Kinsa yuyaychaykuna sumajta yachachinapaj
1. ¿Imaraykutaj sumajta yachachinapaj mayta kallpachakunanchej tiyan?
1 Sapa uj cristiano allin willaykunamanta, uj yachachej kanchej. Chayrayku Reinomanta willashajtinchej, Bibliamanta yachakuyta munajkunaman kutejtinchej, chayri Bibliamanta yachachishajtinchej runasman imatachus ruwanankuta yachachinchej. “Diosmanta Qhelqasqata” sutʼinchashaspa “salvacionta” tarinankupaj yanapanchej (2 Tim. 3:15). Chayta ruwayqa may sumaj. Sumajta yachachinapaj kallpachakuna, ¿may sumajcharí kanman? Imaynatachus chayta ruwanata kinsanejmanta qhawarina.
2. ¿Imaynatá runa japʼeqananpaj jina yachachisunman?
2 Runa japʼeqananpaj jina yachachina. Ichapis uj yachaqanamanta yachachishaspa, chay yachachiyta yachasqanchejrayku, uyarejpaj mosoj yachachiy kasqanta, chayri mana entiendeyta atinanta ima qonqasunman. Bibliamanta yachachishaspa mana tukuy imamantapunichu yachachinanchej tiyan, manaqa imamantachus yachachishanchej chayllata sutʼinchana tiyan. Imaraykuchus sumaj yachacheyqa mana ashkha parlaykunapichu kashan (Pro. 10:19). Chantapis yachachishaspaqa wakin textosllata leena tiyan. Leeytawantaj imamantachus yachachishasqanchejwan kikinchana. Mana japʼeqayta atinapaj jina yachachiykunata, Jesús Orqopi sumajta yachachisqanta yuyarina (Mateo 5-7 capítulos). Chay yachachiykunatataj, pisi parlayllapi, runa japʼeqananpaj jina Jesús yachacherqa.
3. ¿Imaraykutaj rijchʼanachinaswan yachachiy may allin chantá mayqen rijchʼanachinaswan allin kanman yachachinapaj?
3 Rijchʼanachinaswan yachachina. Rijchʼanachinaswan yachachejtinchejqa runata tʼukurichin, yuyarichin, sonqonman ima chayan. Rijchʼanachinaswan yachachinapajqa, mana may sumaj yachayniyojpunichu kana tiyan. Jesuspis runaj sonqonman chayananpaj, pisi parlaykunallawan, rijchʼanachinaswan yachachej (Mat. 7:3-5; 18:2-4). Noqanchejpis runaj sonqonman chayanapaj uj papelpi dibujaspa yachachisunman. Sumajta wakichikojtinchejqa ichá waj jinasmanta yachachillasunmantaj.
4. ¿Imaynatá tapuykunata ruwasunman?
4 Tapuykunata ruwana. Tapuykunaqa, Bibliamanta yachakojkunata tʼukurinankupaj yanapan. Chayrayku tapurispaqa, pacienciawan kutichinanta suyana, usqhayllata noqanchej kutichejtinchisqa, yachakoj entiendeshanchus manachus chayta mana yachayta atisunchu. Chantá yachakoj, tapusqanchejman jina mana kutichejtin mana usqhayllata mana allinta kasqanta ninachu, astawanqa waj tapuykunatañataj ruwana cheqanta kutichinanpaj (Mat. 17:24-27). Chaywanpis mana sumaj yachachej kayta atisunchu. Chayrayku Bibliaqa, imatachus yachachishasqanchejta allinta qhawarikunanchejta yuyaychawanchej, chayta ruwasun chayqa noqanchej salvakusunchej, jinallataj willayninchejta uyarejkunapis (1 Tim. 4:16).