Profetasmanta yachaqakuna: Sofonías
1. Profeta Sofoniaspa tiemponpi, ¿imastaj rikukorqa? ¿Imatá paymanta yachakunchej?
1 Judá llajtapeqa 2600 watas jinaña, Baalta yupaychaj kanku. Sajra rey Amontataj niraj unaychu wañucherqanku, Josiastaj waynitallaraj kamachiyta qallarerqa (2 Cró. 33:21–34:1). Chay tiempopi Jehovaqa, Sofoniasta ajllarqa juicio pʼunchayninmanta willamunanpaj. Sofoniasqa ichá reypa familian ukhumanta karqa. Jinapis payqa, mana manchachikuspa Diospa juicionta chay llajtamanta kamachejkunaman willarqa (Sof. 1:1; 3:1-4). Noqanchejpis chay profeta jina, mana manchachikuspa willanapaj kallpachakunchej, Diostataj yupaychallasunpuni familiaresninchej churanakojtinkupis (Mat. 10:34-37). ¿Ima willaytataj Sofonías runasman rejsicherqa? ¿Imayná rerqa?
2. ¿Imatataj ruwananchej tiyan Jehovaj “phiñakuy pʼunchaynimpi” waqaychasqa kananchejpaj?
2 Jehová “Diosta maskʼaychej.” Jehovalla phiñakuy pʼunchayninmanta runasta salvayta atin. Chayrayku Sofoniasqa, runasman tiempollaraj kashajtin Diosta maskʼanankuta, cheqa kaj imasta ruwanankuta, kʼumuykukunankuta ima nerqa (Sof. 2:1-3). Sofonías jinallataj runasman Diosta maskʼanankuta nishanchej chayqa, noqanchejpis, maskʼanallanchejtaj tiyan, ni jaykʼajtaj Paymanta karunchakuyta yuyanachu (Sof. 1:6). ¿Imaynatá Jehovata maskʼanchej? Bibliata sumajta estudiaspa, Diospa yanapaynintataj mañakuspa. Chantapis cheqa kaj imasta ruwanchej kausayninchejta mana chʼichichaspa. Kʼumuykukuytataj maskʼanchej Jehovaj llajtanpi kamachikusqanman jina ruwaspa.
3. ¿Imaraykú Reinomanta mujuta tarpunallapuni?
3 ¿Imayná rerqa? Sofoniaspa willaynenqa Judá llajtamanta wakin runasta yanaparqa astawanraj Josiasta. Josiasqa waynallaraj kashaspa, Diosta maskʼayta qallarerqa. Aswan qhepamantaj Judá llajtamanta lanti yupaychayta chinkacherqa (2 Cró. 34:2-5). Kunanpis Diospa Reinonmanta mujuta tarpusqanchejqa, wakin kutispi rumirara jallpʼaman urman chayri khishkarara jallpʼaman. Wakin kutispitaj, sumaj jallpʼaman urman chaypitaj sumajta poqon (Mat. 13:18-23). Reinomanta mujuta tarpunapaj tukuy atisqanchejta ruwajtinchejqa, Jehová bendecillawasunpuni (Sal. 126:6).
4. ¿Imaraykutaj Jehovaj pʼunchaynin chayamunanta suyanallapuni kanman?
4 Judamanta wakin runasqa, Jehová ni ima jasutʼiyta apamunanta yuyarqanku. Chaywanpis Jehovaqa jatun pʼunchaynin qayllapiñapuni kasqanta nerqa (Sof. 1:12, 14). Diospi atienekojkunalla salvakuyta atinkuman karqa. (Sof. 3:12, 17). Chayrayku Jehovaj pʼunchaynin chayamunankama suyanallapuni, kamachisninwan khuskataj kusiywan sirvinallapuni (Sof. 3:8, 9).