Wakin kuteqa Diosmanta willanapaj maskʼana tiyan

1. Ashkha qallusta parlakun chayman, ¿imaraykú qotuchakuykunata chaypi willanankupaj kachakun?

¹ Jesuspa discipulosnin, Pentecostés 33 watapi espíritu santota japʼiytawan, Jerusalenman tukuynejmanta chayamojkunaman “waj parlaykunapi parlayta” qallarerqanku (Hech. 2:4). Willasqankuraykutaj 3.000 runas jina bautizakorqanku. Chay runas hebreo chayri griego qalluta parlajtinkupis, Jehovaqa, qallunkupi Reinonmanta yachakunankuta munarqa. Imaraykuchus runasqa, qallunkupi imata uyarispapis astawan japʼikunku. Chayrayku ashkha qallusta parlakun chay lugaresmanqa, chay qalluspi kaj qotuchakuykuna willanankupaj kachakun (Organizados página 107 párrafos 1, 2 leey). Uj qotuchakuymanta waj qalluta parlaj qotu llojsejqa, mana waj territoriopichu willamun manaqa kikin territoriollapitaj waj qalluta parlajkunata maskʼan, waj qotuchakuykunaj territorionkupi ima.

2. a) Waj qalluta parlajta tarispa, ¿imatá ruwanan tiyan? b) ¿Imaynatá qotuchakuykuna ashkha qallusta parlaj territoriosta llankʼaspa yanapanakunanku tiyan? c) ¿Imatá waj qalluta parlaj runa Diosmanta yachakuyta munajtin ruwasunman?

² Uj qallullata parlakun chaypeqa, hermanosqa wasimanta wasi willanku. Chaywanpis llajtapi ashkha qallusta parlakojtin, ichá kikin territoriollapitaj iskay qotuchakuykuna llankʼanqanku. Waj qalluta parlaj runata tarejtinkutaj, hermanosqa, sutinta, ima horachus taripanankuta ima qhelqankuman, chay qalluta parlaj hermanosman jaywanankupaj; chaywanpis chay qallupi kaj qotuchakuy chayri qotu chay runasta maskʼanan tiyan (“Purajmanta yanapanakuna”, nisqa recuadrota leey). Arí, chay qotuchakuykunaqa, chayri qotusqa chay qalluta parlaj runasta, taripanankupaj maypichus tiyakunku chayta maskʼananku tiyan. Kunantaj qhawarisunchej imaynatachus chayta ruwanata.

3. Ashkha qalluta parlaj lugarespi, ¿imaraykutaj mana kikinchu willakun?

³ ¿Imaynatá maskʼasunman? Ashkha qalluta parlaj lugarespeqa, mana kikinchu willakun. Sutʼincharinapaj, ¿ashkha runaschu chay qalluta parlanku? ¿Mashkha hermanostaj qotuchakuypi chayri qotupi kanku? ¿Ashkha direccionestachu tantakun? Qotuchakuy willan chaypi, mana tukuyninpipunichu kikinta maskʼakunan tiyan, ichapis maypichus ashkhas runas tiyakunku chaypi, chayri qaylla lugarespi astawan maskʼana kanqa. Chaypajtaj imaynatachus willanapaj sumajta wakichina tiyan, ajinamanta ashkha runasta Diospa sutinta yachanankupaj yanapasun (Rom. 10:13, 14).

4. a) ¿Imaynatá waj qalluta parlajkunata maskʼanapaj wakichikunan tiyan? b) ¿Imaynasmanta wakin qotuchakuykuna chayri qotus waj qalluta parlajkunata maskʼanku?

⁴ Mana iskay kutita uj territoriollapi waj qalluta parlajkunata maskʼanapaj, ancianos astawanraj superintendente de servicio nisqa hermano sumajta wakichinan tiyan (1 Cor. 9:26). Uj qotuchakuymanta waj qalluta parlaj qotu kajtenqa, ancianos chay qotuta apaykachananpaj uj ancianota chayri uj siervo ministerialta ajllanqanku. Chantapis chay qotuchakuymanta ancianosqa, qotuta, waj qalluta parlaj runasta maskʼaysenqankuchus manachus chayta nenqanku. ¿Imatá ashkha qotuchakuykuna, qotus ima, ñaupaj kutirayku waj qalluta parlajkunata maskʼanankupaj ruwanku? Wakenqa, Internetpi chayri directorio telefónico nisqapi, waj qalluta parlaj runaspa sutisninkuman rijchʼakoj sutista maskʼanku. Tarispataj telefononejta chay runasman wajyarinku chayri waturej rinku chaypipunichus tiyakusqankuta yachanankupaj, jinaspataj lista de territorios nisqaman churanku. (“¿Imaynatá waj qalluta parlajkunata maskʼasunman?”, nisqa recuadrota leey).

5. a) ¿Imasta waj qalluta parlajkunata maskʼaspa ruwananchej tiyan? b) ¿Imatá nisunman?

⁵ Waj qalluta parlaj runasta maskʼaj rispaqa, mana tiemponchejta usuchinachu. Qallarinapajqa, wasimanta wasi willaj rinapaj jina pʼachallikuna. Chantapis ashkha hermanosta, willanankupaj wakichikusqankuta ensayasqanku, chay qallupi parlasqanku ima, tukuy sonqo willanankupaj, astawan chʼuyitata chay qallupi parlanankupaj mayta yanapan. Waj qalluta parlajkunata mashkha tiempotachus maskʼasqanchejta willayta atinchej, mashkha tiempotachus mapasta wakichishaspa pasasqanchejtaqa mana. Waj qalluta parlaj runata tarispaqa, Diosmanta willanapuni tiyan. Chay runa Diosmanta yachakuyta munajtin chayri manapis, superintendente de servicio nisqa hermanoman chayri yanapajnin willana tiyan, registro de territorio nisqanman churananpaj. Waj qalluta parlaj runasta maskʼay allin kajtinpis, willaypi Diospaj imaymanamanta llankʼananchejta mana qonqanachu (“¿Imatá nisunman waj qalluta parlaj runasta maskʼashaspa?”, nisqa recuadrota leey).

6. ¿Imaynatá joqʼara runasta maskʼana tiyan?

⁶ ¿Imaynatá joqʼara runasta maskʼana tiyan? Joqʼara runasta tariyta mana atikullanchu, chayrayku mana saykʼunapaj mayta kallpachakuna tiyan. Waj qalluta parlaj runasmanta nisqaqa, joqʼara runastaqa, pʼachallikusqankumanta, sutinkumanta ima, mana rejsiyta atillanchejchu. Familiaresninku, amigosninku ima mayta jarkʼasqankurayku ima, ichá hermanosmanqa mana paykunamanta willayta atillankuchu. Kunanqa, imaynatachus joqʼara runasta, waj qalluta parlajkunata ima tarinata, qhawarinachej.

7. a) Joqʼara runasta maskʼashaspa, ¿imatá tapusunman? b) ¿Imatá ruwananchej tiyan runa mana sajrata yuyanankupaj?

⁷ Makiswan parlanapaj qotuchakuykuna chayri qotus uj lugarman willaj rispa vecinosta joqʼara runasta rejsinkuchus manachus chayta tapurinku. Ichaspis vecinospataqa, llankʼayninkumanta chayri yachaywasimanta compañeronku chayri mayqen familiarnillanpis joqʼara kanman. Vecinosqa, ichapis autota apaykachajkunapaj, chaynejpi joqʼora wawas kasqanta nej letrosta rikusqankuta yuyarikunkuman. Chaywanpis runa noqanchejmanta mana sajrata yuyanankupaj, kʼachamanta, jatunpaj qhawaspa ima tapurisunman. Wakin hermanostaqa, runaman joqʼara runaspaj Bibliamanta DVD nisqata, chayri waj publicacionta rikuchinankupaj apasqankuta nejtinku allin rin. Vecino mana imatapis joqʼara runamanta willayta munawajtinchej, ichapis tantakuykunapaj invitacionesta saqesunman rejsisqan joqʼara runaman jaywananpaj.

8. Makiwan parlanapaj qotuchakuyta, ¿imaynatá waj qotuchakuy yanapanman?

⁸ Makiwan parlanapaj qotuchakoyqa, watapi ujta chayri iskay kutita, waj qotuchakuymanta ashkha runas tiyakunku chaypi joqʼara runasta maskʼaysinanta mañankuman. Willanman llojsinapaj tantakuyta makiwan parlanapaj qotuchakuymanta hermano kamachinan tiyan, chantapis imaynatachus maskʼanankuta ninan tiyan, uj rikuchiytawantaj ruwanan tiyan. Qotus autospi rinku chayqa, sapa qotupi makiwan parlaj hermano rinan tiyan, chantapis uj mapata apanan tiyan maypichus joqʼara runas tiyakusqankuta tarinanpaj.

9. ¿Maypitaj joqʼara runasta tarisunman, chantá imata ruwasunman maypichus tiyakusqanta yachanapaj?

⁹ Chantapis joqʼara runastaqa, kusirikoj rinku chaypi manaqa maypichus tantakunku chayri ima laya yanapatapis japʼin chaypi tarisunman. Chayman rinapajtaj maychus kajta pʼachallikuna tiyan. Chantapis tukuynin joqʼara runasman ujllapi willanamantaqa, ichá allin kanman uj chayri iskay runasllawan parlarina. Uyariyta munajtintaj ichá maypichus tiyakusqanta, sutinta ima tapurisunman.

10. ¿Imaynatá negociospi joqʼara runasta maskʼasunman?

¹⁰ Chantapis mapas nisqata wakichisunman ima horapichus joqʼara runasta negociospi taripanapaj. Ujnin mapapi, ashkha gasolinerasta qhelqasunman; waj mapapitaj restaurantesmanta, alojamientosmanta, waj lugaresmanta ima qhelqallasunmantaj. Sapa mapata uj laya negociosllapaj tʼaqakun chayqa, willajkunaqa aswan sumajta llankʼanqanku, willanqanku ima. Sutʼincharinapaj, alojamientopi llankʼajwan parlariytawan, publicacionesninchejmanta ashkha DVD nisqata, tantakuykunapaj invitacionesta ima saqesunman, joqʼara runasman alojakoj rejtinku jaywananpaj. Ichá wakin negociospi tapurisunman, mayqen llankʼajllapis chayri rantikojpis makiwan parlasqanta. Willanchej chaynejpi joqʼara runaspaj uj yachaywasi kajtenqa, bibliotecankupaj publicacionesninchejmanta DVD nisqata saqesunman.

11. ¿Imaraykutaj waj qalluta parlajkunata maskʼanapuni tiyan?

¹¹ Maskʼanapuni. Waj qalluta parlaj runasta maskʼayqa ichá mana atikullanqachu. Chaywanpis willanchej chay lugarespi mana kikin runasllapunichu tiyakunku, registro de territorio nisqapi qhelqasqa mana yanapawasunmanchu. Chantapis wakin lugarespi waj qalluta parlajkunaman Diosmanta willayqa may sumaj. Jehová Dios willananchejta kamachiwanchej, imaraykuchus Payqa tukuyta allinpaj qhawan (Hech. 10:34, 35). “Payqa munan tukuy runas salvasqa kanankuta, cheqa kajtataj rejsinankuta” ima (1 Tim. 2:3, 4). Chayrayku Jehová Dioswan, hermanosninchejwan ima khuska llankʼana, waj qalluta parlaj runasta maskʼaspa, nisunman “sumaj sonqowan, cheqan yuyaywantaj Diospa Palabranta uyar[ejkunata]” (Luc. 8:15).

[5 paginapi recuadro]

Purajmanta yanapanakuna

Waj qallumanta qotuchakuy chayri qotu, runasman qallunkupi willayta munan chayqa, superintendente de servicio nisqa hermano, qayllapi kaj qotuchakuykunamanta ancianoswan parlarinman. Allin kanman mana ancha karupi kaj qotuchakuykunaj yanapallanta mañanan chayri maypichus chay qalluta ashkha parlanku, chaypi tarikoj qotuchakuykunaj yanapaynillanta. Chay qotuchakuykunamanta hermanosqa, willaypi waj qalluta parlajkunata tarispa, sutinta, maypichus tiyakusqanta qhelqaspa superintendente de servicio nisqa hermanoman jaywankuman. Superintendente de servicio nisqa hermanotaj, uj listaman qhelqaspa waj qallumanta qotuchakuyman chayri qotuman listata necesitajtin apachenqa. Waj qallumanta qotuchakuykunata chayri qotusta superintendentes de servicio nisqa hermanosqa, allinta yanapanankupajqa, sumajta wakichinanku tiyan, waj qallupi parlajkunaman Diosmanta willakunanpaj, yachakuyta munajkunata tarispataj chay qallupi parlaj qotuchakuyman chayri qotuman willananku tiyan.

Waj qalluta parlaj runa (chayri joqʼara runa) Diosmanta yachakuyta munajtenqa, Sírvase visitar (S-43) nisqa formularioman juntʼachina tiyan, chantá qotuchakuymanta secretario nisqa hermanoman jaywana. Ajinata ruwajtinchejqa, yachakuyta munajta Diosmanta yachanankupaj usqhayllata yanapasun (km 5/11 pág. 3 leey).

[6 paginapi recuadro]

¿Imaynatá waj qalluta parlajkunata maskʼasunman?

• Bibliamanta yachakojkunata, familiaresta, llankʼaymanta compañerosta, waj runasta ima tapurina.

• Directorio telefónico nisqapi, waj qalluta parlaj runaspa sutisninkuman rijchʼakoj sutista maskʼana. Chantapis waj qalluta parlajkuna maypichus tiyakusqankuta, sutisninkuta ima, Internetpi yachallasunmantaj.

• Chantapis waj qalluta parlaj runasta, gobiernoj oficinasninpi, yachaywasipi, bibliotecaspi ima maskʼallasunmantaj.

• Periodicopi qhawarina, ima tantakuychus ima ruwaychus kan waj qallusmanta.

• Waj qalluta parlajkuna, negociosman, tiendasman rinku chayman paykunata maskʼaj rina.

• Qhatuspi, universidadespi, estacionespi, terminalespi ima, permisota mañaspa uj mesapi publicacionesta waj qalluta parlaj runaspaj churasunman.

• Autoridades saqenku chayqa, tukuy qhawanankupaj Internetpi uj programata rantikuyta, mana chayri uj programapaj pagayta atikun.

[7 paginapi recuadro]

¿Imatá nisunman waj qalluta parlaj runasta maskʼashaspa?

Runasta kʼachamanta, jatunpaj qhawaspa tapurisunchej chayqa, mana sajrata noqanchejmanta yuyanqankuchu. Chay qallupi publicacionesninchejta rikuchejtinchej runa uyariyta munanku.

Napaykuytawan ichá nisunman: “Noqaykoqa, ______ qalluta parlajkunata maskʼashayku. ¿Pillatapis chay qalluta parlayta rejsinkichu?”, nispa.

Joqʼara runasta maskʼaspataj ichá nisunman: “Allin pʼunchay. Kay videota qhawarichisuyta munayki, nispa [DVD nisqata rikuchinapaj aparatopi, makiwan parlasqa versiculota rikuchiy.] Kay versiculoqa, makiwan parlaypi kashan. Joqʼara runaspaj ashkha videos kapuwayku chaykunataj mana qolqepajchu. ¿Joqʼara runata chayri mana allinta uyarisqanrayku makiwan parlaj runata rejsinkichu?”. Mana ni pimanta yuyarikojtintaj, ichá yachaywasipi, tiyakun chaynejpi, llankʼayninpi ima, joqʼara runas kanchus chayta tapurisunman.