Precursor auxiliar kanaykipaj wakichikuy
1. Jesuspa Wañuyninta Yuyarina tiempo, ¿imajtintaj astawan willamunapaj may sumaj?
1 Jesuspa Wañuyninta Yuyarina tiempoqa, astawan willamunapaj may sumaj. Chay killasqa, Jehová mayta munakuwasqanchejrayku, Churinta noqanchejrayku qosqanpi tʼukurinchej (Juan 3:16). May agredecesqa kasqanchejraykutaj, Jehovamanta, runaspaj imastachus ruwashasqanmanta ima wajkunawan parlanchej (Isa. 12:4, 5; Luc. 6:45). Chantapis vecinosninchejta, familiaresninchejta, rejsisqasninchejta ima, Jesuspa Wañuyninta Yuyarinapaj tantakuyman wajyarispa, ¡mayta kusikunchej! Chay tantakuyman jamojkunatataj Bibliamanta yachakunallankupajpuni yanapanchej. Chayrayku marzo, abril, mayo killaspi, precursor auxiliar jina llankʼanaykipaj kallpachakuy.
2. ¿Imaraykutaj marzo killa precursor auxiliar kanapaj sumaj kanqa?
2 Marzo killaqa sumaj kanqa. Marzo killaqa precursor auxiliar jina llankʼanapaj sumaj kanqa, imajtinchus 30 chayri 50 horasta willamuyta ajllayta atisun. Qotuchakuykunata waturej hermano, qotuchakuyninchejta chay killapi waturenqa chaytaj, precursores regulareswan, especialeswan ima tukuy tantakuyninkupi kayta atisun. Kay wataqa, marzo 26 pʼunchayta Jesuspa wañuyninta yuyarisun. Marzo 1 pʼunchaymantapachataj runasta wajyarisunchej. Pasaj watasmanta nisqaqa, astawan tiempota invitacionesta jaywarisun. Chantapis marzo killaqa phishqa sabadosniyoj, phishqa domingosniyojtaj. Chayrayku chay killapi astawan willamunapaj kallpachakuna.
3. Astawan willaj llojsinaykipaj, ¿imastá ruwawaj?
3 Wakichikullayña. Precursor auxiliar kanaykipaj imaynatachus tiempochakunaykipi tʼukuriy. Allin kanman Familiapi Diosta Yupaychanapaj Chʼisipi, chay killaspi astawan willamunaykichejpaj parlarinaykichej, chayman jinataj wakichikuychej (Pro. 15:22). Manapuni precursor auxiliar kayta atispataj, ichapis willaj llojsispa astawan unaysituta qheparikuwaj. Manaqa semanapi uj pʼunchaytawan willaj llojsiwaj.
4. Marzo, abril, mayo killaspi astawan willamojtinchej, ¿ima bendicionestataj japʼisun?
4 Marzo, abril, mayo killaspi astawan willayman rinapaj kallpachakuspaqa, Jehovata sirvispa, runa masinchejta yanapaspa ima, astawan sonqo juntʼasqa kasunchej (Juan 4:34; Hech. 20:35). Chantapis kallpachakusqanchejqa Jehovata kusichenqa, chaytaj may sumajpuni (Pro. 27:11).