Ñawiyki, ¿allinchu?
1. Ñawinchik allin kaptin, ¿imastá ruwasunchik?
1 Imatachus rikusqanchikqa, allin chayri saqra ruwayman tanqawasunman. Chayrayku may allin Jesuspa kay nisqanta yuyarinanchik: “Ñawiyki allin kajtenqa, tukuy cuerpoykipis kʼanchayniyoj kanqa”, nispa (Mateo 6:21-25). Ñawinchik allin kaptinqa, imatachus mana necesitasqanchikta mana rantisunchu nitaq tiemponchikta usuchisunchu, astawanqa, Diospa munaynintapuni ruwasunchik, Reinontataq ñawpaqman churasunchik.
2. ¿Imataq tanqawasunman mana necesitasqanchikta rantinapaq, chantá imatá qhawarikunanchik kanman?
2 Ñawiyrí, ¿allinchu? Rantinapaq imastachus telepi rikukusqan, wakkuna tukuy imayuq kasqankuta rikusqanchik imaqa, mana necesitasqanchikta rantinapaq tanqawasunman. Chayrayku imapis kapunawanchikpaq niraq tukuy tiemponchikta, qullqinchikta, kallpanchikta ima churachkaspa, allin kanman ‘qullqinchik kapuwanchikchus manachus’ chayta qhawarikunanchik, jinallataq imatachus ruwayta munasqanchik astawan willaq lluqsinapaq yanapawasunchus manachus chaytapis (Luc. 14:28; Fili. 1:9-11). Chantá allin kanman astawan willaq lluqsinanchikpaq imaynasmantachus llamkʼayninchikta pisiyachinanchikpi tʼukurinanchik (2 Cor. 13:5; Efe. 5:10).
3. LIamkʼayninta pisiyachinanpaq imatachus juk hermana ruwasqanmanta, ¿imatá yachakusunman?
3 Juk hermana precursora regularjina llamkʼayta qallarirqa. Necesitasqallanta rantikunanpaq khuskan pʼunchayllata llamkʼayta atispapis, diantinta llamkʼachkallarqapuni. Chaywanpis allinta tʼukurispa jinata nirqa: “Mana pipis atinchu iskay patronesta jukllapi sirviyta. Chayrayku necesitasqallaypaqña llamkʼarqani, manañataq tukuy imata rantikunaypaqchu. Tukuy imayuq kay qhasi mana kaq kasqanta, anchata llamkʼaspa saykʼukuchkasqayta ima repararqani”. Kay hermanaqa, khuskan pʼunchayta llamkʼananpaq wak llamkʼayta tarikurqa, chaytaq precursorajinallapuni llamkʼanapaq yanaparqa.
4. Ñawinchik allin kanallanpuni, ¿imaraykutaq may sumaq?
4 Kay saqra pachap tukukuynin astawan qayllamuchkan jinallataq musuq pachapis. Chayrayku ñawinchik allin kanallanpuniqa, may sumaq (1 Cor. 7:29, 31). Willaypi yuyayninchikta churaspaqa, ñuqanchik kikinchikta salvakusunchik jinallataq pikunachus uyariwasunchik paykunatapis (1 Tim. 4:16).