq (Sal. 83:18, NM; Eze. 36:23; Mat. 6:9). Jesusjina, tukuyniqpi runasman willaspaqa, Jehovap sutin jatunchasqa kananta, munaynin juntʼakunanta ima, munasqanchikta rikuchichkanchik (Mat. 26:39).
3. ¿Imaynatataq Diosta munakuy, jarkʼaykunata atipanapaq yanapawasunman?
3 Munakuyqa jarkʼaykunata atipanapaq yanapawanchik. Jehovata munakuyqa, jarkʼaykunata atipanapaq yanapawanchik ( Cor. 13:4, 7). Jesusqa kawsayninpi tukuy laya jarkʼaykunawan rikukurqa, chaytaq, willayninta saqichiyta atinman karqa. Chaywanpis chay jarkʼaykunata atipananpaqqa, Diospa munayninta juntʼayta munasqan, payta munakusqan ima, mana saykʼuspa willanallanpaqpuni yanaparqa (Mar. 3:21; 1 Ped. 2:18-23). Ñuqanchikpis jarkʼaykunawan tinkukunchik, chaywanpis Jesusjina Diosta munakusun chayqa, jarkʼaykunata atipayta atisunchik. Jesusjina ruwananchikpaq kallpachakusun chayqa, willayninchikta mana manchachikuspa, mana iskaychakuspa ima, juntʼayta atisunchik. Chaywanpis, unquy, machuyay, familiamanta kaqkuna churanakuwaptinchik, runa willasqanchikta mana uyariyta munaptinku ima, llakikunchik, kaykunaqa, Jehovata munakusqanchikrayku runasman, tukuyniqpi atisqanchikmanjina willamunanchikpaq, mana jarkʼanawanchikchu tiyan.
4. Jehovata munakuqkuna, ¿imatataq ruwayta atinchik?
4 Munakuyqa may atiyniyuq. Ñuqanchiktaq, Diosta tukuy sunqu munakusqanchikta, runasman willamuspa rikuchinchik (1 Cor. 13:13). Jehovap sutin ni jaykʼaqjina jatunchasqa kananqa, astawan qallaykamuchkan, chayrayku Diosta ‘munakusqanchik astawan wiñanan’ tiyan (Fili. 1:9; Mat. 22:36-38).