Profetasmanta yachaqakuna: Oseas
1. Jehovapi tʼukurispa, ¿imatá tapukunchej?
1 Jehová kʼacha, khuyakuyniyojtaj kasqanpi tʼukurejtinchej, ichapis tapukunchej: “¿Imaynatá Jehovaman pagaymanrí?”, nispa (Sal. 103:2-4; 116:12). Profeta Oseasqa, Diosta tukuy sonqo kasukorqa, wakin imasta mana ruwayta atillajtinpis. ¿Imatataj paymanta yachakusunman?
2. ¿Imaynatá Oseaspa ruwasqan mana saykʼuspa willanallapajpuni yanapawanchej?
2 Mana atikojtinpis willamunallapuni. Oseasqa Israelpa 10 ayllusninman astawan willarqa. Maypichus runaqa niña Jehovata sirvisharqachu. Reyninku Jeroboampis, Diospa ñaupaqenpi sajrata ruwarqa. Ñaupaj rey Jeroboam jinallataj, israelitasta waka uña lantista yupaychayman tanqaj (2 Rey. 14:23, 24). Pay qhepata yaykoj reyespis, kikillantapuni ruwarqanku. Chaynejta Israel llajta 740 watapi Jesús niraj jamushajtin chinkachisqa karqa. Oseasqa, ajina runas chaupipi 59 watasta mana saykʼuspa Diosmanta willarqa. ¿Kikintachu ruwasun runa churanakojtin chayri mana uyarikojtinpis? (2 Tim. 4:2.)
3. ¿Imaynatá Oseaspa kausaynin Jehovaj khuyakuyninta rikucherqa?
3 Jehovaj khuyakuyninpi tʼukurina. Jehová Oseasman kamacherqa: “Riy warmillikamuy uj phisu warmiwan”, nispa (Ose. 1:2). Warmin Gomertaj, qhari wawata paypaj nacechikorqa. Chaywanpis qhepan iskay wawasnenqa, nisina Oseaspajchu karqa. Jinapis warminta perdonarqa, nitaj saqerparqachu. Chaytaj Jehová wasanchaj Israelta ashkhata khuyakusqanta rikucherqa (Ose. 3:1; Rom. 9:22-26). ¿Noqanchejrí? Jehovaj khuyakuyninta tukuyman rejsichinapaj, ¿tukuy atisqanchejtachu ruwasun? (1 Cor. 9:19-23.)
4. Jehovata agradecekuspa, ¿imastá ruwasun?
4 Jehovaj wakin kamachisnenqa, astawan willamunapaj sumaj trabajosta saqenku. Wakintaj Diospa Reinonta ñaupajman churanapaj, mana casarakunkuchu, nitaj wawasniyojchu kanku. Chaywanpis ichá ninchej: “Nisina Oseas jina ruwayta atiymanchu”, nispa. Jinapis Jehovaqa, kʼacha munakuyninta agradecekojtinchej, espíritu santonpi atienekojtinchej ima, Oseasta jina mana atisqanchej imasta ruwanapajpis kallpachawasun (Mat. 19:26; Fili. 2:13).