Diospa Reinonmanta 100 watastaña willashanchej
1. Pachaj watas ñaupajtaña Jehovaj llajtanta, ¿imatá ruwanankupajtaj kallpachakorqa?
1 Hermano Rutherford Diospa Reinonmanta Jallpʼantinpi willakunanpaj, Jehovaj llajtanta kallpacharqa: “¡Qhawariychej, Reyqa kamachishan! Qankunataj willajkunasnin kankichej. Chayrayku Reymanta, reinonmantawan, willamuychej, willamuychej, willamuychejpuni”, nispa. Chay nisqanmanta 100 watasña kashajtinpis, ñaupa tiempomanta cristianos jina, chay Reinomanta “tukuy kay pachapi kajkunaman” willamorqanchej (Col. 1:23). ¿Imastá Reinomanta willakunanpaj ruwarqanchej? Diospa Reinon, 100 watasninta juntʼanankama, ¿imaynamantá willamullasunpuni?
2. ¿Imaynatá publicacionesninchej Diospa Reinonmanta unaymantaña willashanku?
2 ¿Imaynatá willayta qallarikorqa? Publicacionesninchejqa unaymantaña Reinomanta willashanku. Kay 1939 watamantapacha Torremanta Qhawaj. Jehová Diospa Reinonmanta willashan nisqa revistata orqhokorqa. Chay revistaqa Diospa Reinonmanta, imatachus tumpamantawan ruwananta ima sutʼinchan. ¡Despertad! revistataj chay Reinolla runaspa chʼampayninkuta allinchayta atisqanta sutʼinchan. Mayta kusikunchej chay iskay revistas, ni mayqen revistas jina ashkha qallusman tijrachikushasqanta, ashkha runasmantaj chayashasqanta (Apo. 14:6).
3. ¿Imaynasmantá Reinomanta willakorqa?
3 Jehovaj llajtanqa tukuy imaymanamanta Diospa Reinonmanta willarqa. Ñaupajtaqa parlantesniyoj autoswan, tocachinapaj aparatoswan chayri radionejta willakorqa. Chaykunawan willayqa, chay tiempopi pisillaraj willajkuna kajtinpis, ashkha runasman willakunanpaj yanaparqa (Sal. 19:4). Kay pasaj watasllapiraj jw.org nisqanejta, may chhika runasman Diospa Reinonmanta willakushan, maypichus mana willajta saqewanchejchu chay lugaresmanpis.
4. Astawan runasman willanapaj, ¿imatataj ruwakorqa?
4 Jehovaj llajtanqa runasman astawan willamunanpaj tukuy imata ruwan. Kay 1990 wata chaynejmantapacha parquespi, paradaspi, mercadospi ima willanapaj kallpachakorqa. Kunantaj niraj unaychu, maypichus ashkha runas purinku chaypi, mesaspi, carritospi ima, publicacionesta churaspa willakushan. Kay tiempopi waj jinasmantañataj willakojtinpis, wasimanta wasi rispa willaytaqa mana saqenchejchu (Hech. 20:20).
5. Septiembre killamantapacha, ¿imatá ruwayta atinchej?
5 ¿Imastawan ruwasunman? Septiembre killamantapacha, ashkhas precursores regulares jina llankʼayta atenqanku. Mana precursor regular jina llankʼaspapis, tʼukurerqankichu, ¿ima killaspichus precursor auxiliar jina llankʼayta atisqaykita? Precursor jina llankʼayta mana atejtiykipis, Reinomanta astawan willanaykipaj kallpachakusqaykita Jehová bendicenqapuni (Mal. 3:10).
6. ¿Imaraykú kay wata, octubre killa uj sumaj killa kanqa?
6 Kay watapi, octubre killapi Diospa Reinon 100 watasninta juntʼanqa. Chayrayku Torremanta Qhawaj, 1 octubre killamanta revistaqa, Diospa Reinonmanta parlanqa. Mayta kallpachakuna chay revistata ashkha runasman jaywanapaj. Chayrayku tukuyninchej sumajta llankʼaspa “Diospa reinonmanta” uyarejkunaman willamunallapuni (Hech. 8:12).