“Kʼanchayniykichejqa kʼanchachun”
1. Kʼanchay kapuwasqanchikwan, ¿imatá ruwasunman?
1 Sutʼiyaymantapacha chʼisiyanankama, intip kʼanchayninqa Jehovata jatunchan. Jesusqa discipulosninwan parlachkaspa mana chay kʼanchayta japʼinankutachu nichkarqa, manaqa “kawsay kʼanchay[ta]” (Juan 8:12). Diospa yachachiykunasnin kʼanchayjina kapuwasqanchiktaqa, may valorniyuqta qhawananchik tiyan. ¿Imaynamantá? Chay kʼanchayta japʼisqanchikwan wakkunata yanapaspa. Jesús kamachirqa: “Kʼanchayniykichejqa kʼanchachun runaspa ñawpaqempi”, nispa (Mat. 5:16). Kay tiempopi runas sinchi laqhapi kasqankurayku ni jaykʼaqjina Diospa kʼanchayninwan yanapasunman. ¿Imaynamantá Cristojina kʼanchasunman?
2. ¿Imaynatá Jesús Diospa kʼanchayninta qhawana kasqanta rikuchirqa?
2 Willaspa. Jesusqa Diospa chiqa yachachiyninta runasman wasisninkupi, plazaspi, urquspi, mayllapipis kachkaptinku willananpaq tiemponta, kallpanta, kapuyninta ima churarqa. Diospa yachachiykunasnin kʼanchayjina wiñaypaq runasta yanapasqanta allinta yacharqa (Juan 12:46). Chantapis astawan runasman chayanankupaq discipulosninta wakichirqa, “kay pachapaj kʼanchay” kanankupaq (Mat. 5:14). Kʼanchayjinapuni karqanku, imaraykuchus runap allinninta maskʼarqanku, chiqa kaqtataq yachachirqanku.
3. ¿Imaynamantá Diospa chiqa yachachiyninta jatunpaq qhawasqanchikta rikuchisunman?
3 Diospa kamachisnin kay tiempopi, “kʼanchaypa wawasnin jina” kasqankurayku, maypichá runas kanku chaypi willanku (Efe. 5:8, Qheshwa Biblia). Llamkʼaypi chayri yachaywasipi samarikunapaq tiempopi, wakin kuti Bibliata chayri publicacionesta wakkuna rikunankuta ñawirina, jinamanta wakkunawan parlayta qallarisunman. Juk sipas hermana jinata ruwaspa Bibliamanta yachachiyta qallarirqa chantá chunka iskayniyuq compañerosninman librosta saqirqa.
4. ¿Imaraykutaq kʼanchanapaq allin kawsayniyuq kananchik tiyan?
4 Allin kaqta ruwaspa. Kʼanchanapaqqa allin kawsayniyuqllataq kananchik tiyan (Efe. 5:9). Cristianosjina kawsakusqanchikqa llamkʼaypi, yachaywasipi, runaspa ñawpaqinpi ima, sutʼita rikukun, wakkunawan Bibliamanta parlarinapaqpis yanapawanchik (1 Ped. 2:12). Sutʼincharinapaq, phichqa watitayuq wawa allinta ruwasqanrayku yachaywasimanta yachachiqnin tatasninta waqyachispa nirqa: “Kayjina mana kʼamina wawataqa, ¡ni jaykʼaq rikurqanichu!”, nispa. Arí, willayninchik, allinta kawsakusqanchik ima, “kawsay kʼanchay[man]” runasta pusamun, Diostataq jatunchan.