Diosqa Jeremiasniqta parlawanchik
1. ¿Imataj jatun tantakuypi llojserqa, chantá imatá noviembre killamantapacha ruwasun?
1 Kay 2010 watapi, “Jehovap qayllanpi kanallapuni”, nisqa jatun tantakuypi Jeremías libro llojsisqanmanta, ¡mayta kusikorqanchej! Kay libro, Bibliaj Jeremías, Lamentaciones librosninmanta orqhokun, kausayninchejpi yanapanawanchejpaj (Rom. 15:4). Kay libro, Bibliamanta Yachaqanapaj tantakuypi ukhunchanapaj wakichisqa kasqanrayku, noviembre killamanta 5 pʼunchayninmantapacha ukhunchayta qallarisun.
2. ¿Imaraykú Jeremías librota ukhunchananchej tiyan?
2 Kay tiempopi yanapanawanchejpaj. Jeremiasqa, Diospa espíritu santonnejta Jeremías librota qhelqarqa, payqa, Judá llajtapi may llakiy tiempopi profeta jina llankʼarqa. Qallariypeqa, profeta jina llankʼananpaj mana wakichisqachu kasqanta yuyarqa (Jer. 1:6). Chantá Anatot llajtamanta, nisunman llajta masisnin qhatiykacharqanku, chaykunamanta ichá rejsisqasnin, familiaresnin ima karqanku (Jer. 11:21, 22). Chayraykuchá wakin kuti mayta llakikorqa (Jer. 20:14). Noqanchejpis, “tukuy laya runasta yachachisqasniyman tukuchimuychej”, nisqa kamachiyta juntʼashaspa, Jeremías jinallataj llakiykunapi rikukunchej (Mat. 28:19, 20). Jeremiaspa qhelqasqan librota ukhunchayqa, kusiywan willanallapajpuni kallpachawasun.
3. ¿Imayna wakichisqataj Jeremías libro kashan?
3 ¿Imayna wakichisqataj Jeremías libro kashan? Kay libroqa, tantakuypi Bibliamanta ima versiculostachus leena kasqanta sutʼita rikuchin. Chantá sapa yachaqana rakʼisqa kashan, sapa rakʼiypa tukukuyninpitaj uj chayri iskay tʼukurinapaj tapuykuna rikhurin. Chay tapuykunatataj, uyarejkunaman ruwakunan tiyan. Chantá kay libroqa, dibujosniyoj kashan hermanos kutichinankupaj.
4. ¿Imatá kay libromanta sumajta yachakunapaj ruwasunman?
4 Tantakuypi kay libromanta sumajta yachakunaykipajqa, ñaupajmanta wakichikuy. Imaynatachus kausayniykipi, willaypi yanapasunanpaj jina yuyaychaykunata maskʼay, tapuykunasman kutichinaykipajtaj kallpachakuy. Jeremiasqa, Jehovaj bendecionninrayku willayninta kusiywan juntʼarqa (Jer. 15:16). Kay librota ukhunchay, willayninchejta kusiywan juntʼanapaj yanapawasun.