Mayta llankʼasqanchejmanta kusikuna
1. ¿Imataj kusiyninchejta chinkachinman?
1 Runasqa, “tukuy ruwasqan[chej]wan” kusikunapaj ruwasqas kashanchej (Ecl. 2:24). Chayraykutaj willayninchejpi mana allinchu riwajtinchej llakikunchej chaytaj kusiyninchejta chinkachinman, sonqo kʼajayninchejtawan. ¿Imatataj ruwasunman mana jinapi rikukunapaj?
2. ¿Imaraykutaj maychus kajllata willayninchejmanta suyananchej tiyan?
2 Maychus kajllata willayninchejmanta suyana. Pisi runaslla Jesusta uyarejtinkupis, Jesusqa, willayninta sumajmanta juntʼarqa (Juan 17:4). Payqa, tarpoj runamanta rijchʼanachinanpi, Reinomanta muju mana tukuy runaspa sonqonkupichu wiñananta nerqa (Mat. 13:3-8, 18-22). Chaywanpis mayta kallpachakusqanchejqa mana qhasipajchu.
3. ¿Imaraykú willamullasunpuni runa mana uyariwajtinchejpis?
3 Sumaj poqoyta rikuchina. Jesuspa rijchʼanachinanpi nisqanman jina, Diospa Palabranta uyarejqa, “sumaj poqoyta” jina rikuchin (Mat. 13:23). Trigoqa, pʼutumuytawan umashajtin mana waj yurastachu poqon, manaqa trigo mujullatataj. Jinallataj uj cristianoj ruwayninpis, mana wajkunata Jesuspa discipulonman tukuchinanchejpunichu kashan, manaqa Reinomanta mujuta willayninchejnejta mayta tarpuna kashan. Chayta ruwaytaj may allin, imaraykuchus sonqo juntʼasqas, kusiywan willamullasunpuni runa mana uyariwajtinchejpis. Chantapis willamuspaqa, Diospa sutin jatunchasqa kananpaj yanapanchej (Isa. 43:10-12; Mat. 6:9). Dioswan khuska llankʼaytaj may sumaj (1 Cor. 3:9). Chantapis Jehová Diosninchejqa, runaman willaj rejtinchej kusikun (Heb. 13:15, 16).
4. ¿Imaraykutaj willayninchej mana qhasipajchu kasqanta nisunman?
4 Mayta llankʼasqanchejqa, sumaj poqoykunasniyoj kanman, mana rikojtinchejpis. Ichapis Jesuspa willayninta uyarejkunaqa, pay janaj pachaman kutipojtinraj discipulosninman tukorqanku. Kikillantaj Reinomanta willayninchejta mujuta jina tarpusqanchejwan, ichá runaj sonqonpi mana chay ratochu wiñanman, mana yachanallanchejtataj cheqa kajmanta yachakunkuman. Willayninchejqa, mana qhasichu kasqanrayku, “ashkha poqoyniyoj rama jina” kanallapuni, ajinamantataj Jesuspa discipulosnin kasqanchejta rikuchisunchej (Juan 15:8).