Diosmanta yachakuna profetasninnejta
Ñaupa tiempopi, Diosqa profetasninnejta runasman sumaj willaykunata willacherqa. ¿Yanapawasunmanchu chay willaykuna Diospa bendicionninta japʼinapaj? Arí. Kunanqa qhawarina kinsa profetaspa nisqankumanta imatachus yachakuyta atisqanchejta.
ABRAHÁN
Diosqa tukuy runasta uj rejllata qhawan, bendeciytataj munan.
Diosqa profeta Abrahanman nerqa: “Qannejta bendecisqas kanqanku tukuy ayllus kay pachapi kajkuna”, nispa (Génesis 12:3).
¿Imatá yachakunchej? Dios mayta munakuwasqanchejta, kasukoj qharista, warmista, wawasta imataj bendeciyta munasqanta.
MOISÉS
Diosqa khuyakuyniyoj, paymanta yachakunankupaj kallpachakojkunatataj bendecin.
Tukuy Atiyniyoj Diosqa, profeta Moisesman atiyta qorqa milagrosta ruwananpaj. Chaywanpis Moisesqa Diosmanta mañakorqa: “Kunan rikuchiway ari ñanniykita, qanta rejsisunaypaj, qampi khuyakuyta tarinaypajtaj”, nispa (Éxodo 33:13). Moisés chayta mañakusqanmanta Diosqa kusikorqa, bendicerqataj astawan rejsinanpaj, paymanta yachakunanpajtaj. Arí, Moisesqa yachakorqa, Diosqa “khuyakuyniyoj, kʼacha sonqoyoj” ima kasqanta (Éxodo 34:6, 7).
¿Imatá yachakunchej? Diosqa tukuyta, qharista, warmista, wawasta ima bendecinawanchejta, payta allinta rejsinapaj kallpachakojtinchej. Payqa Palabranpi niwanchej imaynatachus yupaychananchejta, maytataj munashasqanta tukuyta bendeciyta.
JESÚS
Jesusqa runasta khuyakorqa, tukuy onqosqastataj sanoyacherqa.
Diosqa bendeciwasun Jesús imatachus ruwasqanmanta, yachachisqanmanta ima yachakojtinchej.
Diospa Palabranqa willawanchej Jesuspa kausayninmanta, imatachus yachachisqanmanta ima. Diosqa Jesusman atiyta qorqa milagrosta ruwananpaj. Chayrayku sanoyacherqa ciegosta, lojtʼitusta chayri joqʼarasta, cojosta ima. Wakin wañusqastapis kausaricherqa. Jinamanta Jesusqa rikucherqa, Dios aswan qhepaman tukuy runaspaj allin imasta ruwananta. Jesusqa sutʼincharqa imatachus ruwananchejta chay bendicionesta japʼinapaj. Pay nerqa: “Kaymin wiñay kausayqa: Qan kʼata cheqa Diosta rejsisunanku, kachamusqayki Jesucristotapis”, nispa (Juan 17:3).
Jesusqa runasta khuyakorqa, munakorqataj. Qharis, warmis, jóvenes, machitus ima Jesuspa nisqanta kasukorqanku. Jesús nerqa: “Yugoyman churakuychej, noqamantataj yachakuychej, noqaqa llampʼu sonqo, kʼumuykukoj sonqotaj kani, kausayniykichejpajtaj samarikuyta tarinkichej”, nispa (Mateo 11:29). Jesuspa tiemponpi runasqa warmista pisipaj qhawaj kanku. Chaywanpis Jesusqa warmista khuyakoj, jatunpaj qhawaj, respetajtaj.
¿Imatá yachakunchej? Jesusqa runasta mayta munakusqanta. Paymanta yachakunchej noqanchejpis wajkunawan allinta kausakuna kasqanta.
JESUSQA MANA DIOSCHU
Diospa Palabranqa yachachiwanchej ‘noqanchejpaj uj Dioslla’ kasqanta. Jesucristotaj Diospa kachamusqan kasqanta (1 Corintios 8:6). Jesusqa sutʼita nerqa Dios paymanta aswan atiyniyoj kasqanta, Diostaj jallpʼaman kachamusqanta (Juan 11:41, 42; 14:28).a
a Jesucristomanta astawan yachanaykipajqa, ¡Diosmanta jamoj sumaj willaykuna! folletoj 4 yachaqananta leeriy. Chaytaqa tariwaj Internetpi www.jw.org nisqapi.