Willayninchikpi pacienciata rikuchina
1. ¿Imaynamantá Jehová tukuy runasman paciencianta rikuchin?
1 Diosqa tukuy runasman paciencianta rikuchillanpuni (Éxo. 34:6; Sal. 106:41-45; 2 Ped. 3:9). Diospa kʼacha kaynin Jallpʼantinpi Reinomanta willakusqanpi sutʼi rikukun. Jehovaqa iskay waranqa watasjinaña runasman paciencianta rikuchin, allin sunquyuq runasta payman pusamuspa (Juan 6:44). Willayninchikpi, ¿imaynatá Diospa paciencianta rikuchisunman?
2. Maypichus willanchik chayniqpi, ¿imaynatá pacienciata rikuchisunman?
2 Wasimanta wasi willaspa. Jehovap paciencianta rikuchinchik, maypichá runas manaraq Diosmanta yachakuyta munankuchu, “mana saykʼuspa” paykunaman willaspa (Hech. 5:42). Willayninchikpi churanakuwasqanchikta, chiqnikuwasqanchikta, asipayawasqanchikta ima pacienciawan aguantanchik (Mar. 13:12, 13). Chantapis Bibliap yachachiyninta runaspa sunqunkupi mujutajina tarpuyta munaspa, pacienciata rikuchinchik, yachakuyta munaqkunata wasisninkupi mana tariptinchikpis.
3. Bibliamanta yachakuyta munaqkunaman kutispa, yachachispa ima, ¿imaraykutaq pacienciata rikuchina?
3 Bibliamanta yachakuqkuna. Juk plantitata wiñachiyqa pacienciapaq. Jallpʼata mayta wakichispapis plantitata mana usqhayta wiñachisunmanchu (Sant. 5:7). Kikillantaq juk runa espiritualmente wiñananpaqpis (Mar. 4:28). Bibliamanta yachakuq, ichapis Diospa Palabranwan churanakuq ususninta chayri imapichus creesqanta mana saqiyta atillanqachu. Usqhayllata wiñananta mana suyanachu, astawanqa pacienciayuq kana chantapis Diospa espiritun sunqunpi llamkʼananta saqina (1 Cor. 3:6, 7).
4. Mana creyente familianchikman willanapaq, ¿imaynatá pacienciayuq kay yanapawanchik?
4 Mana creyente familiawan. Familianchik Diospa chiqa yachachiyninta yachakunankuta mayta munaptinchikpis, maychus tiemponpi paykunawan iñiyninchikmanta parlanapaq pacienciawan suyanchik, ajinamanta mana saykʼuchinapaqjina willariyta atisunchik (Ecl. 3:1, 7). Kawsayninchikta, ruwasqasninchikta ima rikunanku tiyan. Chayrayku llampʼu sunquwan, paykunata jatunpaq qhawaspa ima, creesqanchikmanta riqsichinapaq wakichisqapuni kananchik tiyan (1 Ped. 3:1, 2, 15). Willayninchikpi pacienciata rikuchisunchik chayqa allinta yachachisun, sumaqtaq riwasun, astawantaq Jehová tatanchikta kusichisun.