¿Imaynatá Diosmanta mañakuy yanapawasunman?

Pamelaqa sinchʼita onqoykorqa chayrayku doctorman rerqa. Ajina kashaspa payqa orakorqa, nanayninta aguantananpajtaj Diosmanta kallpata mañakorqa. ¿Orakusqan yanaparqachu?

Pamela nin: “Onqoyniymanta tratamientota ruwashaspaqa, mayta manchachikoj kani. Jinapis Jehová Diosmanta mañakojteyqa sonqoy tiyaykoj, niñataj manchachikojchu kani. Nanayneyqa kanraj, jinapis Diosmanta mañakuspaqa mana chayllapichu piensani. Wajkuna imaynachus kashasqayta tapuwajtinku, mana allinchu kaspapis, kusisqa kashasqayta nini”, nispa.

Jehová Diosmantaqa mana jatun llakiypi rikukusparajchu mañakunanchej tiyan. Tukuy runas problemasniyoj kanchej, ñaupajman rinapajtaj yanapata necesitanchej. Jinapis, ¿Diosmanta mañakuy yanapawasunmanchu?

Bibliaqa nin: “Llakiyniykita Tata Diosman saqey. Payqa sinchʼita sayachisonqa. Payqa cheqan runata ni jaykʼaj urmajta saqenqachu”, nispa (Salmo 55:22). Kay versiculoqa mayta kallpachawanchej. ¿Imaynatá Diosmanta mañakuy yanapawasunman? Dios munasqanman jina mañakojtinchejqa, pay necesitasqanchejta qowasunchej ima llakiytapis atipanapaj (“Diosmanta mañakuy yanapawanchej”, nisqa recuadrota qhawariy).

Diosmanta mañakuy yanapawanchej

Sonqo tiyaykuyta qowasun

Diosmantaqa tukuy sonqo mañakuychej, “Diostaj sonqo tiyaykuyta qosonqachej, mayqentachus runas mana entiendeyta atinkuchu, chayta. Ajinamanta payqa sonqoykichejta, yuyayniykichejtawan, Cristo Jesusnejta waqaychanqa” (Filipenses 4:6, 7). Imachus llakichiwasqanchejta Diosman willakusun chayqa, pay yanapawasunchej mana llakikunapaj, imatapis sumaj yuyaywan ruwanapaj.

Yachayta qowasun

“Sichus qankunamanta pillapis pisi yachayniyoj chayqa, Diosmanta mañakullachunpuni. Diostaj yachayta payman qonqa. Imaraykuchus Diosqa tukuyman mana michʼakuspa qon, mana rimaspallataj” (Santiago 1:5). Problemasniyoj kaspaqa mana imatapis allinta ruwayta atillanchejchu. Diosmanta yachayta mañakojtinchejtaj, payqa yanapawasunman sumaj yuyaychaykunata Bibliamanta yuyarikunapaj.

Kallpata, sonqochaytawan qowasun

“Tukuy imapaj kallpayoj kani, Dios atiyta qowasqanrayku” (Filipenses 4:13). Jehová Dios tukuy atiyniyoj kasqanrayku pay kallpachawasunman ima llakiypi rikukojtinchejpis chayri ima pruebata aguantanapajpis (Isaías 40:29). Bibliaqa Jehová Diosmanta parlaspa nin “tukuy imapi sonqochaj” Dios kasqanta, tukuy llakiyninchejpitaj sonqochawasqanchejta (2 Corintios 1:3, 4).