¡Diospa Palabranta willaraypuni!
1. Apóstol Pablop, ¿ima kamachisqantataq kasukunanchik tiyan?
1 Apóstol Pablo nirqa: “Diospa Palabranta willaraypuni tutapis, pʼunchaypis ima ratollapis”, nispa (2 Tim. 4:2). ¿Imaynatá apóstol Pablop nisqanta kasukuy yanapawanchik? Chantá nisqanta kasukuspa, ¿imaynatá runasta yanapanchik?
2. Wakin runasta wasisninkupi mana taripaspa, ¿imaraykutaq wak pʼunchay kutinanchikpaq kallpachakunanchik tiyan?
2 Salvacionta tarinankupaq runasta yanapanchik. Chiqamanta may chhika runas Diospa Reinonmanta allin willaykunata manaraq uyarinkuchu (Rom. 10:13-15; 1 Tim. 4:16). Paykunamanta achkha llampʼu sunquyuq runastaq maypichus sapa kuti willanchik chaypi tiyakunku. ¿Imatá ruwasunman wasisninkupi paykunata taripananchikpaq? Wasisninkuman wak pʼunchaypi chayri wak horapi kutisunman. Jinata ruwaptinchikqa, conciencianchik mana juchachawasunchu kay saqra pacha chinkachisqa kachkaptin chay runas wañuptinku (Hech. 20:26, 27).
3. ¿Imatá ruwasunman willaypi tiemponchikta mana usuchinanchikpaq?
3 Sinchi churanaku kaptinpis ñawpa cristianosqa, ‘yachachiyninkuwan tukuy Jerusalenman juntʼaykuchirqanku’ (Hech. 5:27, 28). Ñuqanchikrí, ¿paykunajinachu ‘tukuy runasman willayta’ munanchik? (Hech. 10:42.) Willaypi tiemponchikta mana usuchinanchikpaq, wakin hermanosninchik Bibliamanta yachakuyta munaqkunaman risqankumanta kutimunankukama, ¿chayniqpi purichkaq runasman willanchikchu?
4. Diospa Palabranta willaraypuni, ¿imaynatá yanapawanchik?
4 Espiritualmente rikchʼarisqas kananchikpaq yanapawanchik. Kay pachap tukukuynin qayllitapiña kasqanrayku, espiritualmente rikchʼarisqas kanallanchikpuni tiyan (1 Tes. 5:1-6). Diospa Reinonmanta willarallaypuniqa, kay saqra pachap ruwanasninwan mana atipachikunanchikpaq yanapawanchik (Luc. 21:34-36). Diospa “jamunan pʼunchayta suya[ytaqrí]” astawan willamunanchikpaq yanapawanchik (2 Ped. 3:11, 12).
5. Kawsayta jatunpaq qhawasqanchik, ¿imata ruwananchikpaqtaq yanapawanchik?
5 Tukuyman willaraspaqa, Jehovajina kawsayta jatunpaq qhawasqanchikta rikuchinchik, imaraykuchus payqa mana “munanchu pipis juchanrayku chinkayman rinanta. Astawanqa pay munan tukuy runas [Payman] kutirikunankuta” (2 Ped. 3:9; Eze. 33:11). Chayrayku Jehová jatunchasqa kananpaq, ¡Reinonmanta willaramunallapuni! (Sal. 109:30, 31.)