¿Kʼacha runas kaspallachu sumajta kausakusun?

Unaymantapacha runasqa yuyanku sumajta kausakunapaj kʼachas kana kasqanta. Asiamanta ashkha runasqa yachayniyoj runa Confucio sutiyoj jinallataj yuyanku. Pay nerqa: “Imatachus mana munanchejchu runas ruwapunawanchejta chayta ama paykunapaj ruwapunachu”, nispa.

¿IMATÁ ASHKHAS RUWANKU?

Ashkha runas nillankutaj sumajta kausakunankupajqa allinta portakunanku kasqanta. Chayrayku kallpachakunku wajkunata respetanankupaj, kʼachas kanankupaj, familiankupi jinallataj trabajonkupi ruwanankuta sumajta juntʼanankupaj, llimphu concienciayoj kanankupaj ima. Linh sutiyoj señora Vietnampi tiyakun. Pay nin: “Mana suwakojtiy, maychus kajtataj parlajtiy allin rinawanta yuyarqani”, nispa.

Chay warmillataj wajchasman mikhunata qarashan.

Wakin runastaj allin imasta ruwanku iglesiankupi chayta yachachisqankurayku. Hsu-Yun sutiyoj runa Taiwanpi tiyakun. Pay nin: “Yachachiwarqanku uj runa kausashajtin allin imasta ruwajtenqa wañupojtin kusisqa kananta, sajra imasta ruwajtintaj sufrinanta”, nispa.

¿IMASPITAJ RIKUKORQANKU?

Uj warmi may llakisqa kashan, wawitantaj brazosninpi puñushan.

Wajkunapaj allin imasta ruwayqa sumajpuni. Jinapis ashkha runasqa reparanku runaswan kʼachas kajtinkupis wakenqa paykunawan mana kʼachaschu kasqankuta. Shiu Ping sutiyoj señora Hong Kong llajtapi tiyakun. Pay nin: “Wajkunata yanapanaypaj kallpachakoj kani, jinapis llakiyllapi rikukorqani. Familiayta yanapanaypaj mayta kallpachakojtiypis qosayqa noqata wawitaytawan saqerpariwarqayku”, nispa.

Ashkha runas repararqanku iglesiaman rejkunaqa, mana kʼacha runaspunichu kasqankuta. Etsuko sutiyoj señora Japonpi tiyakun. Pay nin: “Uj iglesiaman rej kani, chaypeqa jóvenes imastachus ruwananku karqa chayta wakichej kani. Iglesiaymanta runasqa khuchichakoj kanku, aswan atiyniyoj kayta munaj kanku, qolqetapis suwakoj kanku. Chayta rikuspataj may llakisqa kasharqani”, nispa.

“Wajkunata yanapanaypaj kallpachakoj kani, jinapis llakiyllapi rikukorqani. Familiayta yanapanaypaj mayta kallpachakojtiypis qosayqa noqata wawitaytawan saqerpariwarqayku” (SHIU PING, HONG KONG).

Iglesiaman rejkunamanta wakenqa, wajkunata yanapasqanku qhasillapaj kasqanta rikuspa llakikunku. Vietnam suyumanta Van sutiyoj señora ajina sientekorqa. Pay nin: “Wañusqa familiaresniypaj sapa día churaj kani frutasta, tʼikasta, mikhunasta ima yanapanawankuta yuyaspa. Chayta unay watasta ruwarqani. Jinapis qosay manchayta onqoykorqa, warmi wawaypis 20 watitasnillayoj wañuporqa. Payqa waj suyupi estudiasharqa”, nispa.

¿KʼACHA RUNALLACHU KANA TIYAN?

Sumajta kausakunapajqa mana kʼacha runallachu kana tiyan. ¿Imaraykú? Qhawarina imatachus Diospa Palabran nisqanta.

MANA TUKUYCHU ALLIN KAJTA RUWAYTA MUNANKU

“Uj juchasapa runalla ashkha allin imasta manakajman tukuchinman” (ECLESIASTÉS 9:18).

Kʼacha runas kanapaj kallpachakojtinchejpis, wajkunaj ruwasqankoqa llakiypi rikuchiwasunman. Ichapis uj onqoy kasqanrayku autoridadesta kasukuspa mana wajkunawan tantakunchejchu. Jinapis wakin runas autoridadesta mana kasukojtinku, kausayninchejta wañuy pataman churankuman.

ASHKHASQA MANA YACHANKUCHU IMACHUS ALLIN IMATAJCHUS MANA ALLIN KASQANTA

“Runaj yuyayninman jina ñannenqa cheqan kashan. Chay ñantaj wañuyman chayan” (PROVERBIOS 14:12).

Ashkha runasqa allin kajta ruwashasqankuta yuyarqanku. Jinapis reparakorqanku mana allin kajllata ruwashasqankuta. Allin kajta ruwayta munaspapis pantaykunchej chayqa, llakiyllapi rikukunchej.

KAUSAYNINCHEJQA UJLLATA CAMBIANMAN

‘Mana yachankichejchu imachus kausayniykichejwan qʼaya kananta’ (SANTIAGO 4:14).

Aswan kʼacha runa kajpis, ima ratollapis wañupunman. Coronavirus onqoy tiempopi, ashkha runasqa wajkunata yanapasqankurayku wañuporqanku. Liting sutiyoj señora Chinapi tiyakun. Paypa tatanqa uj accidentepi wañorqa. Pay nin: “Tatayqa sumajta trabajaj, llampʼu sonqo, kʼachataj karqa. Mana creeyta aterqanichu, ¿imaraykutaj chay jina kʼacha runa wañupunman kasqarí? Autopi rejkunamanta paylla wañuporqa”, nispa.

Reparanchej jina, sumajta kausakunapajqa mana kʼacha runallachu kananchej tiyan. ¿Imatawan ruwana kanman? Chaypajqa uj sumaj yanapapi yuyaychaykunata maskʼasunman. ¿Imataj chay yanapa kanman?