Cieguitosta yanapana Jehovamanta yachakunankupaj
1. ¿Imaynatá Jesús cieguitosta khuyakusqanta rikucherqa?
1 Jesusqa Jericó llajtamanta ripunanpajña kashajtin, iskay cieguitos qhaparerqanku: “Señor, [...] khuyariwayku ari”, nispa. Jesusqa wañupunan pʼunchay qayllapiña kasqanmanta llakisqa kaspapis, chay cieguitosta wajyarqa, jamperqataj (Mat. 20:29-34). ¿Imaynatá Jesús jina khuyakuyta rikuchisunman?
2. ¿Imaynatá cieguitosman willarisunman callepi tinkukuspa?
2 Yanaparina. Callepi uj cieguitowan tinkukuspaqa, pichus kasqanchejta willarisunman, yanaparisunmantaj. Ichá qallariypeqa mana kasullawasunchu, imaraykuchus wakin runasqa cieguitota rikuspa suwarpanku chayri imanarpanku. Jinapis kʼachas paykunawan kajtinchej, allinnintataj maskʼajtinchejqa ichá mana manchikuwasunchu. Chantapis ama qonqanachu wakenqa pisillatapis rikusqankuta, wakintaj manapuni. Chayta yachayqa imaynatachus yanaparinapaj yanapawasun. Yanapariytawantaj nisunman Bibliamanta yachachisqanchejta. Leeripusunmantaj Salmo 146:8 chayri Isaías 35:5, 6. Braille qhelqaypi makisninwan leeyta yachan chayqa ichá nisunman chay qhelqaypi publicaciones kapuwasqanchejta, tapurisunmantaj chayta munasqantachus manachus. Chantapis yachachillasunmantaj jw.org nisqamanta imaynatachus uraqachiyta atisqanta. Computadoran pantallapi rikhurej qhelqasqata leeyta atin chayqa, jw.org nisqamanta publicacionesta RTF nisqapi uraqachiyta atillanmantaj. (“Cieguitota yanaparishaspa...” nisqa recuadrota qhawariy.)
3. Willanchej chaypi, ¿imaynatá cieguitosta tarisunman?
3 Cieguitosta maskʼana. Wasimanta wasi willaspaqa, mana cieguitosta taripayta atillanchejchu. Imajtinchus paykunaqa mana rejsisqaswan mana parlariyta munallankuchu. Chayrayku, paykunata tarinapaj, Diosmanta willarinapajtaj mayta kallpachakuna (Mat. 10:11). Llankʼayninchejpi chayri escuelapi ujnin compañeronchej cieguito kajtenqa, Diosmanta parlarina. Maypichus willanchej chaypi cieguitospaj uj escuela kan chayqa, ichá directorta tapurisunman: “¿Bibliotecaykipaj braille qhelqaypi publicacionesta apanpuykumanchu?”, nispa. Ichá uj cieguitota rejsinchej chayri willanchej chaypi cieguitosta yanapaj organizaciones chayri waj onqoyniyoj kajkunapaj wasispi cieguitos tiyasqankuta yachanchej. Jina kajtenqa cieguitoj familianman, visitasta atiendej encargadoman chayri chay escuelamanta directorman sutʼincharisunman, Jehovaj testigosnenqa cieguitosta yanapariyta munasqanchejta. Chantapis braillepi publicaciones chayri uyarinapaj grabaciones kapuwasqanchejta willarisunman. Bibliawantaj sutʼincharisunman Dios cieguitosta sanoyachinanta. Chantapis rikuchisunman Internetpi jw.org nisqapi “No sé qué haría sin ella” nisqa videota. Kay videoqa uj cieguito hermanoj kausayninmanta parlashan. Paytaqa braillepi Biblia kasqan yanaparqa. Visitasqanchejtataj sutʼinchasun chayqa, ichá cieguitoswan parlajta saqewasun.
4. ¿Imatá yachakunchej Janetpa ruwasqanmanta?
4 Uj cieguita hermana Janet sutiyoj, maypichus cieguitos tiyakunku chayman visitarej rerqa. Chaypitaj uj sipaswan parlarerqa. Janet chay sipasman nerqa: “Jesusqa kay pachapi kashaspa, wakin cieguitosta jamperqa. Chaywantaj rikucherqa aswan qhepamanpis cieguitosta jampinanta”, nispa. Chaymantataj Apocalipsis 21:3, 4 nisqanta ukhuncharerqanku. Janettaj sutʼincharqa imaynatachus Diospa Reinon chayta ruwananta. Chay sipastaj nerqa: “Kunanpuni uj cieguita jinata niwan. Mana cieguitos kajkunaqa yuyanku ciegoyayqa uj castigo kasqanta imatachus ruwasqanchejmanta chayri ñaupa tatasninchej ruwasqankumanta”, nispa. Janetqa correonman apacherqa Yachachin libroj direccionninta. Kunantaj semanapi iskay kutita Bibliamanta yachachishan.
5. Cieguitosta mana sanoyachispapis, ¿imaynatá yanapasunman?
5 Noqanchejqa, cieguitosta Jesús jina mana sanoyachiyta atispapis yanapayta atinchej yuyayninkupi laqhayachisqa jina kajkunata, cieguitos kajkunata ima. Tukuyta yanapayta atinchej Diospa Palabranmanta yachakunankupaj (2 Cor. 4:3, 4). Jesusqa Jericó llajtaj qayllanpi iskay cieguitosta jamperqa khuyakusqanrayku (Mat. 20:34). Jesús jina cieguitosta yanapayta munasqanchejta rikuchisun chayqa, Jehovata rejsinankupaj yanapasun. Jehovaqa cieguitosta wiñaypaj jampenqa..