¿Allinpajchu Dios qhawawan?
1. ¿Imaynapitaj Biblia uj espejo jina?
1 Runasqa rijchʼayninchejta allinchanapaj sapa pʼunchay espejopi qhawarikunchejpuni. Bibliaqa uj espejo jina, leerijtinchejtaj imayna sonqoyojchus kasqanchejta rikuchiwanchej. Chay sonqonchejtataj Jehovapis rikullantaj (1 Sam. 16:7; Sant. 1:22-24). Bibliaqa runaj “yuyasqanta, sonqompi imatachus munasqantapis sutʼita rikuchin allinchus, manachus kasqanta” (Heb. 4:12). Bibliata sapa pʼunchay leespa, chaypi tʼukurispa ima, aswan sumaj willajkuna kanapaj imaspichus llankʼayta necesitasqanchejta yachasunchej, ¿imaraykú chayta ninchej? (Sal. 1:1-3.)
2. ¿Imaynatá Biblia yanapawanchej imaynachus kasqanchejta reparanapaj?
2 Uj espejowan jina Bibliawan qhawakuy. Jehovaj cheqa sonqo kamachisninmanta Bibliapi leeyqa, ima kʼacha kaykunachus Paypaj ñawisninman allin kasqanta reparanapaj yanapawanchej. Sutʼincharina, Davidqa Diospa sutinta sonqo kʼajaywan jatuncharqa (1 Sam. 17:45, 46). Profeta Isaiaspis, Diosmanta sajra runasman mana manchachikuspa willarqa (Isa. 6:8, 9). Jesuspis, Tatanta mayta munakusqanrayku, willaytaqa uj kallpachaj llankʼayta jina qhawarqa nitaj llasa qʼepita jinachu (Juan 4:34). Ñaupa tiempomanta cristianosqa, Jehovapi atienekuspa, sonqo kʼajaywan willanallankutapuni nerqanku (Hech. 5:41, 42; 2 Cor. 4:1; 2 Tim. 4:17). Paykunaj ruwasqasninkupi tʼukureyqa, Diosta astawan sumajta sirvinapaj imaspichus llankʼayta necesitasqanchejta reparachiwasun.
3. ¿Imaraykutaj kausayninchejta usqhayllata allinchana tiyan?
3 Mana allin kajta allinchana. Espejopi qhawarikullasun nitaj ni imata allinchakusun chayqa, qhasilla kanqa. Jehovamanta mañakusunman, imaspichus kausayninchejta allinchana kasqanta reparanapaj (Sal. 139:23, 24; Luc. 11:13). Allinchana kajtenqa, usqhayllata allinchana. Imaraykuchus pisi tiempollaña tiyan salvakunapaj, jinallataj wajkunata salvananchejpajpis (1 Cor. 7:29; 1 Tim. 4:16).
4. Uj runa Diospa Palabranman jina kausayninta allinchajtin, ¿imatá tarenqa?
4 Imayna sonqoyojchus kasqanchejta Jehová qhawan, chaytaj aswan sumaj rijchʼaynillanchejmanta nisqaqa (1 Ped. 3:3, 4). Uj runa Diospa Palabranman jina kausayninta allinchajtin, chay runaqa mana ‘qonqapojllachu kaspa leypa kamachisqanta juntʼanqa, kusikuyniyojtaj ruwasqampi’ kanqa (Sant. 1:25). Arí, aswan kusisqas, sumajta willayta atisunchej. Imajtinchus ‘uj espejopi jina Diospa jatun kayninta’ rikuchisunchej (2 Cor. 3:18).