Pisillata leejkunata yanapana
1. Mana allinta leejkunata Diosmanta yachachiy, ¿atikullanchu? ¿Imaraykutaj?
1 Willasqanchej runasmanta wakenqa, Diosmanta yachakuyta munanku. Chaywanpis mana allinta leeyta yachasqankurayku, Bibliata chayri uj librota rikuspa manchachikunku. Jina kajtin, mana Yachachin librowan qallariyta atisunmanchu. ¿Imaynatá chay runasta Diosta rejsinankupaj yanapasunman? Unaytaña willaj hermanosta 20 kuraj suyuspi tapurerqayku. Kay yachaqanataj, imastachus paykuna ruwasqankumanta parlan.
2. Pisillata leejkunata yachachinapaj, ¿ima yanapastaj kapuwanchej?
2 Yachakoj pisillata chayri mana leeyta yachanchu chayqa, Diosta uyariy chayri Diosta uyariy wiñay wiñaypaqtaq kawsanki nisqa folletoswan yachachisunman. Estados Unidosmanta uj precursorqa, runasman iskaynin folletosta rikuchiyta yachan. Chantataj mayqenwanchus yachakuyta munasqanta ajllachin. Kenia sucursalmanta hermanosqa, chay folletos mayta yanapakusqanta ninku. Imaraykuchus Africamanta runasqa, cuentitusta uyarispa imatapis yachakunku, manataj tapuykunawan ukhunchaspachu. Colegiota tukuchaj runaqa, leeytawan tapuykunaman kutichispa yachakuyta atillanman. Jinapis escuelata mana tukuchajqa, ichapis mana kikinta yachakuyta atenqachu. Ashkha hermanos, pisillata leeyta yachajkunaman ¡Diosmanta jamoj sumaj willaykuna!, Diospa masin kayta atinki nisqa folletoswan yachachinku, manaqa Biblia yachachisqanmanta librituy nisqawan.
3. Mana leeyta yachajkunata yachachinapaj, ¿imatá ruwasunman?
3 Kallpachana. Mana leeyta yachajkunaqa pʼenqakunkuman, ni imata yachasqankutataj yuyankuman. Chayrayku cheqa kajta yachachinapaj, mana manchachikunankupaj ñaupajta yanapana. Mana leeyta yachaj runaspis yuyayniyoj kanku, yachakunkumantaj. Chayrayku ama paykunata pisipaj qhawanachu (1 Ped. 3:15). Diosmanta yachakuspa ñauparishasqankuta reparajtinkoqa, yachakuyta munallanqankupuni. Chayrayku sapa atispa, sumajta ruwashasqankuta nispa kallpachana.
4. ¿Imaynatá pisillata leejkunata wakichikunankupaj yanapasunman?
4 Yachakoj pisillata leejtinpis, wakichikunanta niy. Sudafricamanta wakin hermanosqa, paykunawan yachakoj runasman leeyta yachaj familiarninkuwan chayri amigonkuwan yanapachikunankuta yuyaychanku. Gran Bretañamanta uj hermanoqa, wakin parrafosta ukhunchashajtinku yachakojman libronta mañariyta yachan. Jinamanta, yachakojqa libro wakichisqa kajtin, kutichiyninta aswan usqhayta tarisqanta reparan. India suyumanta uj hermanoqa, yachakojman niyta yachan: “Qhepanpaj, kay yachaqanaj dibujosninta qhawarishawaj, chaypitaj tʼukurishawaj”, nispa.
5. Yachachishaspa, ¿imaynatá pacienciayoj kasqanchejta rikuchisunman?
5 Pacienciayoj kana. Yachaqanaj jatun yachachiykunasnillanta yachakojman sumajta entiendechina. Qallariypeqa, 10 chayri 15 minutosllata yachachisunman. Ama ujllapi ashkhata yachachinachu, manaqa pisimanta pisi. Yachakoj ñakʼayllata leejtinpis, pacienciawan uyarina. Jehovata munakusqanman jina, aswan sumajta leeyta munallanqa. Chaypajtaj yachakojta qallariymantapacha tantakuyman wajyarina.
Mana leeyta yachajkunaqa pʼenqakunkuman, ni imata yachasqankutataj yuyankuman. Chayrayku cheqa kajta yachachinapaj, mana manchachikunankupaj ñaupajta yanapana
6. ¿Imaynatá yachakojman leeyta yachachisunman?
6 Yachakoj sumajta leeyta yachajtin astawan ñauparenqa (Sal. 1:1-3). Ashkha hermanosqa, yachachiytawan Ñawiriyman qillqayman qukuy, nisqa folletowan pisi minutosllapi yanapanku. Yachakoj manapuni atisqanta yuyajtenqa, ashkha imastaña yachakusqanta yuyarichina. Chantá kallpachakusqanrayku Jehová bendecinanta, paypa yanapantataj mañakunanta nina (Pro. 16:3; 1 Juan 5:14, 15). Gran Bretañamanta wakin hermanosqa, yachakojkunata atisqankuman jinalla yachakunankupaj kallpachanku. Ñaupajta abecedariopi letrasta yachakunankuta ninku. Chantá Bibliaj textosninta tarinankupaj, leenankupaj ima kallpachanku. Chantataj sutʼita entiendenapaj ruwasqa publicacionesta leenankuta ninku. Wakin kutispi runasta leeyta yachachinapajqa, ñaupajta leeyta munanankupaj yanapana.
7. ¿Imaraykú mana allinta leeyta yachajkunamanpis cheqa kajta yachachinanchej tiyan?
7 Jehovaqa mana leeyta yachajkunallatachu jatunpaj qhawan (Job 34:19). Payqa runaj sonqonta rejsin (1 Cró. 28:9). Chayrayku mana allinta leeyta yachajkunamanpis, cheqa kajta yachachinanchej tiyan. Chayta ruwanapaj ashkha yanapas kapuwanchej. Yachakoj ñauparisqanman jinataj, Yachachin librowan Bibliaj ukhu yachachiykunasninta yachachisunman.