Profetasmanta yachaqakuna: Joel
1. ¿Imaynatá willaypi Joel jina llampʼu sonqo kasunman?
1 ¿Pitaj profeta Joel karqa? Sutinta apaj libroqa, “Petuelpa churin” kasqanta nin (Joel 1:1). Kay llampʼu sonqo profetaqa, mana rejsichikuytachu maskʼarqa, astawanqa Jehovaj willayninta rejsicherqa. Noqanchejpis mana runaswan rejsichikunapajchu, nitaj jatunpaj qhawachikunapajchu willanchej. Manaqa Jehovata, Palabranta ima rejsinankupaj (1 Cor. 9:16; 2 Cor. 3:5). Chay willaytaj, ¡mayta kallpachawanchej! Joelpa profecianmanta imachus sonqo kʼajayniyoj, suyakuyniyoj ima kanapaj yanapawasqanchejta qhawarina.
2. Diospa pʼunchaynin qayllapiña kasqanrayku, ¿imatá ruwananchej tiyan?
2 “Diospa pʼunchaynenqa qayllamushanña” (Joel 1:15). Kay palabras may unayña qhelqakojtinpis, kay tiempopi juntʼakushallantaj. Sapa kuti astawan chʼampaykuna tiyan. Runaspis asipayawanchej, nitaj uyariyta munawanchejchu. Chaytaj tukukuy pʼunchaykunapi kashasqanchejta rikuchiwanchej (2 Tim. 3:1-5; 2 Ped. 3:3, 4). Tukukuy qayllapiña kasqanrayku, runaman willayta ñaupajman churana tiyan (2 Ped. 3:11, 12).
3. Jatun ñakʼariy qayllamusqanman jina, ¿imajtin tukuy atisqanchejta willamuna tiyan?
3 Jehovaqa llajtanpaj ‘jarkʼakojnin’ (Joel 3:16). Kay versiculopi “cielopis, kay pachapis kharkatitenqanku” nillantaj. Chaytaj jatun ñakʼariy kashajtin, Jehová runasta juzgananmanta parlashan. Cheqa sonqo kamachisninta salvananta yachayqa, ¡mayta kallpachawanchej! (Apo. 7:9, 14.) Tukuy atisqanchejta willajtinchej, Jehová kallpachanawanchejta, yanapanawanchejta ima saqejtinchej, creeyninchej yapakonqa, sinchʼi sayasqataj kasun. Jatun ñakʼariy tiempopitaj muchuyta atisun.
4. Qhepaman imachus kananta, ¿manchachikunachu tiyan? Sutʼinchay.
4 Wakinkuna Joel llakiykunallamanta parlasqanta nejtinkupis, Diospa llajtanman sumaj suyakuyta qowanchej (Joel 2:32). Chayrayku qhepaman imachus kananta mana manchachikunachu, Diospa Reinonmanta sumaj willaykunatataj sonqo kʼajaywan rejsichina. Chantá Joel 2:23 nisqanta kasukuna: “Kusikuychej Tukuy Atiyniyoj [...] Diospi”, nispa.