Runa uyariyta munananpaj jina parlarina
1. ¿Imaraykú parlasqanchej runas miskʼichikunankupaj jina kanan tiyan?
1 Imaynatachus miskʼi mikhuyta llamirispa astawan munanchej. Ajinallatataj runasqa, qallariypi parlasqanchejwan miskʼichikojtinku, astawan uyariyta munanqanku. Chayrayku imatachus ninanchejpi sumajta tʼukurina, wakichikunataj (Pro. 15:28). Imamantachus, mashkha unaytatajchus parlarinanchejpi tʼukurispapis, ¿imaspiwan tʼukurisunman?
2. Runa yachayta munananpaj jina parlanapaj, ¿imatá ruwasunman?
2 ¿Imamantá runa yachayta munanman? Runa mana yachayta munananpaj jina parlajtinchejqa, mana uyariwasunchu. Chayrayku tʼukurina: ¿Imastaj runasta llakichin? ¿Mana uj sumaj gobierno kasqanchu? ¿Familiachu? ¿Chʼajwas kasqanchu? Runasqa imatachus yuyasqankumanta parlariyta munanku, chayrayku parlarinawanchejpaj jina tapurina. Ichapis Reinomanta Willayninchejpi yuyaychakusqanman jina parlarisunman. Chantapis Familiapi Diosta Yupaychashaspaqa, willashasunmanñapis jina ruwasunman.
3. ¿Imaynatá runaspa ususninkuman jina, chayri creenciasninkuman jina willasunman?
3 Ususninkupi, creenciasninkupi tʼukurina. Wakin lugarespi, runasqa imapajchus visitasqanchejta chay rato willanata munanku. Wakinnejpitaj, wasiyojta imaynachus kashasqanta ñaupajta tapurina, chayri imallamantapis parlarina. Bibliata jatunpaj qhawaj lugarespeqa, Bibliamanta parlarisunmanpacha (Hech. 2:14-17). Maypichus runas mana cristianoschu kanku, chayri mana Diospi creenkuchu chaykunapitaj, qhepan kutispiraj Bibliamanta parlarina tiyan (Hech. 17:22-31).
4. ¿Imaraykú imaynatachus qallarinapi tʼukurina?
4 Qallariypi nisqanchej. Imaynatachus qallarinapi sumajta tʼukurina. Sutʼita, pisillatataj parlarina. Imaynatachus chayta ninapipis tʼukurinallataj. Kusiywan parlarina. Kʼachamanta parlarejtinchej, wasiyojqa yanapayta munasqanchejta rikonqa. Kay yuyaychaykunata kasukojtinchej, runas uyariyta munanankupaj jina parlarisun. Paykunataj Jehovaj “mikhunanmanta mikhu[yta]” munanqanku (1 Cor. 10:21).