Sonqo yuyayninchejta jarkʼana

1. ¿Imataj uj pʼunchaypaj jatun tantakuy sutikonqa, chantá imapajtaj wakichikun?

¹ Sapa pʼunchay sonqo yuyayninchejqa, pruebaman churakun. Septiembre 2012 watamanta, agosto 2013 watakama, uj pʼunchaypaj jatun tantakoyqa, “Sonqo yuyayninchejta jarkʼana”, nisqa sutikonqa (1 Tim. 1:18, 19). Jehová Dios, sonqo yuyayniyojta ruwawarqanchej. Chayraykutaj, sonqo yuyayninchejta imaynatachus apaykachashasqanchejta qhawarikunapaj chay tantakoyqa wakichikun.

2. ¿Ima tapuykunamantaj uj pʼunchaypaj jatun tantakuypi kutichikonqa?

² ¿Ima tapuykunaman kutichikonqa? Chay tantakuypeqa, sonqo yuyayninchejmanta kay qanchis tapuykunaman kutichikonqa:

• ¿Imastaj sonqo yuyayninchejta chʼichichanman?

• ¿Imataj sonqo yuyayninchejta yachachinapaj yanapawasun?

• Runa chinkayman rishasqanmanta, ¿imatá mana juchayoj kanapaj ruwasunman?

• Bibliaj yuyaychasqanpi, chayman jina kausaypi ima tʼukurispa, ¿imatá rikuchinchej?

• ¿Imatá ruwasunman wajkunaj sonqo yuyayninkuta mana nanachinapaj?

• ¿Imaynatá waynas chayri sipaskuna chʼampaykunapi tarikuspa cheqa sonqosllapuni kankuman?

• Sonqo yuyayninkuta jarkʼajkuna, ¿ima bendicionestataj japʼenqanku?

3. Uj pʼunchaypaj jatun tantakuypi sumajta yachakunapaj, ¿imatá ruwananchej tiyan?

³ Satanasqa, sonqo yuyayninchejta chʼichichananpaj tukuy imata ruwashan. Chaywanpis munakuyniyoj Tatanchej Jehovaqa, Biblianejta, llajtannejta sonqo yuyayninchej jarkʼasqa kananpaj yanapawanchej. Pay nin: “Kaymin cheqan ñanqa; chayninta riychej”, nispa (Isa. 30:21). Chantapis Jehovaqa, cheqan ñanninta rinallapajpuni uj pʼunchaypaj jatun tantakuynejta yanapallawanchejtaj. Chayrayku chay tantakuypi kananchejpaj kallpachakuna. Yachachikusqantataj sumajta uyarinanchej tiyan, chayman jinataj kausananchej tiyan. Chantá familiawan yachachikusqanmanta parlarina. Jehovaj yuyaychasqanman jina kausaspaqa, sonqo yuyayninchejta jarkʼasun, nitaj Satanaspa pachan sonqo yuyayninchejta chʼichichananta saqesunchu (1 Ped. 3:16).