Profesionniyoj kay qolqeyojtaj kay, ¿yanapawasunmanchu sumajta kausakunapaj?

Ashkha runasqa yuyanku profesional kaspa, qhapaj kaspa ima sumajta kausakunankuta. Yuyankutaj universidadman rejtinku sumajta llankʼanankuta, sumajta familiankuwan kausakunankuta, sumaj runas kanankuta ima. Chantá nillankutaj profesional kaspaqa uj sumaj llankʼayta tarinankuta, aswan ashkhata ganaspataj aswan kusisqa kanankuta ima.

¿IMATÁ ASHKHAS RUWANKU?

China suyumanta Zhang Chen sutiyoj runa nin: “Yuyarqani niña wajcha kanaypaj, kusisqataj kausakunaypaj profesional kaspa uj sumaj llankʼayniyoj kanay kasqanta”, nispa.

Ashkhasqa sumajta kausakuyta munaspa, rejsisqa universidadespi estudianku. Chaypi estudianankupaj waj suyuman viajananku kajtinpis. Coronavirus onqoy kasqanmantapachataj niña chayta ruwayta atillankuchu. 2012 watapi uj organización nerqa: “Waj suyuspi estudiajkunamanta khuskan kurajpuni Asiamanta kanku”, nispa.

Ashkha tatasqa tukuy imata ruwanku wawasninku waj suyumanta universidadespi estudianankupaj. Taiwán suyumanta uj runa Qixiang sutiyoj jinata nin: “Tatasneyqa mana qhapajchu karqanku. Jinapis noqata kinsa hermanosniytawan Estados Unidosman estudianaykupaj kachawarqayku”, nispa. Tatasnenqa waj tatas jinallataj wawasninku estudianankupaj ashkha qolqeta manuchakorqanku.

¿IMASPITAJ RIKUKORQANKU?

Uj jovencita computadoraj ñaupaqenpi may llakisqa kashan. — Profesional kanapaj, ashkha qolqeyojtaj kanapaj kallpachakojkunaqa llakiyllapi rikukunku.

Universidadman reyqa wakin imaspi yanapawasunman, jinapis ashkhas repararqanku mana yuyasqankuman jinapunichu kasqanta. Wakenqa ashkha watasta estudianku, ashkha qolqetataj manuchakunku. Jinapis mana estudiasqankupipunichu trabajanku. Chaymanta parlaspa uj periódico nin: “Universidadmanta ashkha graduakojkunaqa mana trabajota tariyta atillankuchu”, nispa. Jianjie sutiyoj runa Taiwanpi tiyakun, profesionaltaj. Pay nin: “Ashkhasqa estudiasqankupi mana trabajota tarisqankurayku, waj imaspi trabajanku”, nispa.

Wakinkunaqa estudiasqankupaj trabajota tarinku. Jinapis mana yuyasqankuman jinachu kausakunku. Niran sutiyoj runaqa Tailandiamanta. Payqa Europaman estudiaj rerqa. Suyunman kutipojtintaj imapajchus estudiarqa chaypi trabajota tarerqa. Pay nin: “Estudiasqayrayku uj sumaj trabajota tarerqani, sumajtataj pagawaj kanku. Jinapis astawan gananaypajqa astawan kallpachakunay karqa, astawantaj trabajanay karqa. Chantá chay trabajomanta noqata waj empleadostawan despedipuwarqayku. Repararqanitaj ni ima trabajopis segurochu kasqanta”, nispa.

Qhapajkunapis familiankupi problemasniyoj kanku, onqonku chayri qolqenkumanta anchata llakikunku. Japonmanta Katsutoshi sutiyoj runa nin: “Ashkha qolqeyoj kaspapis mana kusisqachu karqani. Imajtinchus runas envidiakuwaj kanku, tukuy imatataj niwaj kanku”, nispa. Vietnam suyumanta Lam sutiyoj señora, jinata nin: “Ashkha runasta rikorqani sumaj trabajoyoj, ashkha qolqeyojtaj kanankupaj kallpachakusqankuta. Jinapis onqoykorqanku, sinchʼitataj llakikorqanku”, nispa.

¿YANAPAWASUNMANCHU SUMAJTA KAUSAKUNAPAJ PROFESIONNIYOJ KAY QOLQEYOJTAJ KAY?

Escuelayoj kay qolqesituyojtaj kay necesitasqanchej imasniyoj kanapaj yanapawasunman. Jinapis mana chayllawanchu sumajta kausakusun. Imastachus Diospa Palabran niwasqanchejta qhawarina.

PROFESIONAL KASPAQA MANA SUMAJTAPUNICHU KAUSAKUSUN

‘Usqhayta correjkunaqa mana carrerapi atipankuchu. Yachayniyojkunapis mana mikhunayojpunichu kanku. Yachaysapaspis mana qhapajyankupunichu. Sumajta yachajkunatapis mana allinpunichu rin. Desgracia tiempopis, mana yuyasqallamanta ima llakiypis tukuyninkuman chayan’ (ECLESIASTÉS 9:11).

Ashkha runas profesionniyoj kajtinkupis mana tukuy imapipunichu allin rin. Ichá ujllata qolqe pisillaña valenman, chʼajwas kanman chayri chejninakuy kanman. Chayraykutaj niña sumajtachu kausakunkuman.

KAPUYNIYOJ KAYQA UJ RATOLLAPAJ

“Ama qhapaj kayta maskʼaspalla puriychu. Amaña chayta ruwaychu, astawanqa allinta reparakuyta yachay. Chay qhapaj kayqa ujtawan qhawarinaykipaj niña kanqachu, lijrachakuytawan águila jina patata phawarispa chinkariponqa” (PROVERBIOS 23:4, 5).

Qhapaj kayqa uj ratollapaj. Unay wataspi tantasqanchej qolqeqa, uj ñawi chʼirmiypi chinkapunman niña kikinchu valesqanrayku. Chantapis terremotos, sinchʼi wayras waj llakiykuna ima ujllapi mana wasiyojta, mana qolqeyojtataj rikhurichiwasunman.

QHAPAJ KAYQA LLAKIYTA APAMUN

“Qhapaj runarí qhapaj kasqanrayku ni puñuytapis atinchu” (ECLESIASTÉS 5:12).

Ajinapi Franklin rikukorqa, payqa Hong Kong llajtapi tiyakun. Franklinqa profesional kaspa uj sumaj llankʼayniyoj karqa, sumajtataj ganakoj. Pay nin: “Manchayta trabajasqayrayku onqoykusharqani, niña puñuytapis atejchu kani. Chayrayku piensarerqani imaraykuchus ajinata kausakushasqayta, imapajchus kausakushasqanchejtapis yachayta munarqani”, nispa.

“Ama qhapaj kayta maskʼaspalla puriychu” (PROVERBIOS 23:4).

Ashkha runasqa Franklin jinallataj reparanku kusisqa kanapajqa, mana profesionalchu nitaj qolqeyojpunichu kana kasqanta. Wakin runastaj kapuyniyoj kanankumantaqa kʼacha runas kanankupaj, wajkunaj allinninkuta maskʼanankupaj ima kallpachakunku. ¿Chayta ruwaspachu sumajta kausakunkuman? Chayta qhepan yachaqanapi yachakusun.