Profetasmanta yachaqakuna: Miqueas
1. ¿Imatá Miqueas ichá tapukorqa? Chantá, ¿willasqan qhasipajchu karqa?
1 Ichá tapukorqanchej: “¿Maykʼaj kay sajra pacha tukukonqa?”, nispa. Profeta Miqueasqa, Israelman, Judaman ima Jehovaj juiciosninta willashajtin, ichá kikillantataj tapukorqa. Jinapis mana qhasitachu Jehovaj nisqanta willarqa. Imaraykuchus Jehovaqa, nisqanman jina Samaria llajtata 740 watapi (J.n.j) thuñerqa, Miqueas kausashajtinraj (Miq. 1:6, 7). Chantá 607 watapi (J.n.j), Jerusalenñataj thuñisqa karqa (Miq. 3:12). Noqanchejrí, ¿imaynatá Miqueas jina ruwasunman Jehová kay pachata tukuchinanta suyakushaspa?
2. ¿Imaraykú Jehovaj pʼunchayninta pacienciawan suyakuna tiyan? Suyakushaspataj, ¿imatá ruwananchej tiyan?
2 Pacienciayoj kana. Miqueas qhelqarqa: “Noqatajrí Tata Diospi atienekusaj; salvawajniy Diosnillaypi suyakusaj”, nispa (Miq. 7:7). “Suyakusaj” nispaqa, mana jinalla qhepakunantachu nisharqa. Astawanpis profeta llankʼayninta allinta juntʼarqa. Noqanchejpis Jehovaj pʼunchaynin chayamunankama, “juchamanta tʼaqasqa, cheqan kajman jina” kausakuspa willamunallapuni (2 Ped. 3:11, 12). Jehovaqa tukuy runas payman kutirikunankupaj pacienciakun (2 Ped. 3:9). Chayrayku Biblia nisqanman jina, profetas jina pacienciayoj kana (Sant. 5:10).
3. ¿Imaraykú Jehovamanta espíritu santonta mañakuna tiyan?
3 Jehová kallpachanawanchejpi atienekuna. Miqueaspa llankʼaynenqa, mana atinapaj jinallachu karqa. Chayrayku Jehovamanta kallpata mañakorqa (Miq. 3:8). Jehovaqa, yanapanta necesitasqanchejta yachan. Bibliataj paymanta kallpata mañakunata niwanchej. Saykʼojtinchejpis, Diosqa yupaychayninpi ruwanasninchejta juntʼanapaj yanapawasun (Sal. 84:5, 7; Isa. 40:28-31). Ashkhas jinapuni kasqanta nisunman. Chayrayku Diosmanta espíritu santonta mañakunallapuni (Luc. 11:13).
4. ¿Imatá Miqueaspa kausayninmanta yachakusunman?
4 Miqueasqa, Jehovaj munayninta ruwayta ñaupajmanpuni churarqa. Sajra runas chaupipi kausakuspapis, mana paykuna jinachu ruwarqa. Noqanchejpis sapa pʼunchay sajra ruwayman tanqasqa kanchej. Chayrayku Jehová Diospa sutinpi wiñaypaj purinallapajpuni kallpachakuna (Miq. 4:5).