¿Imataq sumaq yachachiq kanapaq yanapawasun?
1. Sumaq yachachiq kanapaq, ¿imataq yanapawasun?
1 Bibliamanta sumaq yachachiq kanapaq, ¿imataq yanapawasunchik? ¿Universidadpi yachakusqanchikchu? ¿Unaytaña yachachisqanchikchu? Chayri, ¿yachachiyta atillasqanchikchu? Mana, astawanqa munakuy yanapasunchik, mayqinchus Diospa Leyesninta juntʼanapaq, Cristop discipulosnin kasqanchikta rikuchinapaq ima yanapawanchik. Chantá munakuyqa Jehovap juknin kʼacha kaynin, mayqinchus Payman qayllanapaq yanapawanchik (Juan 13:35; Gál. 5:14; 1 Juan 4:8). Arí, sumaq yachachiq kanapaqqa, munakuyta rikuchina tiyan.
2. ¿Imaraykutaq runamasinchikta munakunanchik tiyan?
2 Runasta munakuna. Sumaq Yachachiq Jesusqa, runasta mayta munakuq, chayraykutaq runas uyariq kanku (Luc. 5:12, 13; Juan 13:1; 15:13). Runasta munakusun chayqa, mayllapipis willasunchikpuni. Ni qhatiykachay, runa uyariyta mana munasqan, ni wak imaspis willamunanchikta jarkʼawasunchu. Chantá pikunamanchus willanchik paykunata allinta uyarisunchik chayqa, imachus llakichisqanta yachasunchik, chaymanjinataq yanapasun. Chantapis runasman tukuy sunqu yachachisun, sapa yachanamanta yachachinapaqtaq wakichikusun.
3. ¿Imaynatá chiqa yachachiykunata munakuy, willaypi yanapawasun?
3 Chiqa yachachiykunata munakuna. Jesusqa, chiqa yachachiykunata munakurqa, jatunpaqtaq qhawarqa (Mat. 13:52). Chiqa yachachiykunata munakusun chayqa, kusiywan willamusun, chayta rikuspataq runaspis kusikullanqankutaq. Munakuyqa, yachachiyta mana atisqanchikpi mana yuyanapaq, astawanpis allin willaykunata runa uyariyta necesitasqanpi yuyanapaq yanapawasun.
4. ¿Imaynatá runasta munakusunman?
4 ¿Imaynatá runasta munakusunman? Runasta munakunapaq, Diosmanta karunchasqa kasqankupi, Jehová, Jesús ima, runasta munakusqankupi tʼukuriy yanapawasun (Mar. 6:34; 1 Juan 4:10, 11). Chantapis Bibliata ukhunchasun, chaypi tʼukurisun ima chayqa, chiqa yachachiykunata astawan munakusunchik. Yuyarina munakuyqa espiritup puquyninmanta juknin kasqanta (Gál. 5:22, 23). Munakuyta rikuchinapaqqa, yanapata, espíritu santota qunawanchikta ima Jehovamanta mañakuna (Luc. 11:13; 1 Juan 5:14). Chayrayku universidadman rispa chayri manapis, unaytaña yachachiq kaspa chayri manapis, sumaq yachachiq kasunman munakuyta rikuchiptinchik.