Diospa Palabranqa kikillanpuni

Wakin runasqa yachayta munanku Diospa Palabran kikillanpunichus manachus kasqanta. Profeta Isaiasqa nerqa Diospa Palabran ‘wiñaypa wiñaynintinpaj sayasqanta’ (Isaías 40:8). ¿Imaynatá yachanchej Diospa nisqasnin kunankama kikillanpuni kashasqanta?

Diosqa mana saqenchu Palabran chinkananta, nitaj saqenchu cambiasqa kananta. Ñaupa tiempopi Bibliata copiajkunaqa, sapa letrata copiaspa yupaj kanku ni imata yapaykunankupaj, ni imata cambianankupaj chayri ni imata chinkarparichinankupaj. Jinapis paykunaqa, tukuy runas jina juchasapas kasqankurayku copiaspa pantaykojpuni kanku.

DIOSPA PALABRANPI NISQANQA QALLARIYPI JINALLAPUNI

Diospa Palabran ñaupa tiempopi qhelqakusqanmanta may chhika copias tiyan. Uj copia mana kikinchu chayqa, waj copiaswan kikinchayta atikun, imachus faltasqanta yachanapaj (astawan yachanaykipajqa “¿Se ha cambiado o manipulado la Biblia?” nisqa yachaqanata Internetpi jw.org nisqapi leeriy).

Wañusqa Qochapi tarisqanku qhelqasqasmanta parlarina. Chay qhelqastaqa chʼin pampaspi tiyakoj runas tarerqanku Wañusqa Qochapi, 1947 watapi. Chay qhelqasqasqa Diospa Palabranmanta wakin parte karqa, qhelqakusqanmantataj 2.000 watas kurajña pasan. Yachayniyoj runasqa, chay qhelqasqasta kikinchanku kay tiempopi kapuwasqanchej Bibliawan.

Chay kikinchasqankupitaj paykunaqa repararqanku, Diospa Palabranpi nishasqan chay qhelqasqaspi jinapuni kashasqanta.a Chay qhelqasqasta sumajta qhawaykuspataj repararqanku Bibliapi leesqanchejqa Diospa Palabranpuni kasqanta. Reparanchej jina, Diosqa mana saqerqachu Palabranpi nisqan cambiasqa kananta noqanchej yachananchejpaj.

Chayrayku Diospa Palabrantaqa mana iskayrayaspa leesunman cabaltapuni parlasqanrayku. Kunantaj qhawarina, imatachus profetas Diosmanta yachachiwasqanchejta.