¿Imataj willanapaj tanqawanchej?
1. ¿Imataj willamunapaj tanqawanchej?
1 Diospa Reinonmanta willayqa, ima ruwaymantapis aswan sumaj. Chayta ruwaspaqa, kay iskay jatun kamachiykunata juntʼanchej: Jehovata, runa masinchejta ima munakuyta (Mar. 12:29-31). Arí, sonqo kʼajaywan willanapaj, munakuyninchej tanqawanchej (1 Juan 5:3).
2. Runaman willamuspa, ¿imaraykutaj Jehovata munakusqanchejta rikuchinchej?
2 Jehovata munakuy. Amigonchej Jehovata munakusqanchejrayku, sutin llimphuchasqa kananpaj yanapayta munanchej. Imajtinchus Satanasqa, 6.000 watastaña Jehovaj sutinta chʼichichan (2 Cor. 4:3, 4). Chayraykutaj runaqa creenku, Dios runasta mana munakusqanta, juchasapasta infiernopi qʼolachisqanta, Tata, Churi, espíritu santo ima, ujlla kasqankuta. Ashkha runaspajtaj, Diosqa mana kanchu. ¿Nichu munasunman, Diosninchejmanta cheqa kajta yachanankuta? Paymanta cheqa kajta rejsichinapaj kallpachakusun chayqa, sonqonta kusichisun, Supaytataj phiñachisun (Pro. 27:11; Heb. 13:15, 16).
3. Willamuspa, ¿imaraykutaj runa masinchejta munakusqanchejta rikuchinchej?
3 Runa masinchejta munakuy. Sapa runaman willajtinchej, munakusqanchejta rikuchinchej. Sajra pʼunchaykunapi kausasqanchejrayku, runaqa ni jaykʼaj jina sumaj willaykunata uyariyta necesitan. Ashkha runas, Jonaspa tiemponmanta ninivitas jina kanku, “pikunachus mana yacha[rqa]nkuchu imachus jucha kasqanta” (Jon. 4:11). Willayninchejqa, runas kusisqa, sonqo juntʼasqa, suyakuyniyoj kanankupaj ima yanapan (Isa. 48:17-19; Rom. 15:4). Runas willasqanchejta japʼikojtinku, chayman jinataj ruwajtinku, salvakonqanku (Rom. 10:13, 14).
4. ¿Imatataj Jehová ni jaykʼaj qonqanqachu?
4 Sumaj wawaqa tatanta munakusqanta tukuy tiempo rikuchin, mana wakin kutisllachu. Ajinallatataj Jehovata, runa masinchejta ima munakuspaqa, tukuy tiempo willamusun, manataj wakin kutisllachu. Chayrayku willamunallapuni (Hech. 5:42). Diostaj sutinta munakusqanchejta, ni jaykʼaj qonqanqachu (Heb. 6:10).