Tʼukuriyqa sunqu kʼajaywan willanapaq yanapan
1. ¿Imataq Jesusta willanallanpaqpuni yanaparqa?
1 Jesusqa, inti yaykuyninmanta chʼisiyanankama runasta unquymanta jampichkarqa, supaykunataq qharquchkarqa. Qʼayantintaq, Jesusta mana taripaspa discipulosnin, maskʼayta qallarirqanku, payta taripaspataq nirqanku: “Tukuy maskʼashasunku” nispa, milagrosta ruwanallantapuni suyaspa, kaytaqa nirqanku. Jesustaq, willanallantapuni juntʼananta yachaspa nirqa: “Jakuchej kay qaylla llajtaspi runasman, chaypipis willaranaypaj, imaraykuchus chaypajmin noqaqa jamorqani”, nispa. Kayta juntʼananpaq, ¿imataq Jesusta yanaparqa? Tʼukurinanpaq, tutamanta jatarisqan, Diosmanta mañakusqan ima (Mar. 1:32-39). ¿Imaynatá tʼukuriy yanapawanchik?
2. Sunqu kʼajaywan willamunallapaqpuni, ¿imaspi tʼukurisunman?
2 ¿Imapi tʼukurina? Jesusqa, runasta rikuspa nirqa: “Paykunaqa saqerpayasqa, chʼeqerasqataj kasharqanku, mana michejniyoj ovejas jina” (Mat. 9:36). Ñuqanchikpis, kay tukukuy pʼunchaykunapi, runas Diosmanta yachayta necesitasqankupi ima, tʼukurisunman (1 Cor. 7:29). Diospa ruwasqasninpi, kʼacha kaykunasninpi, kamachisnin kasqanchikpi, Bibliamanta chiqa yachachiykunata yachakusqanchikpi ima, tʼukurillasunmantaq. Wakin runasqa, chaykunamanta mana yachankuchu (Sal. 77:11-13; Isa. 43:10-12; Mat. 13:52).
3. ¿Maykʼaqtaq tʼukuriyta atisunman?
3 ¿Maykʼaqtaq? Wakinkunaqa Jesusjina, tutamanta jatarispa, wakinkunataq tutanpi tukuy ima chʼin kachkaptin, tʼukurinku (Gén. 24:63). May ruwanasniyuq kaspapis tiempochakusunman. Sutʼincharina, wakinkunaqa micropi richkaspa, wakinkunataq mikhuna horasta sapanku tʼukurinku. May chhika hermanosninchik, manaraq willayman richkaspa tʼukuriy, sunqu kʼajaywan willamunapaq yanapakusqanta reparanku.
4. ¿Imaraykutaq tʼukurina tiyan?
4 Mañakuy, tʼukuriy ima, Diosta yupaychanapaq, mana iskaychakunapaq, willamunallapaqpuni ima, kallpachawanchik. Jesusta, Diospa aswan sumaq kamachinta tʼukurisqan yanaparqa, astawanraq ñuqanchiktapis, tʼukuriy yanapawasunchik.